नोबेलका विद्यार्थी अनशनमा- समाचार - कान्तिपुर समाचार

नोबेलका विद्यार्थी अनशनमा

कान्तिपुर संवाददाता

मोरङ — नोबेल मेडिकल कलेज विराटनगरले अतिरिक्त शुल्क नबुझाउने एमबीबीएसमा भर्ना भएका नयाँ विद्यार्थीलाई कलेज प्रवेशमा रोक लगाएको विरोधमा पीडित विद्यार्थीले आन्दोलन जारी राखेका छन् ।


उनीहरूले आइतबार कलेजको प्रवेश द्वारमा अनशन बसेर नाराबाजी गरेका थिए । विद्यार्थीको विरोधले अस्पतालको सेवा प्रभावित भएको थियो । आन्दोलनलाई लक्षित गरी स्थानीय प्रशासनले कलेजमा सुरक्षा व्यवस्था कडा पारेको थियो ।

कलेज सञ्चालक सुनील शर्माका दाइ खगेन्द्रप्रसाद न्यौपाने, कलेज प्रबन्धक नारायण दाहाल र कलेजका अन्तर्राष्ट्रिय निर्देशक तथा होस्टल सञ्चालक निरञ्जन यादवले चार जना अभिभावकलाई विद्यार्थीको भविष्य बिग्रिने भन्दै शनिबार राति पाँचबुँदे सम्झौता गराएका थिए । सम्झौतामा कलेजले लिने अतिरिक्त शुल्क विद्यार्थीले तिर्नुपर्ने, पढाइ अवधिभरि कुनै किसिमको राजनीतिक गतिविधि गरेर निष्कासन गरे कलेजले लिएको शुल्क फिर्ता नगर्ने सर्त उल्लेख छ ।

यस्तै विद्यार्थीको कुनै कारणले मृत्यु भएको अवस्थामा कलेजमा बुझाएको शुल्क फिर्ता नहुने र पढाइ छोडेर जानेले पढाइ अवधिको शुल्क बुझाउनुपर्ने सम्झौतामा भनिएको छ । विद्यार्थीले गर्दै आएको आन्दोलनका कारण कलेजले असुल्दै आएको छात्रावासको मासिक १२ हजार शुल्कमध्ये २ हजार छुट दिने उल्लेख छ ।

सम्झौतापत्रमा हस्ताक्षर गर्ने अभिभावकमा वीरेन्द्रकुमार यादव, राजेन्द्रबहादुर थापा, प्रकाश फुयाल र रामकुमार भट्टराई छन् । कलेज प्रशासनले उनीहरूलाई आन्दोलनरत अन्य विद्यार्थी र अभिभावकका साथै आन्दोलनमा सहयोग गरेका विद्यार्थी संगठनहरूसँग समेत कुनै समन्वय गर्न नदिई दबाब र प्रभावमा पारेर सम्झौतापत्रमा हस्ताक्षर गर्न लगाएको पीडित विद्यार्थीले गुनासो पोखे ।

कलेज प्रशासनले उक्त सहमति नै आन्दोलनरत सम्पूर्ण विद्यार्थी र विद्यार्थी संगठनलाई मान्य हुने भन्दै चर्को प्रचार गरेको विरोधमा समेत विद्यार्थीले नाराबाजी गरेका थिए । पीडित विद्यार्थीको आन्दोलनमा सहयोग गर्दै आएका नेपाल विद्यार्थी संघ, अनेरास्ववियु, अखिल क्रान्तिकारी, एकीकृत समाजवादीनिकट अनेरास्ववियु, समाजवादी विद्यार्थी युनियन र चिकित्सा शिक्षा विद्यार्थी आन्दोलन संघर्ष अभियानले संयुक्त विज्ञप्ति जारी गरी विद्यार्थीविरोधी सम्झौता मान्य नहुने र आन्दोलनलाई निरन्तरता दिने घोषणा गरेका छन् ।

विद्यार्थी संगठनहरूले ऐन–कानुन नमान्ने कलेज सञ्चालक शर्मालाई पक्राउ गरी कारबाही गर्न विज्ञप्तिमार्फत माग गरेका छन् । विज्ञप्तिमा चिकित्सा शिक्षा आयोगले तोकेभन्दा एक रुपैयाँ पनि बढी विद्यार्थीसँग असुल्न नपाउने र छात्रावास ऐच्छिक हुनुपर्ने माग गरिएको छ । कलेजले चिकित्सा शिक्षा आयोगले तोकेभन्दा विपरीत पठनपाठन सुरु नै नगरी ४ लाख ८२ हजार अतिरिक्त शुल्क बुझाउन दबाब दिएपछि अभिभावक तथा विद्यार्थीले प्रदेश १ का मुख्यमन्त्री, मन्त्रीदेखि जिल्ला प्रशासनमा ज्ञापनपत्र बुझाएर न्यायका लागि संघर्ष गर्दै आएका छन् । तर, कतैबाट कुनै सुनुवाइ भएको छैन ।

