कोरोनाका लक्षण देखिए ५ दिन क्वारेन्टाइन बसेरमात्र परीक्षण गराउनुहोस् : डा. पौडेल- समाचार - कान्तिपुर समाचार

कोरोनाका लक्षण देखिए ५ दिन क्वारेन्टाइन बसेरमात्र परीक्षण गराउनुहोस् : डा. पौडेल

कान्तिपुर संवाददाता

काठमाडौँ — ईपीडीमियोलोजी तथा रोग नियन्त्रण महाशाखाले कोरोनाको लक्षण देखिनासाथ परीक्षणभन्दा पनि क्वारेन्टाइनमा बस्न सुझाएको छ । स्वास्थ्य तथा जनसंख्या मन्त्रालयले बुधबार गरेको कोरोना प्रेस ब्रिफिङमा बोल्दै ईडीसीडीका निर्देशक डा. कृष्णप्रसाद पौडेलले कोरोनाका लक्षण देखिनासाथ ५ दिन क्वारेन्टाइन बसाईपश्चात् मात्र कोभिड परीक्षण गर्नुपर्ने बताए ।

उनले भने–‘ओमिक्रोन भेरिएन्ट अलि बढी संक्रामक छ । खोप लगाएका व्यक्तिमा पनि संक्रमण गराउन सक्छ । ५ दिन क्वारेन्टाइन नभए ७ दिनसम्म आइसोलेसनमा बस्नुपर्छ ।’

उनका अनुसार ज्वरो आउनु, नाक बन्द हुनु, रुघाखोकी लाग्नु, घाँटी दुख्नु कोभिडका लक्षण हुन सक्छन् । ‘अहिलेको संक्रमण हेर्दा अस्पताल भर्ना हुने डर कम देखिएको छ । जनस्वास्थ्यका मापदण्डको पालना तथा खुल्ला ठाउँमा बस्ने, हावा खेल्ने ठाउँमा बस्ने गर्नाले संक्रमण सर्ने जोखिम कम हुन्छ । केही जटिलता रहेमा स्वास्थ्यकर्मीको सम्पर्कमा रहनुहोला,’ उनले भने ।

प्रकाशित : माघ ५, २०७८ १७:३६
प्रतिक्रिया
पठाउनुहोस्

ट्रेकिङ तथा टुर व्यवसायीलाई करका मुद्दा फिर्ता लिन २ महिना समय थप

कान्तिपुर संवाददाता

काठमाडौँ — ट्रेकिङ तथा टुर व्यवसायीले करका मुद्दा फिर्ता लिन थप २ महिनाको समय पाएका छन् ।  आर्थिक ऐन २०७८ को दफा २० र दफा २३ मा भएको व्यवस्था कार्यान्वयनका लागि सरकारले आगामी फागुन मसान्तसम्मको समय दिएको हो ।

आर्थिक ऐनको दफा २० मा प्रशासकीय पुनरावलोकन वा पुनरावेदनमा बिचाराधीन रहेका मुद्दा फिर्ता लिई कर तिरेमा त्यसमा लाग्ने शुल्क, थप दस्तुर तथा जरिवाना मिनाहा गर्ने सम्बन्धी व्यवस्था राखिएको छ । त्यस्तै, ऐनको दफा २३ मा ट्रेकिङ तथा टुर प्याकेजमा लाग्ने थप दस्तुर, ब्याज र जरिवाना मिनाहा सम्बन्धी विशेष व्यवस्था राखिएको छ ।

दफा २० कार्यान्वयनका लागि सरकारले मंसिर मसान्तसम्मको समय दिएको थियो भने दफा २३ कार्यान्वयनका लागि पुस मसान्तसम्मको समय दिएको थियो । तर राजस्व न्यायाधिकरणका अध्यक्षको नियुक्तिमा भएको ढिलाईका कारण आर्थिक ऐनमा भएका यी दुवै व्यवस्था कार्यान्वयनमा समस्या भएपछि समय थप गरिएको अर्थ मन्त्रालयले जनाएको छ ।

आर्थिक ऐन २०७८ को दफा २३ ले ‘ट्राभल तथा ट्रेकिङ एजेन्सीको कारोबार गर्ने व्यक्तिले विगतमा ट्रेकिङ तथा टुर प्याकेजमा मूल्य अभिवृद्धि कर लाग्ने कारोबारलाई कर छुटको बिक्री अन्तर्गत देखाई मूल्य अभिवृद्धि कर संकलन र दाखिल नगरेकोमा २०७८ जेठ १४ गतेसम्मको कारोबार स्वयम् घोषणा गरी त्यस्तो कारोबारमा लाग्ने मूल्य अभिवृद्धि कर २०७८ पुस मसान्तभित्र दाखिला गरेमा सोमा लाग्ने थप दस्तुर, ब्याज र जरिवाना मिनाहा हुने’ उल्लेख गरेको छ ।

उक्त दफाको उपदफा २ मा ‘छुटको बिक्रीअन्तर्गतको कारोबारमा आन्तरिक राजस्व कार्यालयबाट कर निर्धारण भई तिर्न बाँकी रहेको बक्यौता करमध्ये निर्धारित कर रकम २०७८ पुस मसान्तभित्र दाखिल गरेमा सोमा लागेको थप दस्तुर, ब्याज र जरिवाना मिनाहा हुनेछ’ भनी व्यवस्था गरिएको छ ।

त्यस्तै, उपदफा ३ ले ‘यसरी निर्धारण भएको कर उपर प्रशासकीय पुनरावलोकनका लागि आन्तरिक राजस्व विभाग वा राजस्व न्यायाधिकरणमा निवेदन दिई मुद्दा बिचाराधीन रहेको व्यक्तिले त्यस्तो मुद्दा फिर्ता लिई निर्धारित रकम २०७८ पुस मसान्तभित्र दाखिला गरेमा सोमा लागेको थप दस्तुर ब्याज र जरिवाना मिनाहा हुने’ उल्लेख छ । दफा २३ को उपदफा ३ कार्यान्वयनका लागि राजस्व न्यायाधिकरणमा अध्यक्ष नियुक्त हुुनुपर्ने र उपदफा ३ कार्यान्वयन नहुँदा उपदफा १ र २ पनि कार्यान्वयन गर्न अप्ठेरो हुने भएपछि सरकारले समयसीमा बढाइरहेको हो ।


प्रकाशित : माघ ५, २०७८ १७:२८
पूरा पढ्नुहोस्
प्रतिक्रिया
पठाउनुहोस्
×