थारु समुदायमा माघीको हर्षोल्लास- समाचार - कान्तिपुर समाचार
कान्तिपुर वेबसाईट
AdvertisementAdvertisement

थारु समुदायमा माघीको हर्षोल्लास

कान्तिपुर संवाददाता

काठमाडौँ — थारु समुदायको प्रमुख पर्वमध्ये एक मानिने माघी अर्थात् नयाँ वर्ष धुमधामसाथ मनाइएको छ । थारु समुदायले हरेक वर्ष माघ १ गतेको दिनलाई नयाँ वर्षको रुपमा मनाउने गर्छन् ।

यस वर्ष पनि उनीहरूले नदीमा स्नान गर्नुका साथै खानपिन र रमाइलो गरेर माघी पर्व मनाइरहेका छन् । साथै यस अवसरमा दान गर्ने पनि प्रचलन छ ।

देशका विभिन्न सहरमा ससाना समूह मिलेर शुभकामना आदानप्रदान गरेर थारु समुदायले माघी पर्व मनाइरहेका छन् । सूर्य उत्तरायण प्रवेश गर्ने दिन माघ १ गते थारु समुदायको नयाँ वर्ष अर्थात् माघी पर्व पर्छ ।

यस पर्वलाई ठाउँअनुसार विभिन्न नाम पनि दिने गरिएको छ । माघ १ गतदेखि पाँच दिनसम्म धुमधामसाथ तराई क्षेत्रमा यो पर्व मनाइन्छ । माघ १ गते बिहानै जलाशयमा गई स्नान, पूजा गरी ठूला-बडाकहाँ गएर आशीर्वाद लिने परम्परा थारु समुदायमा छ ।

बेलुका आगनमा मुढा बालेर धुनी जगाइन्छ । र धुनीको चारैतिर घरपरिवार र पाहुना बसेर खानपीन गरिन्छ । यस समुदायमा माघ १ देखि ५ दिनसम्म आफू स्वतन्त्र भएको अनुभव गर्ने बताइन्छ ।

साथै सक्नेहरू चार धाम जाने र नसक्नेहरूले नजिकको तीर्थस्थलमा गई गच्छेअनुसार दान गर्ने चलन छ । यस्तै कुनै कारणले श्राद्ध कर्म रोकिएकाले यसै दिन श्राद्ध गर्दा कर्म पूर्ण हुने पनि जनविश्वास छ ।

माघीका दिन अधिकांश स्थानमा आपसी सहमतिबाट एक वर्षका लागि मुखियालगायत वर्षभर काम गर्ने पदको छनोट गर्ने चलन थारु समुदायमा छ । थारु समुदायमा यस दिन गरिएको सहमति एक वर्षका लागि अकाट्य हुने मानिन्छ । जुन बीचमा फेरबदल हुँदैन । यस प्रथालाई माघी देवानी भनिन्छ ।

विशेषगरी तराईका थारु समुदायले चामल र मासको दालबाट बनाइएको खिचडी खाने हुनाले यस चाडलाई खिचडी भन्ने चलन पनि छ । थारु समुदायका मानिसले माघीका दिन खानका लागि पुसकै दिन अनदी चामलको जाँड बनाएर राख्ने गर्छन् ।

सरकारले विसं २०७२ साउन २ गते निर्णय गरेर कमैया प्रथा उन्मूलन गरी त्यसै वर्ष माघ १ गतेदेखि कार्यान्वयनमा ल्याएपछि यस पर्वलाई थारु समुदायमा स्वतन्त्रता दिवसको रुपमा समेत मनाइन्छ ।

प्रकाशित : माघ १, २०७८ १८:२८
प्रतिक्रिया
पठाउनुहोस्

फागुन १६ भित्र एनआरएनएको निर्वाचन गर्न उच्चस्तरीय समिति गठन

कान्तिपुर संवाददाता

काठमाडौँ — गैर आवासीय नेपाली संघ (एनआरएनए)ले आगामी फागुन १६ गते (फेब्रुअरी २८) भित्र एनआरएनको निर्वाचन गर्न उच्चस्तरीय समिति गठन गरेको छ ।

एनआरएनको परिषद् सदस्यको विवाद लिएर निर्वाचन हुन नसकेपछि एनआरएनको ८१ औं केन्द्रीय बैठकले शनिबार संरक्षक शेष घलेको संयोजकत्वमा समिति बनाएको प्रवक्ता डिबी क्षेत्रीले जानकारी दिए । उनका अनुसार समिति सदस्यहरुमा संस्थापक अध्यक्ष उपेन्द्र महतो, पूर्वअध्यक्षहरु जीवा लामिछाने, देवमान हिराचन, भवन भट्ट, रामप्रताप थापा र अध्यक्ष कुमार पन्त रहेका छन् ।

‘समितिलाई निस्पक्ष ढंगले संघको दसौं महाधिवेशन तथा आईसीसी निर्वाचनसम्बन्धी काम सम्पन्न गर्न जिम्मेवारी दिइएको छ’, प्रवक्ता क्षेत्रीले भने । समितिले महाधिवेशन प्रतिनिधिहरुको अन्तिम नामावली संघको विधान र नियमावलीअन्तर्गत रहेर २६ जनवरीसम्म अन्तर्राष्ट्रिय समन्वय परिषद्‌का अध्यक्षमार्फत निर्वाचन समितिलाई उपलब्ध गराउने छ ।

समितिले आवश्यक ठानेमा कानुनी, आइटी लगायतका विशेषज्ञहरु रहेको स्वतन्त्र समितिहरु गठन गर्न सक्नेछ । एनआरएनको महाधिवेशन गत अक्टोबरमा नै तोकिएको थियो ।

१० औं महाधिवेशनको लागि बद्री केसी, रविना थापा र कुल आर्चायले नेतृत्वको लागि दाबी गरेका छन् ।

प्रकाशित : माघ १, २०७८ १८:२२
पूरा पढ्नुहोस्
प्रतिक्रिया
पठाउनुहोस्
×