चिकित्सा शिक्षा आयोगले एमबीबीएस अध्ययनका लागि कुल ४४ लाख ३६ हजार २५ रुपैयाँ शुल्क निर्धारण गरेको छ । त्यसमध्ये प्रथम वर्षको १४ लाख ८५ हजार अभिभावकले बुझाइसकेका छन् । कलेज सञ्चालक शर्माले भने अतिरिक्त २० लाख शुल्क बुझाउने सम्झौतापत्रमा हस्ताक्षर गराएपछि मात्रै पढाइ थाल्ने अडान लिएपछि विद्यार्थी आन्दोलित छन् ।

प्रकाशित : माघ ३, २०७८ ०८:५९
प्रतिक्रिया
पठाउनुहोस्

मुख्य नाकामै जनशक्ति अभाव

बिहान ७ देखि १२ बजेसम्म २ सय १ जनाको एन्टिजेन परीक्षण गर्दा १२ जनामा कोरोना पोजिटिभ
भूषण यादव

वीरगन्ज — कोरोना परीक्षणका लागि मुख्य नाकामा स्थापना गरिएको हेल्थ डेस्कमा स्वास्थ्यकर्मीको अभाव देखिएको छ । जनशक्ति अभावमा मध्याह्न दुईदेखि तीन घण्टा भारतबाट नेपाल भित्रिने प्रवेश बिन्दुमा एन्टिजेन परीक्षण प्रभावित हुने गरेको पाइएको हो । 

आइतबार मध्याह्न १ बजेको समयमा वीरगन्ज–रक्सौल नाका पुग्दा नेपाल भित्रिने कसैको पनि एन्टिजेन परीक्षण गरिएको थिएन । भारतको रक्सौल हुँदै निर्बाध रूपले यात्रु वीरगन्ज भित्रिरहेका थिए । करिब एक घण्टा मुख्य नाकामा हुँदा एक जना यात्रुको पनि परीक्षण भएको देखिएन् । त्यस अवधिमा करिब एक दर्जन निजी भारतीय गाडी रिजर्ब गरेर भारतीयहरू वीरगन्ज भित्रिएका थिए । यसको अलावा दर्जनौं टेम्पो, इरिक्सा, टाँगालगायत सवारीसाधनमा यात्रुहरू भारतबाट वीरगन्ज भित्रिएका थिए ।

नाकामा तैनाथ नेपाल प्रहरी र सशस्त्र प्रहरीका जवानले यात्रुले बोकेका सामान मात्र चेकजाँच गरेका थिए । नेपाल भित्रिनेलाई रोकेर किन हेल्थ डेस्कमा परीक्षण गर्न नपठाएको प्रश्नमा एक सुरक्षाकर्मीले भने, ‘अहिले सिफ्ट चेन्ज भएको समय हो, दैनिक यो समयमा एन्टीजेन परीक्षण हुँदैन ।’

सुरक्षाकर्मीका अनुसार यसरी सिफ्ट परिवर्तन हुँदा दैनिक कम्तीमा २ घण्टा परीक्षण प्रभावित हुने गरेको छ । २ बजेको समयमा हेल्थ डेस्कमा पुग्दा दुई जना स्वास्थ्यकर्मी रजिस्टरमा केही लेखिरहेका थिए । ‘बिहान ७ बजेदेखि १२ बजेसम्म गरिएको परीक्षणको विवरण विभागमा अनलाइन इन्ट्री गर्नुपर्छ,’ हेल्थ डेस्कमा कार्यरत एचए ओमप्रकाशकुमार साहले भने, ‘इन्ट्रीको काम सकेपछि एन्टिजेन परीक्षण गर्छौं । साहका अनुसार विभागको अनलाइन एपमा एक जनाको विवरण इन्ट्री गर्न कम्तीमा ५ मिनेट लाग्ने गरेको छ ।’

बिहान ७ बजेदेखि १२ बजेसम्म २ सय एक जनाको एन्टिजेन परीक्षण गर्दा १२ जनामा कोरोना पोजिटिभ देखिएको उनले जनाए । जसमध्ये १० जना संक्रमित भारतीय र दुई जना नेपाली थिए । यसैगरी नाकामा शनिबार फेला परेका १७ संक्रमितमध्ये १३ जना भारतीय थिए । शुक्रबार १८ जनामा संक्रमण देखिएको थियो । पछिल्लो समय भारतको विभिन्न राज्यमा कोरोनाको नयाँ भेरिएन्ट ‘ओमिक्रोन’ फैलिएको छ । संक्रमण फैलिन नदिन भारतमा कडाइ थालिएको छ ।

