एमालेले बनायो स्थायी कमिटी र पोलिटब्युरो- समाचार - कान्तिपुर समाचार

एमालेले बनायो स्थायी कमिटी र पोलिटब्युरो

मापदण्डबिनै नाम आएको भन्दै पृथ्वी सुब्बा गुरूङको समेत आपत्ति
वरीयतामा सचिव गोकर्ण विष्ट र योगेश भट्टराई असन्तुष्ट
बबिता शर्मा

काठमाडौँ — अध्यक्ष केपी शर्मा ओलीले ‘बिनामापदण्ड’ राखेको प्रस्तावमा केन्द्रीय सदस्य मनोनयन, पोलिटब्युरो तथा स्थायी कमिटी गठन र कार्यविभाजन गरिएको भन्दै एमाले नेताहरू असन्तुष्ट बनेका छन् । ४४ जनालाई केन्द्रीय सदस्यमा मनोनयन गर्दा तथा ९९ सदस्यीय पोलिटब्युरो र ४५ सदस्यीय स्थायी कमिटी बनाउँदा छलफल नगरिएको भनी ओलीनिकट नेताहरूले समेत गुनासो गरेका छन् । 

भक्तपुरमा बसेको केन्द्रीय कमिटी बैठकमा ओलीले नाम प्रस्ताव गरेलगत्तै उपाध्यक्षद्वय अष्टलक्ष्मी शाक्य र युवराज ज्ञवालीका साथै उपमहासचिव पृथ्वीसुब्बा गुरुङले मापदण्डबिनै नाम आएको भन्दै विरोध जनाएका थिए । ‘कम्तीमा १९ पदाधिकारीबीच छलफल गरेर मापदण्ड बनाउनुपर्थ्यो । त्यसो गर्दा सबैले चित्त बुझाउने ठाउँ हुन्थ्यो । पार्टीलाई सामूहिक नेतृत्वमा चलाउनुपर्छ,’ बैठकमा ज्ञवालीले भनेका थिए ।

उपाध्यक्ष शाक्यले अध्यक्षको प्रस्तावले पार्टीमा न्याय नभएको भन्दै असन्तुष्टि जनाएकी थिइन् । ‘महत्त्वपूर्ण कमिटी गठन र केन्द्रीय सदस्यको मनोनयनमा अध्यक्षले सल्लाह गरेको भए सजिलो हुन्थ्यो । यसअघि छलफल र सल्लाह भएन । मूल्यांकनको परिपाटी हिजो थियो । आज त्यसलाई नजरअन्दाज गरियो,’ शाक्यको भनाइ उद्धृत गर्दै एक केन्द्रीय सदस्यले भने ।

अध्यक्ष ओलीले व्यक्तिगत निर्णय लिएको भन्दै उपमहासचिव गुरुङले असन्तुष्टि जनाएका थिए । मापदण्ड नबनाई व्यक्तिगत निर्णय गर्दा वरिष्ठ नेताहरूसमेत पोलिटब्युरोमा छुटेको उनको भनाइ थियो । ‘विधिसम्मत तरिकाले छलफलबाट सबै टुंग्याउनुपर्थ्यो । व्यक्तिगत निर्णय लिनु गलत हुन्छ । पार्टीलाई सामूहिक निर्णय प्रणालीमा लैजानुपर्छ,’ गुरुङले भनेका थिए । केन्द्रीय सदस्यको मनोनयन र पोलिटब्युरो गठनमा उपाध्यक्ष सुवास नेम्वाङ, सचिव गोकर्ण विष्ट र योगेश भट्टराई तथा स्थायी कमिटी सदस्य घनश्याम भुसालले पनि असन्तुष्टि राखेका थिए । नेम्वाङले इलामबाट मणि लिम्बूलाई केन्द्रीय सदस्यमा मनोनयन गर्नुपर्ने बताएका थिए । भुसालले अन्यायपूर्ण र अपमानपूर्ण प्रस्ताव आएको टिप्पणी गरे ।

केन्द्रीय सदस्य भगवती चौधरीले कार्यविभाजनमा अन्याय भएको बताइन् । ‘मभन्दा जुनियरलाई कुन मापदण्डबाट पोलिटब्युरो बनाइयो ?’ उनले कान्तिपुरसँग भनिन् । केन्द्रीय सदस्यहरू श्रीमाया थकाली, टुका हमाल, ममता गिरी, लालबहादुर थापालगायतका नेता पनि पोलिटब्युरोमा नपरेपछि असन्तुष्ट छन् ।

