सार्कका लागि भारत अझै अनिच्छुक

राजेश मिश्र

नयाँ दिल्ली — पाकिस्तानले सार्क शिखर सम्मेलनका लागि गरेको आह्वानलाई भारतले अस्विकार गरेको छ । भारतीय विदेश मन्त्रालयले सार्क शिखर सम्मेलन गरिहाल्ने विषयमा कुनैपनि नयाँ सहमति निर्माण भइनसकेको जनाएको छ ।

पाकिस्तानका विदेशमन्त्री शाह मोहम्मद कुरैसीले गएको सोमबार १९ औं सार्क शिखर सम्मेलन गर्न पाकिस्तान तयार रहेको र त्यसका लागि सबै सदस्य राष्ट्रहरुलाइ फेरि पनि निम्ता पठाइने बताएका थिए । उनले इस्लामावाद आउन समस्या भए भारत ‘भर्चुअल’ रुपमा सहभागी हुनसक्ने सुझाव दिएका थिए । भारतकै कारण सार्क संकटमा परेको उनको आरोप थियो ।

बिहीबार नियमित मिडिया ब्रिफिङमा मन्त्रालयका प्रवक्ता अरिन्दम बागचीले सार्क सम्मेलनका लागि अनुमति दिने विषयमा कुनैपनि सहमति भइनसकेको बताए । सार्कबारे पाकिस्तानी विदशमन्त्रीको टिप्पणी मिडिया रिपोर्टबाट थाहा पाएको उल्लेख गरे । ‘सन् २०१४ पछि सार्क सम्मेलन किन हुन सकेको छैन ? तपाईंहरुलाई थाहा छ,’ मिडियाको जिज्ञासामा उनले भने ‘त्यसपछिको परिस्थितिमा कुनैपनि परिवर्तन भएको छैन । त्यसैले हामी बीच कुनै त्यस्तो सहमति भइसकेको छैन जसले सार्क बैठक गर्ने अनुमति दिन्छ ।’

प्रत्येक २ वर्षमा हुने सम्मेलन सन् २०१४ यता भएको छैन । १८ औं शिखर सम्मेलन काठमाडौंमा भएको थियो । त्यसपछि सन् २०१६ मा सम्मेलनको आयोजना गर्ने पालो पाकिस्तानको थियो । तर, पाकिस्तानसँगको शत्रुवत् सम्बन्धका कारण भारतले इस्लामावादको सार्क सम्मेलनमा सहभागी नहुने जनाएपछि सम्मेलन नै हुन पाएको छैन ।

प्रकाशित : पुस २२, २०७८ १९:५०
प्रतिक्रिया
पठाउनुहोस्

परराष्ट्रमन्त्री खड्का र भारतीय विदेशमन्त्री जयशंकरबीच टेलिफोन वार्ता

कान्तिपुर संवाददाता

काठमाडौँ — ‘भाइब्रेन्ट गुजरात ग्लोबल समिट’ स्थगित भएर प्रधानमन्त्री शेरबहादुर देउवाको भारत भ्रमण स्थगित भएकै दिन बिहीबार नेपालका परराष्ट्र मन्त्री नारायण खड्का र भारतका विदेश मन्त्री एस जयशंकरबीच टेलिफोनमा कुराकानी भएको छ ।

परराष्ट्र मन्त्रालयका एक अधिकारीका अनुसार उनीहरु बीचमा स्थगित भ्रमणका सम्बन्धमा कुराकानीदेखि द्विपक्षीय सम्बन्धका विषयमा कुराकानी भएको हो ।

देउवाले पुस २५ देखि २७ सम्म भारतको भ्रमण गर्ने कार्यतालिका थियो । तर पुस २६ देखि २८ सम्म हुन लागेको उक्त ग्लोबल समिट ओमिक्रोन संक्रमणको कारण स्थगित भएको हो ।

भारतका विदेश मन्त्री जयशंकरले ट्वीटमार्फत आफूले नेपालका परराष्ट्र मन्त्री खड्कासँग नयाँ वर्षको अवसरमा फोन गरेको प्रष्ट पारेका छन् ।

जयशंकरले धेरै विषयहरुमा प्रगति पहिचान गर्ने अवसर मिलेको पनि उल्लेख गरेका छन् । ‘हाम्रो विकास साझेदारी र कोभिड–१९ को सहकार्य उल्लेखनीय छ । हाम्रो सहयोगको दृष्यलाई फराकिलो बनाउन सहमत भएको छ,’ जयशंकरले ट्वीटमा भनेका छन् ।

परराष्ट्र मन्त्रालयका अनुसार दुई जना बीचमा नयाँ वर्षको शुभकामना आदान–प्रदानको साथै दुई पक्षीय विकास र कोभिड–१८ सम्बन्धी सहयोग लगायतका विभिन्न विषयमा छलफल भएको थियो । ‘सम्बन्धलाई थप सुदृढ बनाउने विषयमा विचार आदान–प्रदान गरेका थिए,’ मन्त्रालयले ट्वीटमार्फत जनाएको छ ।

प्रकाशित : पुस २२, २०७८ १९:३५
पूरा पढ्नुहोस्
प्रतिक्रिया
पठाउनुहोस्
×