कोरोना संक्रमण बढेका कारण त्रिविका सबै परीक्षा स्थगित- समाचार - कान्तिपुर समाचार

कोरोना संक्रमण बढेका कारण त्रिविका सबै परीक्षा स्थगित

कान्तिपुर संवाददाता

काठमाडौँ — त्रिभुवन विश्वविद्यालयले हाल सञ्चालन भइरहेका र संचालन हुने परीक्षाहरु अर्को सूचना प्रकाशित नभएसम्मका लागि स्थगित गर्ने निर्णय गरेको छ ।

त्रिविले एक सूचना प्रकाशित गर्दै ओमिक्रोन भेरिएन्टको तीव्र संक्रमणका कारण उपत्यका र बाहिरका अधिकांश परीक्षा केन्द्रमा परीक्षासँग सम्बन्धित विद्यार्थी, कर्मचारी एवं प्राध्यापकसमेत संक्रमित भएकाले परीक्षा स्थगित गर्नु परेको जनाएको छ । त्रिवि केन्द्रीय परीक्षा संचालक समितिको बिहीबारको बैठकबाट हाल वार्षिक तथा सेमेष्टर प्रणालीका सम्पूर्ण परीक्षाहरु २०७८ माघ ९ गतेदेखि अर्को सूचना प्रकाशित नभएसम्मका लागि स्थगित गर्ने निर्णय गरेको हो ।

यस्तै काठमाडौं विश्वविद्यालयले पनि महामारीकै कारण सबै परीक्षा स्थगित गर्ने निर्णय गरिसकेको छ ।

प्रधानमन्त्री शेरबहादुर देउवाले त्रिभुवन विश्वविद्यालयका जारी परीक्षाहरुमा सामाजिक दूरी कायम भए/नभएको र परीक्षा कोठामा स्यानिटाइजर एथेस्ट मात्रामा भए नभएको अनुगमन गर्न बिहीबार नै निर्देशन दिएका थिए । उनले परीक्षा सञ्चालन भएका कलेजहरुमा अनुगमन गर्न र कोभिड–१९ का मापदण्ड पालना नभए केही हप्ता परीक्षा स्थगित गराउन निर्देशनसमेत दिएको उनको सचिवालयले जनाएको थियो ।

प्रकाशित : माघ ६, २०७८ १६:३१
प्रतिक्रिया
पठाउनुहोस्

दोलखा प्रशासनमा आलोपालो सेवा प्रवाह 

केदार शिवाकोटी

दोलखा — जिल्ला प्रशासन कार्यालय दोलखाले संक्रमणको जोखिम बढेको भन्दै सेवाग्राहीका लागि आलोपालोको व्यवस्था गरेको छ । 

नागरिकता, राहदानी र राष्ट्रिय परिचप पत्र बनाउन आउनेहरुको भिड नियन्त्रणका लागि आलोपालो नियम बनाएको प्रशासनले बिहीबार सूचनामार्फत जानकारी दिएको हो । प्रशासनले आइतबारबाट स्थानीय तहका सेवाग्राही आउने बार निर्धारण गरेर पालो सिस्टम लागू गरेको छ । ९ वटा स्थानीय तह रहेका दोलखामा आइतबार, मंगलबार र बिहीबार बैत्यश्वर र तामाकोसी गाउँपालिकासहित जिरी नगरपालिकाका सेवाग्राहीको प्रशासनबाट सेवा पाउने सूचनामा उल्लेख छ । यस्तै इलाका प्रशासन कार्यालय सिंगटीको कार्यक्षेत्र नपरेको गौरीशंकर गाउँपालिकाका वडाहरुले पनि यी दिन सेवा पाउनेछन् ।

सोमबार, बुधबार र शुक्रबार मेलुङ र शैलुङ गाउँपालिकासहित भीमेश्वरका नागरिकले प्रशासनबाट सेवा लिन पाउनेछन् । यो बाहेकका दिन इलाका प्रशासन कार्यालय सिंगटी कार्यक्षेत्र नरहेको कालिञ्चोक गाउँपालिकाका वडाका नागरिकले सेवा लिन पाउनेछन् । विगु गाउँपालिका सबै वडको सेवा भने इलाका प्रशासन कार्यालयले दिने छ । प्रशासनले २५ जनाभन्दा बढी भिड हुन प्रतिबन्ध गरे पनि कार्यालयमा सेवा लिनेहरुको भिड बढेपछि नियन्त्रणका लागि यस्तो नियम राखेको जनाएको छ ।

यसैबीच, कर्मचारीहरु कोरोना संक्रमित भएपछि तामाकोसी गाउँपालिकाको कामकाज प्रभावित बनेको छ । तामाकोसीले सार्वजनिक सूचना जारी गरेर कर्मचारी संक्रमित भएकाले अत्यावश्यकबाहेकका सबै सेवा बन्द गरेको जनाएको छ ।

कर्मचारीमा कोरोना देखिएपछि तामाकोसीमा १२ गतेसम्म र शैलुङ गाउँपालिकामा १३ गतेसम्म अत्यावश्यकबाहेक सबै सेवा बन्द गरिएको छ ।

प्रकाशित : माघ ६, २०७८ १६:२१
पूरा पढ्नुहोस्
प्रतिक्रिया
पठाउनुहोस्
×