चिसो बढेसँगै जनजीवन कष्टकर- समाचार - कान्तिपुर समाचार
कान्तिपुर वेबसाईट
AdvertisementAdvertisement

चिसो बढेसँगै जनजीवन कष्टकर

शीतलहर चल्दा वृद्धवृद्धा, बालबालिका र बिरामी बढी प्रभावित 
लुम्बिनी प्रदेश ब्युरो

भैरहवा — बड्का थारू सबेरै अटोरिक्सा लिई मणिग्राम चोकतिर लाग्थे । दिनभरि मान्छेलाई गन्तव्यमा पुर्‍याइदिने काम गरेबापत भएको कमाइले साँझ चामल किनी घर फर्किन्थे । रूपन्देहीको तिलोत्तमा–६ का उनलाई तीन दिनयता चिसोले निकै सताएको छ ।

रिक्सा लिएर जसोतसो चोकमा पुगे पनि ग्राहक नपाएर छट्पटिनु परेको उनले बताए । ‘हात कठ्यांग्रिएर रिक्सा चलाउन पनि मुस्किल पर्छ,’ उनले भने, ‘चिसो बढी हुँदा छाक नै रोकिने चिन्ता छ ।’

हुस्सुसँगै एकाएक बढेको चिसोले लुम्बिनी प्रदेशका पहाडी, हिमाली र तराईका जिल्ला प्रभावित भएका छन् । जनजीवन कष्टकर बनेको छ । बेमौसमी वर्षासँगै जाडो बढेपछि बजार क्षेत्रमा चहलपहल घटेको छ । चिसोले बालबालिका, महिला र वृद्धवृद्धा बढी प्रभावित भएका छन् ।

पछिल्ला केही दिनयता रूपन्देहीमा चिसो बढ्दै गएको छ । गत मंगलबार र बुधबार भएको वर्षासँगै बढेको चिसोले जिल्लाको जनजीवन कष्टकर बनेको हो । बिहानैदेखि लाग्ने बाक्लो हुस्सुका कारण सडकमा यातायातका साधन पनि न्यून संख्यामा गुडेका छन् । चिसोका कारण अत्यावश्यक कामबाहेक मानिसहरू घरबाहिर निस्किएका छैनन् । बजार, पसल, सार्वजनिक स्थल, सरकारी कार्यालयलगायतमा मान्छेको चहलपहल पातलो छ ।

चिसोका कारण दैनिक ज्यालामजदुरी गर्ने श्रमिक बढी मर्कामा परेका छन् भने बालबालिका, महिला तथा वृद्धवृद्धा बढी प्रभावित भएका छन् । सर्वसाधारणले कतिपय ठाउँमा आगो बालेर चिसो भगाउने प्रयास गरिरहेका छन् । बालबालिकालाई स्वास्थ्य समस्या हुने भन्दै जिल्लाका केही स्थानीय तहले विद्यालय बन्द गर्न आग्रह गरेका छन् । बुटवल उपमहानगरपालिकाले गत बिहीबार र शुक्रबार दुई दिन विद्यालय बन्द गर्न आग्रह गरेको थियो ।

विद्यालयले बर्खे र हिउँदे बिदाबाट मिलान गर्ने गरी पुस १५ र १६ मा बिदा दिएको थियो । त्यस्तै, रोहिणी गाउँपालिकाले आइतबार र सोमबार विद्यालय बन्द गर्‍यो । सोमबारपछि पनि मौसममा सुधार नदेखिए बिदा लम्ब्याउने विषयमा गाउँपालिकाले थप निर्णय गर्ने प्रमुख प्रशासकीय अधिकृत रोमनाथ न्यौपानेले बताए । बाक्लो हुस्सुका कारण भिजिबिलिटी कम भएपछि भैरहवास्थित गौतम बुद्ध विमानस्थलबाट हुने हवाई उडान पनि प्रभावित भएका छन् । भैरहवाबाट काठमाडौं, पोखरा र चितवन गरी दैनिक २७ वटासम्म उडान हुने गरेका छन् ।