खुला सीमाका कारण नेपाल र भारतबीच निर्बाध आवतजावत हुने गरेको छ । नेपालमा कोरोना संक्रमण नियन्त्रणका लागि नाकामै परीक्षण गरी संक्रमितलाई आइसोलेसनमा राख्ने उद्देश्यले हेल्थ डेस्क स्थापना भएको हो । जनशक्ति अभावमा नाकामा एन्टीजेन परीक्षणमा लापरबाही देखिएको छ । ‘जिल्ला प्रशासन कार्यालय पर्सामा एन्टिजेन परीक्षण गर्न जानुपरेकाले केही स्वास्थ्यकर्मी उता जानुभएको छ,’ साहले भने, ‘उहाँहरू आउनेबित्तिकै परीक्षण सुरु हुन्छ ।’

व्यस्त नाकामा सीमित जनशक्तिले सबैको परीक्षण सम्भव नरहेको उनले सुनाए । हेल्थ डेस्कमा १२ जना स्वास्थ्यकर्मी खटाइएका छन् । ‘६/६ जनाको समूहमा दुई सिफ्टमा काम गर्छौं,’ साहले भने, ‘जसमध्ये दुई जना स्वास्थ्यकर्मी कोरोना संक्रमित भइसकेका छन् ।’ फितलो व्यवस्थापनका कारण काम गर्न समस्या परेको स्वास्थ्यकर्मीले गुनासो गरेका छन् । ‘घरबाट एकैचोटि खाना खाएर आउँछौँ,’ नाम उल्लेख नगर्ने सर्तमा एक स्वास्थ्यकर्मीले भने, ‘यहाँ न त पानीको व्यवस्था छ न त नास्ताकै । पुस माघको चिसोमा खुला टेन्टभित्र काम गर्नुपर्ने बाध्यता छ ।’ अहिलेसम्म जोखिम भत्तासमेत पाएको छैन ।

सुरुसुरुमा गैरसरकारी संस्थाले केही सहयोग जुटाए पनि हाल उनीहरू पनि हेल्थ डेस्कमा नआएको उनले सुनाए । हेल्थ डेस्क प्रमुख डा.अनिसा महतोले फितलो व्यवस्थापन रहेको बताइन् । ‘नेपाल भित्रिने नाकामा संक्रमितको संख्या बढ्दो छ,’ उनले भनिन्, ‘वीरगन्ज नाका ठूलो छ, सबैको परीक्षण गर्न सकिएको छैन ।’ नाकामा हाल दैनिक करिब ५ सय जनाको एन्टिजेन परीक्षण हुँदै आएको छ । ‘परीक्षण गरिएको विवरण अनलाइन इन्ट्री नगरुन्जेल नाकामा काम नै नभएको देखिन्छ,’ उनले भनिन्, ‘डाटा इन्ट्रीका लागि एक जना कम्प्युटर अपरेटर भइदिएको भए हामी टेस्टिङ मात्र गर्थ्यौं ।’

नाकामा तैनाथ सुरक्षाकर्मीका अनुसार दैनिक करिब दुई हजार जना रक्सौल हुँदै वीरगन्जतर्फ आउने गरेका छन् । जिल्ला कोभिड १९ संकट व्यवस्थापन केन्द्रको पुस २७ को बैठकले भारतबाट नेपाल भित्रिने प्रवेश बिन्दुमा अनिवार्य रूपमा एन्टिजेन परीक्षण गर्ने र कोरोना पोजिटिभ देखिएमा स्वास्थ्य सुरक्षा मापदण्ड पालना गर्ने गराउने गरी सुरक्षित साथ गन्तव्य स्थानमा पुग्न सहजीकरण गर्ने निर्णय गरेको थियो ।

वीरगन्ज बाहिरका व्यक्ति नाकामा पोजिटिभ फेला पर्दा उनीहरूलाई गन्तव्यसम्म पुगाउन समस्या देखिएको डा.अनिसाले बताइन् । ‘वीरगन्ज आसपासका संक्रमित फेला पर्दा समन्वय गरी पठाउँदै आएका छौँ,’ उनले भनिन्, ‘तर, बाहिरका सबैले निजी गाडी भाडा गरेर जान सक्दैनन्, उनीहरूलाई कसरी गन्तव्यसम्म पुगाउनबारे कुनै निर्देशन आएको छैन् ।’

प्रमुख जिल्ला अधिकारी उमेशकुमार ढकालले नाकामा सञ्चालन रहेको हेल्थ डेस्कमा जनशक्ति थप गर्ने निर्णय भइसकेको बताए । ‘हेल्थ डेस्कमा स्वास्थ्यकर्मी थप्ने निर्णय भएको छ,’ कान्तिपुरसँग ढकालले भने, ‘नाकामा निरन्तर परीक्षण आवश्यक छ ।’

प्रकाशित : माघ ३, २०७८ ०८:५७
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×