‘पूर्वमाओवादी समूहको असन्तुष्टि छैन । पहिला माधव नेपालको पक्षमा रहेर काम गरेकाहरूमाथि प्रतिशोध साधियो । यसले राम्रो पक्कै गर्दैन,’ एक नेताले भने । केन्द्रीय सदस्य नीरज आचार्यले कार्यविभाजनप्रति लिखित रूपमा नै असन्तुष्टि राखेका छन् ।

बैठकले केन्द्रीय पदाधिकारीको वरीयताक्रम पनि तय गरेको छ । अध्यक्ष ओली, वरिष्ठ उपाध्यक्ष ईश्वर पोखरेलपछि उपाध्यक्षको पहिलो वरीयतामा युवराज ज्ञवाली छन् । त्यसपछि उपाध्यक्षहरू अष्टलक्ष्मी शाक्य, रामबहादुर थापा, विष्णु पौडेल, सुवासचन्द्र नेम्वाङ र सुरेन्द्र पाण्डे छन् । महासचिव शंकर पोखरेलपछि तीन उपमहासचिवमा प्रदीप ज्ञवाली पहिलो वरीयतामा छन् । दोस्रोमा पृथ्वीसुब्बा गुरुङ र तेस्रोमा विष्णु रिमाल छन् । सचिवमा पूर्वमाओवादी नेता टोपबहादुर रायमाझी पहिलो र लेखराज भट्ट दोस्रो वरीयतामा छन् । त्यसपछि रघुवीर महासेठ, छविलाल विश्वकर्मा, गोकर्ण विष्ट, योगेश भट्टराई, पद्मा अर्याल छन् । एक नेताका अनुसार सचिव विष्ट र भट्टराई वरीयता र कार्यविभाजनप्रति असन्तुष्ट छन् ।

केन्द्रीय सदस्य झपट रावलले अध्यक्ष ओलीको बोली र व्यवहार फरक देखिएको बताए । यसअघि ओलीले पार्टीमा कसैलाई पक्षपात र अन्याय नगर्ने भने पनि व्यवहारमा प्रतिशोध देखिएको उनको भनाइ छ । ‘अध्यक्षले चार श्रेणीमा विभाजन गर्नॅभयो । क श्रेणीमा उहाँसँग रहेका पर्नॅभयो । ख श्रेणीमा माओवादीबाट आएका परे । ग श्रेणीमा ८ बुँदे गरेर गएका र पार्टी प्रवेश गरेका, एक, दुई र तीन महिना नपुगेकाहरू परेका छन्,’ रावलले भने, ‘१० बुँदे गरेर एमालेमै रहेकाहरू घ श्रेणीमा परेका छौं । उहाँले प्रतिशोधपूर्ण, पूर्वाग्रहपूर्ण र पक्षपातपूर्ण मनोनयन र कार्यविभाजन गर्नुभयो ।’

बैठकले प्रदेश कमिटीको इन्चार्ज र पदाधिकारीमा पनि मनोनयन गरेको छ । उक्त कमिटीले प्रदेश अधिवेशन आयोजना गर्नेछ । महासचिव पोखरेलका अनुसार प्रदेश १ मा देवराज घिमिरे, प्रदेश २ मा रघुवीर महासेठ, वाग्मतीमा काशीनाथ अधिकारी, गण्डकीमा पद्मा अर्याल, लुम्बिनीमा छविलाल विश्वकर्मा, कर्णालीमा यामलाल कँडेल र सुदूरपश्चिममा लेखराज भट्ट इन्चार्ज बनेका छन् । शनिबारको बैठकले आगामी पुस २३ मा जिल्ला अधिवेशन, माघ ८ मा प्रदेश कमिटीको अधिवेशन र फागुन मसान्तसम्म सबै जनवर्गीय संगठनको अधिवेशन गर्ने निर्णय गरेको थियो । प्रचार विभाग प्रमुखको जिम्मेवारी उपमहासचिव गुरुङलाई दिइएको छ ।