चिसो बढेपछि कपिलवस्तु सदरमुकाम तौलिहवा, जितपुर, कृष्णनगर, चन्द्रौटा र महाराजगन्जलगायतका ठाउँमा सर्वसाधारण दिउँसै चोकचोकमा आगो बालेर बसेका छन् । चिसोका कारण अत्यावश्यक कामबाहेक मानिस घरबाहिर निस्किएका छैनन् । बजार, सार्वजनिक स्थल, सरकारी कार्यालयलगायतमा मान्छेको चहलपहल नगण्य छ । स्कुले बालबालिकालाई समस्या हुने भन्दै कृष्णनगर नगरपालिकाले पुस १९ देखि तीन दिन बिदा दिएको छ ।

बुधबारपछि पनि मौसममा सुधार नदेखिए बिदा लम्ब्याउने विषयमा नगरपालिकाले थप निर्णय गर्ने नगर प्रमुख रजतप्रताप शाहले बताए । ‘दिनभरि लाग्ने बाक्लो हुस्सु र शीतलहरले जनजीवन कष्टकर बनाएको छ,’ कपिलवस्तु नगरपालिका–३ मालटोलकी पुष्पा रेग्मीले भनिन्, ‘चिसोले जनजीवन नराम्ररी प्रभावित भएको छ ।’ तीन दिनदेखि घाम नलागेपछि मुटु कठ्यांग्रिने गरी चिसो बढेको उनले बताइन् ।

यता बाँकेमा शीतलहरले जनजीवन आक्रान्त छ । दिउँसो पनि चिसो बढ्दा दैनिक ज्यालादारी काम गरेर खानेलाई समस्या भएको छ । शीतलहरसँगै कुहिरोले गर्दा नेपालगन्ज विमानस्थलमा बिहानका उडान प्रभावित भएका छन् । दुई दिनदेखि बिहान र साँझ शीतलहरसँगै कुहिरो लागेको छ । नेपालगन्जको तापक्रम घट्दै गएको छ ।

हावापानी कार्यालयका अनुसार नेपालगन्जमा न्यूनतम तापक्रम ८.९ डिग्री सेल्सियसमा झरेको छ । सर्वसाधारणलाई शीतलहरबाट जोगाउन गाउँ र टोलका चोक–चोकमा आगो ताप्ने व्यवस्था मिलाउने योजना बनाइएको बाँकेका प्रमुख जिल्ला अधिकारी सूर्यबहादुर खत्रीले बताए । ‘तत्काललाई ५ हजार किलो दाउरा दिन वन कार्यालयमा पत्र पठाइसकेका छौं,’ उनले भने ।

डुडुवा गाउँपालिकाले सर्वसाधारणलाई शीतलहरबाट जोगाउन गाउँ र टोलका चोक–चोकमा आगो ताप्ने व्यवस्था मिलाउने योजना बनाएको गाउँपालिका अध्यक्ष नरेन्द्रकुमार चौधरीले बताए ।

नरैनापुर गाउँपालिकाले ज्येष्ठ नागरिकलाई कम्बल वितरण गर्ने भएको छ । वडा कार्यालयमार्फत कम्बल वितरणको कार्यक्रम रहेको सूचना अधिकारी लक्ष्मीकान्त मिश्राले बताए । शीतलहरबाट जोगिन नेपालगन्ज उपमहानगरपालिकाले चोक–चोकमा आगो बाल्ने योजना बनाएको उपप्रमुख उमा थापामगरले बताइन् । ‘चिसोबाट जोगिने उपाय र सावधानीसहित सन्देशमूलक सूचना प्रवाह गर्दै आएका छौं,’ उनी भन्छिन् । कोहलपुर नगर, बैजनाथ, खजुरा, राप्तीसोनारी गाउँपालिकाले पनि शीतलहरका बेला चोकमा आगो बालेर ताप्न दाउरा वितरण गर्ने योजनाबाहेक अन्य कुनै तयारी गरेका छैनन् ।

