रुबी भ्याली पहिरोमा ३ जना बेपत्ता : उद्धारका लागि हेलिकप्टर पठाइँदै [अपडेट]
काठमाडौँ — धादिङको रुबी भ्यालीमा बिहीबार बिहान बाटो खन्ने क्रममा पहिरो जाँदा एक्स्काभेटरसहित ३ जना पुरिएका छन् । बिहान रुबी भ्याली गाउँपालिका वडा नम्बर १-पुरूमा सुख्खा पहिरो जाँदा एक्स्काभेटर चालक, सहयोगी र १ जना स्थानीय पुरिएको धादिङ प्रहरीले जनाएको छ ।
जिल्ला प्रहरी कार्यालय धादिङका प्रमुख एसपी राकेश सिंहका अनुसार पहिरोमा पुरिनेमा चालक आकाश तामाङ, सहचालक राजु तामाङ र स्थानीय अनिश तामाङ रहेका छन् । चालक र सहचालक काभ्रेका स्थायी बासिन्दा भएको जानकारी आए पनि पूरा ठेगाना नखुलेको एसपी सिंहले कान्तिपुरलाई बताए । उद्धारका लागि सेरतुङबाट प्रहरीको टोली गएको पनि उनले बताए ।
अहिले हेलिकप्टरबाट सशस्त्र प्रहरीको टोली उद्धारका लागि पठाउन लागिएको पनि उनले जानकारी दिए । 'माथिबाट ठूलो सुख्खा पहिरो गएको छ भन्ने जानकारी प्राप्त भएको छ । अहिले सशस्त्र प्रहरीका इन्सपेक्टरसाबको नेतृत्वमा हामीले हेलिकप्टर पठाउँदैछौँ । काठमाडौंबाट हेलिकप्टर आउनासाथ उद्धार टोली घटनास्थल जानेछ,' उनले भने ।