उपमहासचिव ज्ञवाली स्कुल विभाग र स्थायी कमिटी सदस्य खगराज अधिकारी संगठन विभाग प्रमुख बनेका छन् । युवा संघको इन्चार्ज महेश बस्नेतलाई बनाउने निर्णय भएको छ । आगामी पुसमा जिल्लाभरि तयारी गरेर माघ र फागुनमा पार्टी विस्तार तथा पार्टी प्रवेश कार्यक्रम गराउने कार्ययोजना एमालेले बनाएको छ । महाधिवेशनको सन्देश प्रवाह गर्ने अभियान चलाउने निर्णय गरेको एमालेमा कार्यविभाजनलाई लिएर सुरुदेखि नै असन्तुष्टि छ । महाधिवेशनमै समेत अध्यक्ष ओलीले निकट व्यक्तिलाई महत्त्वपूर्ण जिम्मेवारी दिएको भन्दै उनकै समूहमा असन्तुष्टि देखिएको थियो । केन्द्रीय सदस्यमा निर्वाचित भए पनि अस्वीकार गर्दै शपथ नलिएका कारण पूर्वउपाध्यक्ष भीम रावल भने बैठक उपस्थिति थिएनन् ।

स्थायी कमिटी को–को ?

१९ पदाधिकारी सबै, घनश्याम भुसाल, गुरु बराल, देवराज घिमिरे, भीम आचार्य, लालबाबु पण्डित, खगराज अधिकारी, किरण गुरुङ, काशीनाथ अधिकारी, रघुजी पन्त, भानुभक्त ढकाल, मणिचन्द्र थापा, शेरधन राई, कृष्णगोपाल श्रेष्ठ, यमलाल कँडेल, अग्नि खरेल, प्रभु साह, राजन भट्टराई, सीता पौडेल, विन्दा पाण्डे, गोरखबहादुर बोगटी, कर्णबहादुर थापा, राजेन्द्र गौतम, थममाया थापा, शेरबहादुर तामाङ, शिवमाया तुम्बाहाङ्फे र हिक्मत कार्की ।

पोलिटब्युरोमा को–को ?

स्थायी कमिटी सदस्य सबै, गोकुल बाँस्कोटा, महेश बस्नेत, अरुण नेपाल, देवी ज्ञवाली, पर्शु मेघी गुरुङ, पुरुषोत्तम पौडेल, आनन्द पोखरेल, लीला गिरी, जगत विश्वकर्मा, कमलप्रसाद चौलागाईं, बालकृष्ण ढुंगेल, ईश्वरबहादुर रिजाल, जितबहादुर गौतम, विनोद श्रेष्ठ, सुमन प्याकुरेल, भैरवसुन्दर श्रेष्ठ, राम दयाल मण्डल, दलबहादुर राना, गोकुल घर्ती, बैजनाथ चौधरी, टुकराज सिग्देल, लीलानाथ श्रेष्ठ, खेममान खड्का, राजेन्द्र रावल, नारदमुनि राना, लिलबहादुर थापा मगर, सुजिता शाक्य, ज्वालाकुमारी साह, मोहन बानियाँ, मञ्जुकुमारी चौधरी, अच्युत मैनाली, विशाल भट्टराई, गणेश ठगुन्ना, खिमलाल भट्टराई, दधिराम न्यौपाने, देवेन्द्र दाहाल, रामेश्वर फुयाँल, ठाकुर गैरे, तिलकुमार मेन्याङ्बो, जुलीकुमारी महतो, गौरी वली, निरुदेवी पाल, विमला घिमिरे, लीलाकुमारी भण्डारी, शान्ता चौधरी, सीता गिरी वली, नन्दलाल चौधरी, कृष्णबहादुर राई, गुलावजंग शाह, लक्ष्मी पोखरेल, सूर्यबहादुर थापा, मनकुमार जैसी, सुशीला नेपाल, पार्वत गुरुङ ।