शुक्रबारदेखि बढेको चिसोसँगै चलेको शीतलहरले पश्चिम नवलपरासीको जनजीवन प्रभावित छ । बाक्लो हुस्सु लागेपछि बजार र सडकमा चहलपहल घटेको छ । मजदुर र किसानलाई बढी मर्का परेको छ । जाडोबाट बच्नका लागि किसानले खेतबारीमा काम गर्न जान छाडेका छन् भने मजदुरसमेत काम छाडेर घरमा बस्न थालेका छन् । तराईमा गहुँमा सिँचाइ गर्ने, उखु काट्ने र तरकारी बालीको काम गर्ने सिजन भए पनि जाडोका कारण काम नै रोकेर बस्नुपरेको परासीका रामचन्द्र ज्ञवालीले बताए ।

विपन्न बस्तीका मजदुर जाडोले दैनिक ज्यालादारी गर्न जान नपाएपछि बिहान–बेलुकीकी छाक कसरी टार्ने भन्ने पिरलोमा छन् । चिसोका कारण बालबालिका, वृद्धवृद्धा र बिरामी बढी प्रभावित बनेका छन् । बढ्दो चिसोका कारण स्वास्थ्य संस्थामा रुघा, दम–खोकी, चिसोको एलर्जी, निमोनिया, टन्सिल, पिनास र भाइरल तथा श्वासप्रश्वाससम्बन्धी समस्या भएका बिरामीको संख्या बढेको छ ।

परासी, बर्दघाट, भुमही, सुनवललगायतका क्षेत्रमा दिनभरिजसो बाक्लो हुस्सु लागेपछि पूर्व–पश्चिम राजमार्ग भएर गुड्ने सवारी साधनले दिउँसै बत्ती बालेर हिँड्ने गरेका छन् । राजमार्गमा लामो दूरीका बाहेक निजी र सार्वजनिक सवारीसाधनको चाप घटेको छ । तीन दिनअघि परेको पानीसँगै बर्दियामा बढेको चिसोले जनजीवन प्रभावित बनेको छ । चिसो हावासँगै बाक्लो हुस्सु र शीतलहर चलेको छ । हुस्सुले सवारीसाधन दिउँसै बत्ती बालेर गुडिरहेका छन् ।

चिसोका कारण निमोनिया, रुघाखोकी र पखालाका बिरामी बढेको जिल्ला अस्पताल बर्दियाका डा. विश्वनाथ साहले बताए । कतिपय ठाउँमा चिसोबाट बच्न निजी खर्चमा स्थानीयले समूह–समूहमा आगो बालेर तापेका छन् ।

सन्जु पौडेल (लुम्बिनी), मनोज पौडेल (कपिलवस्तु), रूपा गहतराज (नेपालगन्ज), नवीन पौडेल (परासी) र कमल पन्थी (बर्दिया)

प्रकाशित : पुस २०, २०७८ ०८:४१
प्रतिक्रिया
पठाउनुहोस्

कांग्रेस महाधिवेशन : लुम्बिनीमा मिश्रित नतिजा

कुल १२ जिल्ला रहेको प्रदेशमा बुधबार साँझसम्म ५ जिल्लाको परिणाम सार्वजनिक
लुम्बिनी प्रदेश ब्युरो

भैरहवा — संघीय महाधिवेशन प्रतिनिधि चयनका लागि लुम्बिनी प्रदेशका विभिन्न जिल्लामा भएका निर्वाचनको मिश्रित परिणाम आएको छ । कुल १२ जिल्ला रहेको प्रदेशमा बुधबार साँझसम्म ५ जिल्लाको परिणाम आएको छ । केही जिल्लामा अबेरसम्म मतदान भइरहेको थियो । बाँके र बर्दियामा बिहीबार निर्वाचन हुँदै छ ।

संघीय महाधिवेशन प्रतिनिधि चयनमा पाल्पाका दुई प्रतिनिधिसभा निर्वाचन क्षेत्रमा अधिकांश कांग्रेस वरिष्ठ नेता रामचन्द्र पौडेल पक्षधर प्रतिनिधि छनोट भएका छन् । कांग्रेस सभापति तथा प्रधानमन्त्री शेरबहादुर देउवा पक्षीय प्रतिनिधि भने दुई जनाले मात्र जित हात पारेका छन् । कुल ५२ जना प्रतिनिधिमध्ये दुई क्षेत्रीय सभापतिसहित पौडेल पक्षधर ५० जना विजयी भएका छन् ।

