झारफुकको क्रममा किशोरीको मृत्यु, माता भनिने झाँक्री पक्राउ- समाचार - कान्तिपुर समाचार
कान्तिपुर वेबसाईट
AdvertisementAdvertisement

झारफुकको क्रममा किशोरीको मृत्यु, माता भनिने झाँक्री पक्राउ

कान्तिपुर संवाददाता

काठमाडौँ — काठमाडौं नागार्जुन नगरपालिका–१ रानीवन पानीट्याङ्कीस्थित उपचार गराउन भन्दै झारफुकका लागि राखिएकी १४ वर्षीया किशोरीको मृत्यु भएको छ ।

सिन्धुपाल्चोक चौतारा नगरपालिका–२ बतासे घर भई मध्यपुर थिमि मगरगाउँ बस्ने १४ वर्षीया रोशनी श्रेष्ठको शनिबार बिहान मृत्यु भएको काठमाडौं प्रहरी प्रवक्ता एसपी दिनेशराज मैनालीले जानकारी दिए ।

किशोरीको मृत्युपछि झारफुक संचालक माता भनिने ४८ वर्षीया उमा शाही ठकुरीलाई महानगरीय प्रहरी वृत्त स्वयम्भूले पक्राउ गरेको छ । मृतक किशोरीको शरीरमा निलडामहरू देखिएको प्रहरीको भनाइ छ ।

ती किशोरीलाई टाउको दुख्ने समस्या भएपछि कथित माताकहाँ पुर्‍याएको पारिवारिक श्रोतले जनाएको छ । माता भनिने ठकुरीले धेरै बिरामीहरूलाई 'ठीक पारेको' भन्ने विश्वासमा झारफुक केन्द्रमा ती किशोरीलाई २१ दिनअघि नै आमा राधिका श्रेष्ठले लगेकी थिइन् ।

‘यहीँ बसेर उपचार गराउँदा चट्टै ठीक हुन्छ, तपाईंकी छोरी मेरै छोरी सरह हो, छोडेर जानुस् भनिन्,’ मृतक किशोरीका आमा राधिकाले भनिन्, ‘छोडेर आएँ । कुटेरै मारी ।’

परिवारका अनुसार गणेश मावि नगदेश कक्षा ६ मा अध्ययनरत रोशनीको पुस २२ गतेदेखि आन्तरिक परीक्षा थियो । परीक्षा दिनका लागि भन्दै उनकी आमा राधिका झारफुक केन्द्रमा लिन गइन् । तर, माता भनिने ठकुरीले परीक्षाभन्दा ठूलो कुरा स्वास्थ्य भएको भन्दै पठाउन मानिनन् । ‘छोरीले परीक्षा दिने ममी जान्छु भन्दै थिइ, उनले आउन दिइनन्,’ उनले भनिन् ।

शनिबार बिहान रोशनी बेहोस भएको जानकारी परिवारलाई गराइएको थियो । परिवार नागार्जुन पुगेपछि मात्र किशोरीलाई मनमोहन मेमोरियल अस्पताल सीतापाइला पुर्‍याइएको थियो । अस्पतालमा पुर्‍याउँदा चिकित्सकले मृत्यु भइसकेको जानकारी गराएको प्रहरी वृत्त स्वयम्भू प्रमुख डीएसपी मिलन केसीले बताए ।

माता भनिने ठकुरीलाई कर्तव्य ज्यान कसुरमा जिल्ला अदालत काठमाडौंबाट ५ दिनको लागि म्याद थप गरी अनुसन्धान थालेको प्रहरीले जनाएको छ । मृतक किशोरीको शव शिक्षण अस्पताल महाराजगञ्जमा राखिएको छ । मृतकको पोष्टमार्टम भइसकेको तर रिपार्ट आइनसकेको प्रहरीले जनाएको छ ।

प्रकाशित : पुस २५, २०७८ २०:२७
प्रतिक्रिया
पठाउनुहोस्

सञ्चार प्रतिष्ठान खारेज गर्ने प्रदेश १ सरकारको सक्कल निर्णय झिकाउन अदालतको आदेश

कान्तिपुर संवाददाता

मोरङ — उच्च अदालत विराटनगरले प्रदेश १ सरकारको प्रादेशिक सञ्चार प्रतिष्ठान खारेज गर्ने निर्णयकव सक्कल प्रति झिकाउन आदेश दिएको छ । उच्च अदालत विराटनगरका न्यायाधीशद्वय तेजनारायणसिंह राई र किरणकुमारी गुप्ताको संयुक्त इजलासले आइतबार उक्त आदेश दिँदै उक्त मुद्दासम्बन्धि अर्को पेसी पुस २७ गतेका लागि तोकेको छ ।

उच्च अदालतले प्रदेश १ को मन्त्रिपरिषद्‍ले सञ्चार प्रतिष्ठानका कार्यकारी निर्देशक यज्ञ शर्मालाई बर्खास्त नगरी यथास्थितिमा राख्ने उच्च अदालतको पुस १४ गतेको निर्णयलाई समेत पुस २७ गतेसम्मका लागि निरन्तरता दिन आदेश दिएको छ ।

प्रतिष्ठानका निर्देशकलाई सरकारले बर्खास्त गरेको थियो भने प्रादेशिक सञ्चार प्रतिष्ठान पनि खारेज गरेको थियो । प्रदेश १ मन्त्रिपरिषद्को उक्त निर्णयविरुद्ध शर्मा अदालत पुगेका थिए । उनलाई बर्खास्त गर्ने निर्णय कार्यान्वयन नगरी यथास्थितिमा राख्न उच्च अदालत विराटनगरका न्यायाधीश सत्यमोहन जोशी थारुको एकल इजलासले पुस १४ गते मुख्यमन्त्री तथा मन्त्रिपरिषद्‍को नाममा आदेश दिएको थियो ।

तत्कालीन मुख्यमन्त्री शेरधन राई नेतृत्वको सरकारले गठन गरेको प्रतिष्ठान मुख्यमन्त्री राजेन्द्र राई नेतृत्वको मन्त्रिपरिषद्‍को मंसिर ९ गतेको बैठकले खारेज गर्ने निर्णय गरेको थियो ।

मन्त्रिपरिषद्‍को २०७७ साल पुस ६ गतेको निर्णयले शर्मालाई चार वर्षका लागि प्रतिष्ठानको कार्यकारी निर्देशकमा नियुक्त गरेको थियो । मुख्यमन्त्री राई नेतृत्वको मन्त्रिपरिषद्‍ले प्रदेश पर्यटन बोर्ड खारेज गर्ने निर्णयमा पनि उच्च अदालत विराटनगरले कारण देखाऊ आदेश जारी गरेको छ । अदालतले प्रदेश पर्यटन बोर्ड खारेज गर्ने निर्णय कार्यान्वयन नगरी यथास्थितिमा राख्नसमेत आदेश दिइसकेको छ ।

यससँगै मुख्यमन्त्री राई नेतृत्वको सरकारको पहिलो निर्णय कार्यान्वयनमा नै अदालतले रोक लगाएको छ । मुख्यमन्त्री राई नेतृत्वको सरकारले तत्कालीन मुख्यमन्त्री भीम आचार्य नेतृत्वको सरकारले गरेको असंवैधानिक नियुक्ति खारेज गर्ने र मंसिर ९ गतेको दोस्रो बैठकले बोर्ड खारेज गर्ने निर्णय गरे पनि कार्यान्वयन हुन सकेको छैन ।

प्रकाशित : पुस २५, २०७८ २०:२६
पूरा पढ्नुहोस्
प्रतिक्रिया
पठाउनुहोस्
x
×