मनोनीत केन्द्रीय सदस्य

दल फडेरा, मानवीर राई, ऐन महर, चन्द्रमोहन श्रेष्ठ, रतननाथ योगी, रमेश पौडेल, पदम गिरी, सूर्य पाठक, यज्ञ बोगटी, हरि घिमिरे, युवराज बाँस्कोटा, विशाल भट्टराई, उद्धव रेग्मी, बद्री न्यौपाने, रूपनारायण श्रेष्ठ, प्रेम दंगाल, हरिकृष्ण व्यञ्जनकार, सुवास देवकोटा, भीम केसी, लालबाबु पण्डित, चन्द्रमोहन गौतम, रेशम लामा, दुर्गा प्रसाईं, चूडा तामाङ, कृष्ण केसी, गोविन्द दुलाल, सहदेव बोगटी, कालसिं काउचा, विषमलाल अधिकारी, इन्दिरादेवी गौतम, सरस्वती चौधरी, यमुना रोक्का, उमा कोइराला, कल्पना चापागाईं, आशा विक, नैनकला पुर्जा, मञ्जु गुरुङ, विमला अर्याल, इन्दिरा सञ्जेल, गीता कार्की, शान्ति अधिकारी, सरिता बराल, तारादेवी गुरुङ र रुक्मणि राना ।

प्रकाशित : मंसिर २७, २०७८ ०७:०४
प्रतिक्रिया
पठाउनुहोस्

‘गतिशील र ऊर्जाशील कांग्रेस बनाउने मेरो योजना’

कान्तिपुर संवाददाता

काठमाडौँ — कांग्रेसका भावी नेतृत्व चयन गर्न सोमबार मतदान हुँदै छ । सत्ता र शक्तिको केन्द्रमा रहेका सभापति शेरबहादुर देउवालाई चुनौती दिन चार जनाले उम्मेदवारी दिएका छन् ।

संस्थापनइतर एउटा टिमको नेतृत्व गरिरहेका शेखर कोइराला आफ्नो उम्मेदवारी अनुहार परिवर्तनका लागि मात्र नभएर विचार, कार्यक्रम र युवा टिमलाई बलियो आधार मान्छन् । कोइरालासँग कांग्रेस महाधिवेशन र उम्मेदवारीका सन्दर्भमा कान्तिपुरका कुलचन्द्र न्यौपाने र ऋषिराम पौड्यालले गरेको कुराकानीको सम्पादित अंश :

पाँचपटक प्रधानमन्त्री, कांग्रेस (प्रजातान्त्रिक) सहित दुईपटक पार्टी सभापति भइसक्नुभएका शेरबहादुर देउवासँग प्रतिस्पर्धामा उत्रिनुभएको छ, तपाईंको जित्ने आधार के छ ?

उहाँ प्रजातन्त्रका लागि दुःख गर्नुभएको छ । तर मैले बितेको पाँच वर्ष देशभर भ्रमण गर्दा कांग्रेसका साथीहरूले पार्टी गलत दिशामा गएको भनेका छन् । पार्टी अत्यन्त लथालिंग हिसाबले चलेको छ । शेरबहादुरजीको प्रतिस्पर्धामा मलाई कुनै भारीको महसुस भएको छैन । उहाँले राम्रो काम गरेको भए, विधिअनुसार कांग्रेस चलाएको भए आज कांग्रेसको यो अवस्था हुन्थेन । शेरबहादुरजीले आफ्नै गृहजिल्ला डडेलधुरामा पुलिस लगाएर पार्टीको निर्वाचन गराउनुपर्ने अवस्था आयो । देशको प्रधानमन्त्री र पार्टीको सभापति भएको व्यक्तिले किन त्यस्तो गर्नुपर्‍यो ? उहाँले जे भने पनि साथीहरूको मानिहाल्थे । उहाँलाई आदर गर्छन्, सम्मान छन् ।

पार्टीको महाधिवेशनमा राज्य शक्तिको दुरुपयोग गरिएकाले निर्वाचन निष्पक्ष छैन भन्न खोज्नुभएको हो ?

यसमा कुनै शंका छ र ? मलाई त शंका छैन । देशभरिको कुरा गर्दै छु । प्रहरी प्रशासन र गृह प्रशासनले खेलेको भूमिका हेर्नुस् । मन्त्रीहरू गएर डीआईजी कार्यालयको गेस्टहाउसमा भेटघाट गर्न थालेपछि के सोच्ने ? यो कांग्रेसको संस्कार होइन । कांग्रेसको संस्कृति त गाउँमा साथीहरूसँग भेटेर कुरा गर्ने हो ।

केन्द्रको महाधिवेशनमा पनि त्यस्तो अवस्था देखिएको छ र ?