गुल्मीमा महाधिवेशन प्रतिनिधिमा वरिष्ठ नेता पौडेल पक्षधरको वर्चस्व देखिएको छ । दुईवटा संघीय निर्वाचन क्षेत्र रहेको गुल्मीमा मंगलबार सम्पन्न क्षेत्रीय अधिवेशनबाट ५० जना महाधिवेशन प्रतिनिधि र दुई जना क्षेत्रीय सभापति निर्वाचित भएका छन् । जसमध्ये पौडेल पक्षका ३९ जना निर्वाचित भए भने देउवा पक्षका ११ जना निर्वाचित भएका छन् । गगन थापा समूहबाट २ जना महाधिवेशन प्रतिनिधि चयन भएका छन् ।

पश्चिम नवलपरासीमा नेपाली कांग्रेसको क्षेत्रीय अधिवेशनमा पौडेल पक्ष बलियो देखिएको छ । दुईवटा निर्वाचन क्षेत्र रहेको जिल्लामा एक/एक क्षेत्रीय सभापति देउवा र पौडेल निकट विजयी भए पनि महाधिवेशन प्रतिनिधिमा भने पौडेल समूह बलियो देखिएको छ । जिल्लाबाट प्रतिनिधित्व गर्ने ५० जना महाधिवेशन प्रतिनिधिमध्ये पौडेल समूहका २८ र देउवा समूहका २२ जना निर्वाचित भएका छन् । निर्वाचन क्षेत्र १ मा पौडेल समूहका २५ जना नै महाधिवेशन प्रतिनिधिमा चयन भएका छन् भने निर्वाचन क्षेत्र २ मा देउवा समूहका २२ जना निर्वाचित भएका छन् भने पौडेल समूहबाट तीन जना मात्र महाधिवेशन प्रतिनिधि चयन भएका छन् ।

प्यूठानमा मिश्रित नतिजा आएको छ । यहाँ शेखर कोइराला–गगन थापा समूहका प्रत्याशी विष्णुकुमार गिरी जिल्ला सभापतिमा निर्वाचित भएका छन् । महाधिवेशन प्रतिनिधिमा देउवा पक्षधर १२, पौडेल पक्षधर ९, शेखर कोइराला पक्षधर ४ र गगन पक्षधर एकजना विजयी भएका छन् । रुकुम पूर्वमा देउवा पक्ष बलियो देखिएको छ । त्यहाँबाट २३ जना महाधिवेशन प्रतिनिधि देउवा र २ जना पौडेल पक्षका चुनिएका छन् ।

दाङमा अधिकांश देउवा पक्षधर महाधिवेशन प्रतिनिधि निर्वाचित भएका छन् । तीनमध्ये दुई क्षेत्रमा देउवा पक्षको प्यानलै विजयी भएको छ । निर्वाचन क्षेत्र १ मा देउवा पक्षधर प्यानल निर्वार्चित भएको छ । सभापतिमा भेषराज पाण्डेसहित सबै महाधिवेशन प्रतिनिधि देउवा पक्षका विजयी भएका छन् । क्षेत्र नं. २ मा पनि देउवानिकट सभापति भीमप्रकाश खड्का निर्वाचित भएका छन् । कार्यसमितिमा सचिवबाहेक सबै देउवा पक्षका निर्वाचित भएका छन् । क्षेत्र नं. ३ मा भने रामचन्द्र पौडेल पक्षको प्यानल विजयी भएको छ । पार्टीका पूर्व जिल्ला सभापति वीरकेशरी गौतमलगायतका केही अग्रज नेताहरू भने महाधिवेशन प्रतिनिधिमा पराजित भएका छन् ।

