प्रतिनिधिसभा कार्यव्यवस्था परामर्श समितिको बैठकमा नेकपा (एस)का प्रमुख सचेतक आमन्त्रित

कार्यव्यवस्था परामर्श समितिको बैठकमा कानुन, न्याय तथा संसदीय मामिलामन्त्री दिलेन्द्रप्रसाद बडूलगायत राजनीतिक दलका पदाधिकारीको सहभागिता रहेको छ ।

कार्यव्यवस्था परामर्श समितिको बैठकमा नेकपा (एकीकृत समाजवादी)का प्रमुख सचेतक जीवनराम श्रेष्ठ पनि सहभागी रहेका छन् । उनलाई सभामुखले आमन्त्रित सदस्यका रूपमा कार्यव्यवस्था परामर्श समितिको बैठकमा बोलाएका हुन् ।

यसअघिको बैठक (मंसिर २८ गते) मा एकीकृत समाजवादीका प्रमुख सचेतक श्रेष्ठलाई कार्यव्यवस्था परामर्श समितिको बैठकमा बोलाएकोमा एमालेका प्रतिनिधिले आपत्ति जनाएका थिए । मंगलबारको बैठकमा भने एमालेका प्रतिनिधिले आपत्ति नजनाएको सभामुखको सचिवालयले जानकारी दिएको छ । सभामुखले आवश्यकताअनुसार सदस्य आमन्त्रण गर्न पाउने अधिकार प्रयोग गरेर श्रेष्ठलाई बोलाएको बताइएको छ ।

कार्यव्यवस्था परामर्श समितिको बैठकमा एमालेका प्रमुख सचेतक विशाल भट्टराई, सदस्यहरु लालबहादुर थापा र कृष्णभक्त पोखरेल रहेका छन् । माओवादीका प्रमुख सचेतक देव गुरुङ र सदस्य रेखा शर्मा लगायत उपस्थित छन् ।

एकीकृत समाजवादीका अध्यक्ष माधवकुमार नेपालसहित १४ सांसदलाई कारबाही हुनुपर्ने माग राख्दै अघिल्लो अधिवेशनदेखि नै एमालेले संसद् अवरुद्ध गर्दै आएको छ । मंसिर २८ गतेदेखि जारी प्रतिनिधिसभाको अधिवेशनमा पनि एमालेले अवरोध जारी राखेको छ ।