दुईचार दिनअघिको कुरा हो, उहाँ (देउवा) ले इन्टिलिजेन्टका मान्छे मेरै घरमा पठाउनुभयो । मैले ती व्यक्तिलाई सोधें । त्यसपछि आईजीलाई फोन गरें । मेरो घरमा इन्टिलिजेन्सका व्यक्ति किन पठाउनुपर्‍यो ? शेखर कोइरालाको ‘मोमेन्ट’ कहाँ छ भनेर पत्ता लगाउन खोजिएकै होला । प्रहरीसँग कांग्रेसका प्रतिनिधि कसकसले जितेको छ भनेर लिस्ट माग्नुहुन्छ । कांग्रेसभित्रको कुरा किन प्रहरीसँग माग्नुपर्‍यो ? त्यसले पार्टी कता जाँदै छ भन्ने देखाउँछ । यो अत्यन्तै गम्भीर कुरा हो । अति भइसकेपछि मैले यो कुरा आज खोल्नुपर्‍यो । निर्वाचन समितिबाट पनि गलत निर्णय भइरहेका छन् । निर्वाचन समितिका मान्छे हाम्रा न्यायाधीश हुन् । उहाँहरूले सबै निर्णय सभापतिको पक्षमा गर्दै हुनुहुन्छ । तर पनि हामी प्रतिस्पर्धा गर्दै छौं, त्यो सबैभन्दा ठूलो कुरा हो ।

विधि–विधान मिचेको र पार्टी लथालिंग भएको भन्नुभयो, तपाईं सभापति चुनिनुभयो भने कसरी पार्टी चलाउने योजना छ ?

पार्टीको विधान छ । त्यसैमा टेकेर हिँड्ने हो । मलाई विधानका धेरै कुरा चित्त बुझेको छैन । बौद्धिक सर्कल र कांग्रेसका नेताहरू बसेर एउटा सानो टिमले विधान परिमार्जन गरोस् । विधान हुबहु पालना गर्नुपर्छ ।

प्रतिस्पर्धाबाट रामचन्द्र पौडेल बाहिरिएपछि तपाईंले दोस्रो पुस्ताको प्रतिनिधित्व गर्नुभएको छ । तर उमेरमा ६/७ वर्षको मात्रै फरक छ । देउवाभन्दा आफूलाई कसरी फरक ठान्नुहुन्छ ?

लोकतन्त्रका लागि उहाँले खेलेको भूमिकाको कदर गर्नैपर्छ । तर उहाँ गुटको राजनीति गर्दै हुनुहुन्छ । गिरोहको राजनीति गर्दै हुनुहुन्छ । त्यो अन्त्य गर्नुपर्छ । गिरोहले कांग्रेसलाई समाप्त गर्न लागेको छ । अहिलेकै अधिवेशनमा जसरी पैसाको चलखेल भएको छ, जसरी खर्च गरिरहनुभएको छ, त्यो कल्पना गर्न नसकिनेछ । तपाईंहरू विश्वास नै गर्न सक्नुहुन्न । त्यसरी पार्टी चल्छ ? पार्टीको आमकार्यकर्ता निमुखा छन् । लडाइँ लडेर आएका छन् । पार्टी बचाउन आएका हुन् । काठमाडौंमा बसेका दुई/चार जना ठूला घरानाले पार्टी चलाउने होइन । तर त्यो भइरहेको छ । विकृति विसंगति कांग्रेसमा छिरिसकेको छ । त्यो कल्पना बीपी कोइरालाले गर्नुभएको थियो र ? गणेशमान र किसुनजीले गर्नुभएको थिएन । गिरिजाबाबुले गर्नुभएको थिएन । सुशीलदाको त कुरै छाडौं ।

इमानदार कार्यकर्ता पाखा पर्ने, धनवाद र डनवाद भित्रिने गरेको भनेर पार्टीभित्रै धेरै आवाज उठ्ने गर्छ । तपाईं सभापति हुनुभयो भने यसलाई अन्त्य गर्ने सामर्थ्य राख्नुहुन्छ ?

त्यसको अन्त्य गर्नैपर्छ । नत्र कांग्रेस चल्न सक्दैन । यस्तो विकृतिले कांग्रेसलाई पछाडि धकेल्दै छ ।

शासकीय अनुभव त तपाईंसँग भएन । पार्टीमा पनि लामो अनुभव नभएको भनेर भन्ने गरिन्छ । तपाईं आफैं सभापति हुनुभयो भने यो पार्टीलाई कसरी चलाउँछु भन्ने लागेको छ ?