रूपन्देहीमा बुधबार साँझसम्म चारवटा संघीय निर्वाचन क्षेत्रको परिणाम प्राप्त भएको छ । क्षेत्र नम्बर ३ को अबेरसम्म गणना जारी थियो । चारवटा निर्वाचन क्षेत्रमा पौडेल पक्ष अगाडि देखिएको छ । जिल्लाका पाँच निर्वाचन क्षेत्रमध्ये ४ र ५ मा सर्वसम्मत प्रतिनिधि चयन भएका थिए । रूपन्देही क्षेत्र नं. १ मा हीरा केसी क्षेत्रीय सभापति निर्वाचित भएका छन् । सोमबार भएको निर्वाचनबाट केसी पुनः सभापतिमा निर्वाचित भएका हुन् । उनी देउवा निकट हुन् । महाधिवेशन प्रतिनिधिमा भने मिश्रित परिणाम आएको छ । रूपन्देही क्षेत्र नं. २ को क्षेत्रीय सभापतिमा हरि लम्साल विजयी भएका छन् ।

मंगलबार सम्पन्न क्षेत्रीय अधिवेशनबाट पौडेल समूहका लम्साल निर्वाचित भएका हुन् । निर्वाचन क्षेत्र नं. २ मा देउवा समूहबाट ७ जना र पौडेल समर्थक १८ जना महाधिवेशन प्रतिनिधि चयन भएका छन् । क्षेत्र नं. ४ को सभापतिमा मुकेश यादव निर्विरोध भएका छन् । महाधिवेशन प्रतिनिधि २५ जना नै पौडेल पक्षधर रहेका सभापति यादवले बताए । क्षेत्र नं. ५ को सभापतिमा वसिउल्लाह मुसलमान सर्वसम्मत भएका छन् । निर्वाचन क्षेत्र नं. ५ मा पदाधिकारीसहित महाधिवेशन प्रतिनिधि सर्वसम्मत चयन भएको जिल्ला निर्वाचन अधिकृत भेषराज घिमिरेले जानकारी दिए । निर्वाचन क्षेत्र नं. ५ का क्षेत्रीय सभापतिसहित सबै महाधिवेशन प्रतिनिधि भरत शाह पक्षधर रहेको बुझिएको छ । शाह जिल्लामा पौडेल पक्षमा खुलेका छन् ।

त्यसैगरी, अर्घाखाँची जिल्ला अधिवेशनबाट भारी मतान्तरले युवा नेता केशव श्रेष्ठ सभापतिमा विजयी भएका छन् । श्रेष्ठले ७ सय ३१ मत ल्याएर सभापतिमा विजयी भएका हुन् । उनका प्रतिस्पर्धी इन्द्रमणि पौडेलले ३ सय ५२ मत ल्याए भने यादवप्रसाद घिमिरेले ३ सय ९ मत पाए । सभापतिमा उम्मेदवारी घोषणा गरेका विष्णुप्रसाद खनालले मनोनयन दर्तापछि आफ्नो उम्मेदवारी फिर्ता लिएर श्रेष्ठलाई समर्थन गरेका थिए । श्रेष्ठ रामचन्द्र पौडेल पक्षका हुन् । श्रेष्ठ सभापतिमा निर्वाचित हुँदा शेरबहादुर देउवा पक्षीय घिमिरे तेस्रो स्थानमा झरे । घिमिरेलाई देउवानिकट केन्द्रीय सदस्यद्वय पुष्पा भुसाल र मानबहादुर विश्वकर्माले समर्थन गरेका थिए । श्रेष्ठलाई पूर्वकेन्द्रीय सदस्य रेवतीप्रसाद भुसाल, नेता रामबहादुर बीसी, पूर्वसभापति विष्णुप्रसाद खनाललगायतले समर्थन गरेका थिए भने पौडेल पक्षीय इन्द्रमणिलाई शीर्ष नेता कसैले समर्थन गरेका थिएन ।

त्यस्तै, रोल्पा सभापतिमा किशोर आचार्य निर्वाचित भएका छन् । रोल्पामा प्रत्याशी मानबहादुर खत्रीलाई ६२ मतान्तरले पछि पार्दै किशोर आचार्य सभापतिमा निर्वाचित भएका छन् । मंगलबार भएको मतदानपछि आचार्यले ५ सय २ र खत्रीले ४ सय ४० मत पाए । कुल १ हजार ४२ मत खसेकामा ३८ मत बदर भएको थियो ।

प्रकाशित : मंसिर ९, २०७८ ०८:४५
पूरा पढ्नुहोस्
प्रतिक्रिया
पठाउनुहोस्
×