तनहुँको मानहुँकोटसमेत ५० वर्षलाई दिन बतास समूहको प्रस्ताव- समाचार - कान्तिपुर समाचार
कान्तिपुर वेबसाईट
AdvertisementAdvertisement

तनहुँको मानहुँकोटसमेत ५० वर्षलाई दिन बतास समूहको प्रस्ताव

सम्झना रसाइली

तनहुँ — तनहुँको सेल्फीडाँडाका रूपमा चर्चित मानहुँकोट ५० वर्षका लागि ‘लिज’ मा लिन बतास समूहले व्यास हिल्स प्रालि खडा गरेको छ । यो कम्पनीसँग सम्झौता गर्न व्यास नगरपालिकाले अध्ययन प्रक्रिया अगाडि बढाएको छ । 

नगरपालिकाका प्रमुख प्रशासकीय अधिकृत डिल्लीराम सिग्देलले बतासको कम्पनीले यो क्षेत्रमा होटल तथा रेस्टुरेन्ट चलाउने बताए । ‘मानहुँकोटमा रेस्टुरेन्ट र होटलसहितका पूर्वाधार बनाउन व्यास हिल्स प्रालिले ५० वर्षका लागि जग्गा भाडामा दिन प्रस्ताव पेस गरेको छ,’ उनले भने, ‘यो विषयमा गण्डकी प्रदेश नीति तथा योजना आयोगसँग आवश्यक परामर्श गरी कम्पनीलाई आफ्नो प्रस्ताव थप स्पष्ट पार्न भनिएको छ ।’

बतासको कम्पनीले पाटनबाट मानहुँकोटसम्म केबलकार, जिपलाइन, ग्लास (सिसाको) पुल, होटल, रिसोर्टलगायत पूर्वाधार बनाउने तयारी गरेको छ । कम्पनीले मानहुँकोटमा ४ अर्ब रुपैयाँको लगानी गर्ने गरी प्रस्ताव पेस गरेको प्रमुख प्रशासकीय अधिकृत सिग्देलले बताए ।

कम्पनीले यो परियोजनाका लागि केही जग्गा खरिद गर्ने र केही जग्गा लिजमा दिन पनि नगरपालिकासँग प्रस्ताव गरेको छ । कम्पनीले ४० रोपनी लिजका लागि माग गरेको नगरपालिकाले जनाएको छ । मानहुँकोटमा केही निजी र केही सार्वजनिक जग्गा छ ।

सम्बन्धित समाचार

प्रकाशित : पुस २३, २०७८ ०८:३३
प्रतिक्रिया
पठाउनुहोस्

एमालेमा दुई समूहबीच प्रतिस्पर्धा

कान्तिपुर संवाददाता

ताप्लेजुङ — महाधिवेशन प्रतिनिधि छनोटमा दुईवटा समूह देखिएको यहाँ जिल्ला अधिवेशनमा पनि दुई समूहबीच प्रतिस्पर्धा हुने भएको छ । 

अध्यक्षमा भूपेन्द्र थेवे र बलबहादुर साम्साहाङ उम्मेदवार निश्चित जस्तै भए पनि अन्य सदस्यको टुंगो लगाउन भने दुवै समूहलाई हम्मे परेको छ ।

जिल्ला अधिवेशन आयोजक कमिटीका संयोजक साम्सोहाङ र सह–संयोजक थेवे समूहबीच प्रतिस्पर्धा हुने निश्चितजस्तै रहेको जिल्ला नेताहरू बताउँछन् । जिल्ला कमिटी सदस्यका अनुसार वडादेखि नै प्रतिनिधिहरू छुट्टिएर आएका छन् ।

यसअघिका सबैजसो पदाधिकारी दोहोरिन चाहेकाले पनि दुवैलाई समूह बनाउन समस्या भएको छ । साम्सोहाङ एमाले र माओवादी एकीकरण अघिका अध्यक्ष हुन् भने थेवे नेकपामा विवाद आएपछि केपी शर्मा ओलीले बनाएको समानान्तर कमिटीका अध्यक्ष हुन् ।

प्रदेश कमिटिले दुवैलाई मिलाएर अधिवेशन आयोजक कमिटीको संयोजक र सहसंयोजक बनाएको छ । साम्सोहाङलाई संयोजक, थेवेलाई सहसंयोजक र बाँकी सबै सदस्यलाई जिल्ला कमिटी सदस्यको जिम्मेवारी दिइएको छ । निर्वाचन कार्यक्रम २४ गतेलाई तोकिएको छ ।

प्रकाशित : पुस २३, २०७८ ०८:३१
पूरा पढ्नुहोस्
प्रतिक्रिया
पठाउनुहोस्
x
×