शिक्षामन्त्री पौडेलको कोरोना रिपोर्ट 'निगेटिभ', श्रीमतीको 'पोजिटिभ'*

आइतबार एन्टीजेन परीक्षणमा नेगेटिभ नतिजा आएपछि सोमबार बिहान आरटी-पीसीआर परीक्षण गर्दा त्यसको नतिजा पोजेटिभ आएको मन्त्री पौडेलका प्रेस संयोजक बिमल खड्काले सुरुमा जानकारी दिएका थिए। उनको भनाइका आधारमा समाचार तयार पारिए पनि पछि प्रयोगशालाबाट भने उनको रिपोर्ट निगेटिभ आएको छ।

मन्त्रीका नजिकका सहयोगी राजन पौडेलका अनुसार सुरुमा उनको रिपोर्टमा 'रिपिट' लेखेर आएपछि सबैले पोजिटिभ नै भएका ठानेर सोही सूचना बाहिर सार्वजनिक गरेका थिए । तर पछि नमुनाको पुन: परीक्षण गर्दा रिपोर्ट निगेटिभ रहेको देखिएको छ ।

एक सरकारी अस्पतालको पीसीआर प्रयोगशालामा कार्यरत चिकित्सकका अनुसार कसैलाई कोरोनासँग मिल्दोझुल्दो लक्षण छ तर रिपोर्ट निगेटिभ आउँछ भने त्यसलाई 'फल्स निगेटिभ' मान्नुपर्छ । 'पीसीआर परीक्षणका लागि स्वाब लिँदा वा परीक्षणका अन्य प्रक्रियाहरुमा केही तलमाथि पर्दा पनि फल्स रिपोर्ट आउन सक्छ,' उनले भने, 'लक्षण छ तर रिपोर्ट निगेटिभ छ भने त्यसलाई पोजिटिभ नै मानेर आइसोलेसनमा सतर्क भएर बसे राम्रो हुन्छ ।'

मन्त्री पौडेलकी श्रीमती तथा नेकपा (माओवादी केन्द्र)की केन्द्रीय सदस्य बलावती शर्मामा भने कोरोना संक्रमण पुष्टि भएको छ । मन्त्री दम्पत्ति नै आइसोलेसनमा रहेको बेला श्रीमानको रिपोर्ट निगेटिभ र श्रीमतीको पोजिटिभ आएको हो ।

यसअघि माओवादी केन्द्रका अध्यक्ष पुष्पकमल दाहाल, नेता नारायणकाजी श्रेष्ठ, मातृका यादवलगायतका दाहालको सचिवालय र केन्द्रीय कार्यालयका अधिकांश कर्मचारीलाई संक्रमण पुष्टि भएको थियो । दाहालको कन्ट्याक्ट ट्रेसिङमा प्रधानमन्त्री शेरबहादुर देउवा, मन्त्रीहरू र विभिन्न दलका शीर्ष नेताहरू समेत परेका थिए ।

कोरोना संक्रमण पुष्टि हुनुअघि शुक्रबार बिहान दाहाल उच्चस्तरीय राजनीतिक समन्वय समितिको बैठकमा सहभागी थिए ।

^{*सच्याइएको : यसअघि मन्त्री पौडेलका प्रेस संयोजकले दिएको जानकारी अनुसार उनलाई कोरोना संक्रमण देखिएको पुष्टि भएको समाचार प्रकाशित भएपनि हाल प्रयोगशालाले संक्रमण पुष्टि नभएको रिपोर्ट दिएको जानकारी प्राप्त भएपछि सच्याइएको छ।}