नेपालको भौगोलिक इकाइ पृथ्वीनारायणकै अभियानको परिणाम हो : महामन्त्री थापा- समाचार - कान्तिपुर समाचार

नेपालको भौगोलिक इकाइ पृथ्वीनारायणकै अभियानको परिणाम हो : महामन्त्री थापा

कान्तिपुर संवाददाता

काठमाडौँ — कांग्रेस महामन्त्री गगन थापाले नेपालको वर्तमान भौगोलिक इकाइ पृथ्वीनारायण शाहको नेपाल एकीकरण अभियानकै परिणाम भएको बताएका छन् । ३०० औँ पृथ्वी जन्मजयन्तीको सन्दर्भमा मंगलबार महामन्त्री थापाले शाहलाई सम्झिँदै वर्तमान संविधानको जगमा अब नेपाल भित्रका सबै नेपालीलाई एकीकृत र संगठित गर्दै जाने प्रण गर्नुपर्ने बताएका छन् ।

फाइल तस्बिर

‘पृथ्वीनारायण शाहको अभियानको मुख्य उद्देश्य गोर्खा राज्यको विस्तार थियो वा नेपाल एकीकरण भन्ने सन्दर्भमा जुन कोणबाट पनि बहस गर्न सकिन्छ । तर, जे गर्न चाहेको भए तापनि त्यो अभियानले आधुनिक राज्यका लागि आवश्यक बृहत्तर भौगोलिक इकाइ दिएको कुरा कसैले इन्कार गर्न मिल्दैन,’ उनले भनेका छन्, ‘किनकी सत्य यही हो, आज हामीसँग नेपालको जुन भौगोलिक इकाइ प्राप्त छ, यो पृथ्वीनारायण शाहको अभियानको परिणाम नै हो ।’

महामन्त्री थापाले नेपाल राष्ट्र निर्माणको पहिलो चरणका निर्माणकर्ता पृथ्वीनारायण नै भएकोमा दोधार हुन नपर्ने बताएका छन् । ‘कुनै पनि राष्ट्र निर्माणका विभिन्न चरण हुन्छन्, पहिलो चरण भौगोलिक एकीकरण नै हो, भौगोलिक एकीकरण पश्चात् प्रजातान्त्रिक अधिकारहरूको विस्तार र समुन्नतिको चरण आउँछन्,’ उनले भनेका छन्, ‘यसरी हेर्दा पृथ्वीनारायण शाह निःसन्देह नेपाल राष्ट्र निर्माणको पहिलो चरणका कर्ता हुन् ।’

उनले शाहको त्यो भूमिकालाई स्वीकारे पनि उनका सन्ततिले गरेका जनघातको स्वीकारोक्ति नहुने समेत प्रष्ट्याएका छन् ।

प्रकाशित : पुस २७, २०७८ १८:२१
प्रतिक्रिया
पठाउनुहोस्

एमाले दार्चुलाको अध्यक्षमा प्रेमसिंह धामी निर्वाचित

कान्तिपुर संवाददाता

काठमाडौँ — नेकपा (एमाले) दार्चुला जिल्ला कमिटी अध्यक्षमा प्रेमसिंह धामी निर्वाचित भएका छन् । नौगाड गाउँपालिकाका अध्यक्षसमेत रहेका धामीले ५ सय ८८ मत ल्याएर विजयी भएका हुन् । 

सोमबार राति भएको मतदानको मतगणना मंगलबार भएको थियो । ७ सय ५ मत खसेकोमा धामीले ५ सय ८८ मत प्राप्त गरे भने उनका प्रतिस्पर्धी ज्ञानेन्द्र घर्तिले ९२ मत प्राप्त गरेका थिए ।

जिल्ला कमिटी उपाध्यक्षमा चरनसिंह बुढाथोकी निर्विरोध निर्वाचित भएका थिए । सचिवमा शेरसिंह धामीले ४ सय २२ मत ल्याएर विजयी भएका छन् । दुई उपसचिवमा खडकसिंह बडाल र चन्द्रादेवी कुँवर विजयी भए । बडालले ३ सय ८४ मत र कुँवरले २ सय ७३ मत ल्याएका थिए ।

अध्यक्षमा निर्वाचित धामीले २०७४ सालको चुनावअघि माओवादी परित्याग गरी एमालेमा प्रवेश गरेका थिए । माओवादी परित्याग गरेपछि उनले एमालेबाट नौगाड गाउँपालिका अध्यक्षमा जितेका थिए । अध्यक्षमा पराजित घर्ती भने एमालेका जिल्ला कमिटीका निवर्तमान सचिव हुन् ।

प्रतिनिधिसभा विघटनपछि एमालेको केन्द्रीय तहमा चलेको विवादका क्रममा उनी माधवकुमार नेपाल पक्षमा खुलेका थिए । भीम रावललगायत नेताहरू एमालेमै फर्किएपछि उनी पनि एमालेमै बसेका थिए ।

जिल्ला नेतृत्व चयनका लागि सर्वसम्मतिको पहल भएको थियो । पुस २४ गते जिल्ल अधिवेशन उद्घाटनपछि तीन दिनसम्म पनि सर्वसम्मत नेतृत्व चयन सफल हुन नसकेपछि निर्वाचन भएको थियो ।

प्रकाशित : पुस २७, २०७८ १८:२०
पूरा पढ्नुहोस्
प्रतिक्रिया
पठाउनुहोस्
×