सर्वोच्चका ३५ कर्मचारीलाई कोरोना संक्रमण, सेवा कटौतीका लागि पूर्ण बैठक बोलाइयो- समाचार - कान्तिपुर समाचार

सर्वोच्चका ३५ कर्मचारीलाई कोरोना संक्रमण, सेवा कटौतीका लागि पूर्ण बैठक बोलाइयो

कान्तिपुर संवाददाता

काठमाडौँ — कर्मचारीहरुलाई कोरोना संक्रमण भएपछि सर्वोच्च अदालतको पूर्ण बैठकका लागि पत्राचार गरिएको छ । सर्वोच्चका सूचना अधिकारी देवेन्द्र ढकालले अदालतका ३५ जना कर्मचारीलाई कोरोना संक्रमण देखिएको जानकारी दिए । यस्तै, अन्य ३०भन्दा बढी कर्मचारीहरुमा कोरोनाको लक्षण देखिएको, स्वाब परीक्षण गराएर घरमा बसेको उनले बताए ।

संक्रमण तीव्र रुपमा फैलिएपछि मंगलबार दिउँसो पूर्ण बैठक बस्ने तयारी भएको छ । फूल कोर्ट बस्नका लागि सबै न्यायाधीशहरुलाई पत्राचार भएको उनले जानकारी दिए ।

बैठक सेवा कटौतीको विषयमा केन्द्रित हुने प्रवक्ता ढकालले बताए । न्यायाधीशहरुको विरोधका कारण फूल कोर्ट बैठकमा प्रधानन्यायधीश चोलेन्द्रशम्शेर जबरा उपस्थित हुने छैनन् । न्यायाधीशहरूको बैठक बसेर निर्णय गरेपछि अन्तिममा जबराले हस्ताक्षर गर्नेछन् ।

प्रकाशित : माघ ४, २०७८ ११:०१
प्रतिक्रिया
पठाउनुहोस्

विद्यालय बन्द नगरी नियमित पढाइ

अगन्धर तिवारी

पर्वत — कोरोना महामारीको तेस्रो लहरका बीच सरकारले देशभरका विद्यालय बन्द गर्ने निर्णय गरे पनि जिल्लाका विद्यालय भने यथावत् सञ्चालनमा छन् । जिल्लाभर कोभिडको संक्रमण भयावह नभइसकेको र शैक्षिक सत्रको कोर्स पूरा गर्नुपर्ने बाध्यता रहेकाले विद्यालयले बन्द गर्न मानेका छैनन् । 

स्थानीय तहले विद्यालय बन्द गर्नुपर्ने वा नपर्ने अवस्थाबारे विद्यालय व्यवस्थापन समिति तथा प्रधानाध्यापकसँग छलफल गरिरहेका छन् । छलफलका क्रममा सामाजिक दूरी कायम गरी स्वास्थ्य मापदण्ड अपनाएर अध्यापन गर्न सकिने भएकाले बिहीबार कुश्मा नगरपालिकाभित्रका प्रधानाध्यापकलाई छलफलका लागि बोलाएर नगरपालिका विद्यालय बन्द नगर्ने निर्णयमा पुगेको हो ।

बैठकमा सबै प्रधानाध्यापकको एक मत रहेकाले विद्यालय बन्द नगर्ने निर्णय भएको कुश्मा नगरपालिकाको नगर शिक्षा शाखाका प्रमुख विष्णुप्रसाद तिवारीले बताए । कोरोनाको नयाँ भेरिएन्टको संक्रमण अन्य जिल्लामा बढ्दो देखिए पनि कुश्मा नगरक्षेत्रमा बन्द गर्नुपर्ने अवस्था नदेखिएको उनले बताए । ‘हाल सामान्य अवस्था छ’, उनले भने, ‘यस्तोमा पढाइ प्रभावित नपार्न सबै प्रअ सहमत छन् । संक्रमणको अवस्था बढेमा बन्दको निर्णय गरिने छ ।’

त्यस्तै फलेबास नगरपालिकाले पनि शनिबार कार्यपालिकाको बैठक राखेर विद्यालय बन्द गर्ने, नगर्ने विषयमा छलफल गरेको प्रमुख प्रशासकीय अधिकृत कृष्णप्रसाद श्रेष्ठले बताए । उनका अनुसार माध्यमिक तहका विद्यालय बन्द गर्नुपर्ने भएमा सम्बन्धित वडा कार्यालयसँग समन्वय गर्ने निर्णय भएको छ । ‘जुन वडामा समस्या हुन्छ सोही वडा कार्यालयसँग समन्वय गरेर बन्द गर्ने गरी निर्णय भएको छ,’ श्रेष्ठले भने, ‘अहिले पहिले जस्तो सबै विद्यालय बन्द गर्नुपर्ने भन्ने छैन । संक्रमणको जोखिम हुने वडामा मात्रै सोही वडाध्यक्षको अध्यक्षतामा बैठक बसेर निर्णय हुन्छ ।’

जलजलाका प्रमुख प्रशासकीय अधिकृत राजेन्द्रबहादुर क्षत्रीका अनुसार पालिकाभित्रका सबै विद्यालयले नियमित कक्षा सञ्चालन गर्न सहमति जनाइसकेका छन् । ‘सोमबार पालिकाले सबै प्रअलाई बोलाएर निर्णय गर्ने तयारी गरेको छ,’ उनले भने, ‘हामीले कसैलाई पनि बन्द गर्न भनेका छैनौं । उहाँहरू पनि बन्द गर्ने पक्षमा हुनुहुन्न ।’ गत वर्ष लामो समय लकडाउन भएका कारण विद्यालय बन्द हुँदा पठनपाठन प्रभावित भएकाले यस वर्ष जसरी पनि कोर्स सक्ने तयारीमा विद्यालय छन् । बिहादी, पैयुँ, महाशिला र मोदी गाउँपालिकाका विद्यालयमा पनि नियमित रूपमा पठनपाठन भइरहेका त्यहाँका अधिकारीहरूले बताए ।

जिल्ला प्रशासन कार्यालयले भने यसअघि नै सूचना निकालेर बढीमा २५ जनाभन्दा बढी भेला हुन नपाउने गरी निर्देशन दिइसकेको छ । प्रशासनको आदेशले सार्वजनिक स्थानमा मान्छे भेला भएर हूलमूल गर्नेलाई मात्रै प्रभावित पार्ने भएकाले विद्यालयमा सामाजिक दूरी कायम गरेर अध्यापन गर्दा त्यसको प्रभाव नपर्ने सरोकारवाला बताउँछन् ।

अभिभावकहरू भने विद्यालय जाने १२ वर्षमुनिका बालबालिकाले खोप नलगाएका कारण सबैभन्दा जोखिम क्षेत्र विद्यालय नै रहेको बताउँदै आएका छन् । सरकार र स्थानीय प्रशासनले विज्ञहरूकै सुझावअनुसार विद्यालय बन्द गर्न भनेकाले विज्ञले दिएको सुझाव गलत नहुने अभिभावकहरूको प्रतिक्रिया छ ।

प्रकाशित : माघ ४, २०७८ १०:५८
पूरा पढ्नुहोस्
प्रतिक्रिया
पठाउनुहोस्
×