माओवादी केन्द्रीय कार्यालयका कर्मचारीलाई कोरोना, दाहालले रोके भेटघाट- समाचार - कान्तिपुर समाचार

माओवादी केन्द्रीय कार्यालयका कर्मचारीलाई कोरोना, दाहालले रोके भेटघाट

कान्तिपुर संवाददाता

काठमाडौँ — नेकपा माओवादी केन्द्रको केन्द्रीय कार्यालयका कर्मचारीलाई कोरोना संक्रमण भएको छ । केन्द्रीय कार्यालय सचिव डोरप्रसाद उपाध्यायसहितका कर्मचारीलाई कोरोना पुष्टि भएको हो ।

कोरोना संक्रमण पुष्टि भएपछि आफूहरू आइसोलेसनमा बसेको सचिव उपाध्यायले जानकारी दिए । त्यस्तै कार्यालयका अन्य कर्मचारी यविन्द्र पराजुली, सञ्जीव थापा, विनोद थापा, अंशु थापा र शिवकुमार बस्नेतलाई संक्रमण पु्ष्टि भएको हो ।

कर्मचारीलाई संक्रमण भएपछि अध्यक्ष पुष्पकमल दाहालले भेटघाटका कार्यक्रम स्थगित गरेको उनको सचिवालयले जनाएको छ । दाहालको सचिवालयले जारी गरेको सूचनामा भनिएको छ, 'राजनीतिक कामको व्यस्तता, भीडभाड र स्वास्थ्य सतर्कताको कमीका कारण काठमाडौंलगायतका विभिन्न स्थानमा बढेको कोभिड संक्रमण तथा स्वास्थ्यकर्मीहरुको समेत सुझावलाई मध्यनजर गर्दै विगत तीन दिन यतादेखि भौतिक रूपमा भेटेरै भैरहेको बधाई एवं शुभकामना आदानप्रदानलाई आजैका दिनदेखि रोकेको कुरा जानकारी गराउदछौं । यसकारण पर्न गएको अफ्ठ्यारोका लागि सचिवालय क्षमा चाहन्छ । '

माओवादी केन्द्रले भर्खरै काठमाडौंमा ८औं महाधिवेशन सम्पन्न गरेको छ । महाधिवेशनका लागि देशभरबाट प्रतिनिधि आएका थिए ।

प्रकाशित : पुस २२, २०७८ १४:२९
प्रतिक्रिया
पठाउनुहोस्

बिहारमा जसले गरे कोभिडविरुद्धको ११ डोज भ्याक्सिन लिएको दाबी !

कान्तिपुर संवाददाता

काठमाडौँ — बिहारको मधेपुरा जिल्लाका एक व्यक्तिले आफूले ११ डोज कोरोनाविरुद्धको भ्याक्सिन लिएको दाबी गरेका छन् । हाल बिहारको पुरैनीमा रहँदै आएका ८४ वर्षीय ब्रह्मदेव मण्डलले भ्याक्सिन लगाउन सुरु गरेदेखि आफूलाई कुनै पनि रोगले नछोएको र पूर्ण रुपमा स्वस्थ रहेको दाबी गरेको बीबीसी हिन्दीले उल्लेख गरेको छ ।

यसैगरी मधेपुराकै सिभिल शल्यचिकित्सक डा अमरेन्द्र प्रताप शाहीले भने मण्डलको दाबी साँचो भए/नभएको बारेमा अनुसन्धान हुने बताएका छन् ।

मण्डलले भ्याक्सिन लगाएको अस्पतालमा भएको रेकर्ड हेरेपछि थाहा हुने भन्दै यदि यो कुरा साँचो रहेछ भने सम्बन्धित व्यक्तिविरुद्ध कारबाही हुने डा शाहीले दाबी गरेका छन् ।

अहिले भारतमा कोरोना संक्रमणको तेस्रो लहर चलिरहेको छ । बुधबारमात्रै भारतमा ९० हजारभन्दा बढीमा संक्रमण पुष्टि भएको थियो । गतमहिना भारतीय प्रधानमन्त्री नरेन्द्र मोदीले जनवरी १० देखि ६० वर्षमाथि उमेरसमूहका नागरिकलाई कोभिडविरुद्धको तेस्रो डोज भ्याक्सिन लगाइने बताएका थिए । अहिलेसम्म भारतमा भ्याक्सिनको दुई डोजमात्र लगाउन मिल्नेगरी अनुमति दिइएको छ ।

प्रकाशित : पुस २२, २०७८ १४:१७
पूरा पढ्नुहोस्
प्रतिक्रिया
पठाउनुहोस्
×