अनभव भएका व्यक्तिहरूले मुलुक बिगारेका छन् । विगतमा जेजस्ता संसदीय विकृति भए, त्यो अनुभव भएकै व्यक्तिबाट भएका हुन् । पजेरो काण्ड मैले गरेको होइन । अनुभव भएकै व्यक्तिबाट भएको हो । अहिले देशमा भ्रष्टाचार र विकृति बढेको ग्राफ आइरहेको छ, त्यो सबै अनुभव भएका व्यक्तिहरूबाट भएका हुन् । मैले एउटा संस्था (धरानको बीपी कोइराला स्वास्थ्य विज्ञान प्रतिष्ठानको उपकुलपति छँदा) लाई विकास गर्न मौका पाएको थिएँ । अहिले किन बिग्रियो र म हुँदा कस्तो थियो भन्ने कुरा तपाईंहरूले हेर्नुहोस् ।

दोस्रो कुरा म केन्द्रीय सदस्य नै हो । मलाई जुनियर हो भन्ने चार्ज पनि लाग्यो । हो, म कहिल्यै सिनियर हो कहिल्यै भन्दिनँ । कोही सिनियर मेरै घर आउनुभयो भने पनि म कुर्सीबाट उठ्दिन्छु । सम्मानसाथ बस्नुहोस् भनेर राख्छु । अनुभव र सिनियर भन्नेले मात्रै हुन्न । राजनीतिक संस्कार पनि चाहिन्छ । राजनीतिमा नैतिकतामा आधारित संस्कार हुनुपर्छ । नैतिकता गुमाउन थाल्यो भने त्यहाँ राजनीति रहन्न । नैतिकता र संस्कार गुमेको पार्टी पार्टी हुन सक्दैन । अहिलेको नेतृत्वले नैतिकता गुमाइसक्नुभएको छ ।

शेरबहादुर देउवासँग देश चलाएको लामो अनुभव र सबैलाई मिलाउन सक्ने क्षमता छ भनेजस्तै तपाईंको पछाडिको बल के हो ?

विचार, टिम र कार्यक्रम नै मेरो पछाडिको बल हो । नयाँ सोच र नयाँ ऊर्जाका साथ पार्टीलाई अघि बढाउन युवालाई अघि लगाउनुपर्छ । युवाको टिमलाई सँगै लैजान सकिएन भने हामी अघि बढ्न सक्दैनौं । युवालाई अघि नबढाई गतिशील कांग्रेस बन्दैन । अनुभव भएका साथीहरू पनि केन्द्रीय सदस्यमा आउनुहुन्छ । रामचन्द्रजी हुनुहुन्छ । अहिलका सभापति हुनुहुन्छ । उहाँहरू सबैलाई साथ लिएर जान्छु । उहाँलाई बेवास्ता गरेर हिँड्न खोजेको छैन । कांग्रेस अब एउटा व्यक्तिको सोचले चल्दैन । सामूहिक सोच र चिन्तनलाई अघि बढाउन खोजेको छु । रामचन्द्रजीप्रति हाम्रो त्यत्तिकै सम्मान हुन्छ । उहाँ सम्मानित व्यक्ति हो । शेरबहादुरजीको पनि उत्तिकै अनुभव छ । अनुभवका राम्रा पक्षलाई हामी लिन्छौं ।

तपाईंको पछाडि रहेका युवाले विचार र सपनासँग तपाईंको गति कत्तिको मेल खान्छजस्तो लाग्छ ?

मैले नेतृत्व गरेको टिममा उपसभापतिमा धनराज गुरुङ र चन्द्र भण्डारी हुनुहुन्छ । उहाँहरू भ्रष्टाचारविरुद्धको मिसनमा हिँड्नुभएको छ । जवाफदेहिता, पारदर्शिता, उत्तरदायित्वलाई साथ लिएर हिँड्ने हाम्रो प्रण छ । महामन्त्रीमा गगनजी, मीनेन्द्रजी, दिलेन्द्रजी हुनुहुन्छ । पदाधिकारीमा सबै युवा हुनुहुन्छ । कोही दुई, कोही तीनचोटि केन्द्रीय सदस्य बनिसकेको हुनुहुन्छ । हाम्रो भावना र गति मिलेकै कारणले त यो टिम बनेको हो ।

सभापति हुँदा यस्तो कांग्रेस बनाउने भन्ने तपाईंको आफ्नै योजना के छ ?

गतिशील र ऊर्जाशील कांग्रेस बनाउने नै मेरो योजना हो । नयाँ विचार र कार्यक्रमको सोच लिएर अघि बढेका छौं । त्यसलाई मूर्तरूप दिन खोजेका छौं । मैले सातवटा संकल्प पनि अघि सारेको छु । संविधानको कार्यान्वयन मेरो पहिलो प्र्राथमिकता छ । अहिले संघीय गणतन्त्रमाथि नै धावा बोलिँदै छ । धरापमा पार्न खोजिएको छ । संविधानको बलियो कार्यान्वयनले मात्रै यो परिवर्तनलाई स्थायित्व दिन सकिन्छ । अहिलेको नेतृत्वमा वैचारिक स्पष्टता छैन । राष्ट्रियताका बारेमा प्रस्ट दृष्टिकोण छैन । समाजवाद भनिएको छ, तर ‘भेग’ छ । नेपाललाई सुहाउँदो के ठीक हुन्छ, त्यसैलाई हामीले लिएर अघि बढ्नुपर्छ । जस्तो– शिक्षा र स्वास्थ्यमा हाम्रो प्राथमिकता हुनुपर्छ । पार्टी संगठनलाई ऊर्जाशील बनाउन भ्रातृ संस्था र शुभेच्छुक संस्थालाई क्रियाशील बनाउनुपर्छ । भ्रातृ संस्थाहरू क्रियाशील नभई पार्टीको संगठन अघि बढ्न सक्दैन । कुनै पनि भ्रातृ संस्थाको अधिवेशन वर्तमान नेतृत्वले गर्न सकेन । गुटको मानिस भेला हुने, भागबन्डा गर्ने र त्यसैका आधारमा चलाउने गरियो । भागबन्डा र गुटको अन्त्य गर्ने मेरो संकल्प छ । अनुभव र ऊर्जाको संम्मिश्रण नै मेरो शक्ति हो । त्यसलाई साथ लिएर अघि बढ्छु ।

तपाईंले ‘एकपटक, यसैपटक’ भन्ने नारा बनाउनुभएको छ । किन ?

मैले अहिले मात्रै होइन, सुशील कोइराला सभापति छँदा पनि भनेको विषय हो । सुशीलदाले, दोस्रोपटक पनि सभापति उठ्ने निधो गरिसक्नु भएको थियो । तर, म त्यसविरुद्ध थिएँ । मैले दोस्रोपटक रामचन्द्रजीलाई साथ दिएर हिँडेको थिएँ । सुशीलदा मसँग रिसाउनुभयो । मैले कान्तिपुर हेडलाइनरमा अन्तर्वार्ता दिँदै केन्द्रीय सभापति एक पटक मात्रै उठ्नुपर्छ भनेर सार्वजनिक रूपमै भनिदिएँ । एकपटक मात्रै सभापति हुने अवस्था बनेन भने गुटबन्दी सुरु हुन्छ भनेको थिएँ । त्यस बेलादेखि आजको दिनसम्म पनि म आफ्नो बोलीमा अडिग छु । म जे बोल्छु, त्यसलाई पालना गरेरै छाड्छु । त्यसैले मैले ‘एकपटक, यसैपटक’ भन्ने नारा ल्याएको हो । यो मेरो अन्तरआत्माले बोलेको हो, हचुवाको भरमा होइन ।

सभापति भएपछि प्रधानमन्त्री नबन्ने भन्नुभएको छ । यो पनि लागू हुन सक्ला त ?

अहिले पनि भन्दै छु, म लागू गर्छु । विश्वास दिलाउन चाहन्छु । त्यसमा ढुक्क हुनुहोस् । यसमा कुनै द्विविधा राख्नुपर्ने अवस्था छैन । कांग्रेसमा पार्टी संगठित भयो, राम्रो हुँदै गयो भने पछि पार्टी सभापति नभए पनि प्रधानमन्त्री बन्न सकिन्छ । पार्टीको संगठन नै राम्रो भएन भने प्रधानमन्त्री बन्न धेरै कुरा मिल्नुपर्छ । गुटबन्दी हुन्छ ।

तपाईंको आफ्नै समूह एक ठाउँमा उभिन सकेको छैन । कोइराला परिवार पनि विभाजित बन्न पुगेको छ । यस्तो अवस्थामा तपाईंले आफूलाई कसरी बलियो उम्मेदवार मान्नुहुन्छ ?

बलियो त कार्यकर्ताले बनाउने हो । कार्यकर्ताको उत्साह र उमंग नेतृत्व परिवर्तनप्रति छ । हो, हाम्रो समूहमा समस्या नउठेको होइन । समस्या आउँदैन भन्ने पनि होइन । सुरुमा त रामचन्द्रजीलाई अभिभावक भएर बसिदिनुहोस् भनेर मैले नै भनेको हो । उम्मेदवार मनोनयनको नजिक आउँदा मैले उहाँलाई सहमतिको उम्मेदवार हुनुभयो भने मलाई आपत्ति छैन, म छाडिदिन्छु भनेको हो । अन्तिम पटक पनि रामचन्द्रजीले अहिले म बसिरहेकै कुर्सीमा बसेर मेरो नाममा सहमति गरौं भनेर भन्नुभयो । मैले मानेकै हो । प्रकाशमानजीले स्वीकार गर्नुभएन । प्रकाशमानजीले नमानेपछि रामचन्द्रजीलाई उठ्न राम्रो हुन्न भन्ने मेरो सुझाव थियो । रामचन्द्रजी हाम्रो सम्मानित नेता हो । देशको परिस्थिति एकदमै नाजुक छ । अहिलेको सरकारले पनि काम गर्न सकेको छैन । न्यायपालिका त्यस्तै हालतमा छ । संविधान धरापमा पर्छ कि भन्ने चिन्ता छ । कोही न कोही एउटा व्यक्ति बाहिर हुँदा राम्रो हुन्छ । जस्तो गणेशमानजीले बाहिर बसेर लड्नुभएको थियो । त्यस्तै रामचन्द्रजीले पनि बाहिर बसेर देश र पार्टीभित्रका विकृति, विसंगति लड्नुभयो भने राम्रो हुन्छ भनेर मैले भनेको हो । प्रकाशमानजीले नछाडेपछि त्यसो भए म उठ्दिन भन्नुभयो । यसलाई उहाँले अन्यथा लिनुभएको छ भने म क्षमा माग्छु । उहाँ यति सम्मानित व्यक्तित्व हुनुहुन्छ कि, मलाई कुरा गर्न पनि अहिले अप्ठ्यारो भइरहेको छ ।

तपाईंकै समूहबाट सभापतिमा प्रकाशमान सिंहको पनि उम्मेदवारी छ । त्यसलाई कसरी लिनुभएको छ ?

म पहिलो चरणमै सफल हुन्छु भन्ने विश्वासमा छु ।

त्यसका आधार के छन् ?

कार्यकर्ताको बडी ल्याङ्वेजले मेरो आत्मविश्वास बढाएको छ । मनोनयनमै उपस्थित मेचीमहाकालीका साथीहरूको मप्रति जुन विश्वास देखें, त्यही नै मेरो मुख्य आधार हो ।

शेरबहादुर देउवाले आफूले जित्न नसके गठबन्धनको सरकार जान्छ, फेरि ओलीको शासन सुरु हुन्छ भन्नुभएको छ नि ?

देशका प्रधानमन्त्री र पार्टीका सभापति यति निरीह हुनुहुन्छ भन्ने मैले कल्पना नै गरेको थिइनँ । उहाँ हावादारी र गलत कुरा भनिरहनुभएको छ । झूटको खेती गर्दै हुनुहुन्छ । उहाँको नेतृत्व जाँदै छ । हाम्रो टिमले जितेपछि यो सरकार, यो गठबन्धन अझै सुदृढ हुन्छ । गठबन्धनलाई आगामी चुनावसम्मै लैजान्छौं । यहाँ गठबन्धन रहने–नरहने कुरा शेरबहादुरजीले किन गरिरहनुभएको हो ? कांग्रेसको महाधिवेशनमा प्रचण्ड र माधव नेपालले भोट दिने हो र ?

प्रकाशित : मंसिर २७, २०७८ ०७:००
पूरा पढ्नुहोस्
प्रतिक्रिया
पठाउनुहोस्
×