अर्थ मन्त्रालयका अवकाशप्राप्त अधिकृतलाई डेढ करोडको भ्रष्टाचार मुद्दा- समाचार - कान्तिपुर समाचार
कान्तिपुर वेबसाईट
AdvertisementAdvertisement

अर्थ मन्त्रालयका अवकाशप्राप्त अधिकृतलाई डेढ करोडको भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरूपयोग अनुसन्धान आयोगले अर्थ मन्त्रालयबाट अवकाशप्राप्त अधिकृत उद्धवप्रसाद थपलियाविरुद्ध विशेष अदालतमा भ्रष्टाचार मुद्दा दायर गरेको छ । करिब २५ वर्ष सरकारी पदमा रहँदा डेढ करोडभन्दा बढी रकम अवैध रूपमा आर्जन गरेको अभियोग लगाउँदै अख्तियारले उनीविरुद्ध मुद्दा दायर गरेको हो । 

अख्तियारका प्रवक्ता नारायणप्रसाद रिसालले आयोगको अनुसन्धानबाट थपलियाले एक करोड ६४ लाख ८९ हजार ७०० रूपैयाँ अवैध रूपमा कमाएको देखिएको बताए । २०४० फागुन ६ गते सरकारी सेवामा प्रवेश गरेका थपलियाले २०७५ चैत ३० मा अवकाश पाएका थिए । अख्तियारले उक्त अवधिमा थपलियालको आम्दानी र खर्चको विश्लेषण गरेको थियो । जसमा थपलियाले कमाएको दुई करोड ६७ लाख ७१ हजार ९५८ रूपैयाँमध्ये एक करोड दुई लाख ८२ हजार २५८ रूपैयाँको मात्र स्रोत खुलेको अख्तियारको दाबी छ ।

अख्तियारले विशेष अदालतमा दयार गरेको अभियोगपत्रमा थपलियाबाट स्रोत खुल्न नसकेको सम्पत्ति जफत गर्न, उनलाई दुई वर्षसम्म कैद गर्न र स्रोत नखुलेको भनिएको सम्पत्ति (बिगो कायम) बराबर जरिवाना गर्न पनि माग गरेको छ ।

त्यसैगरी थपलियाकी पत्नीको नाममा भएको घरजग्गा तथा बैंक खाताहरूमा रहेको रकम पनि जफत गर्न माग गरेको छ ।


प्रकाशित : मंसिर २३, २०७८ १८:५८
प्रतिक्रिया
पठाउनुहोस्

साना तथा मझौला उद्योगका उत्पादनलाई दराजमा नि:शुल्क सेवा

कान्तिपुर संवाददाता

काठमाडौँ — साना तथा मझौला उद्योग (एसएमईज)का उत्पादनले अब अनलाइन बजार दराजमा नि:शुल्क सेवा पाउने भएका छन् । निजी क्षेत्रको छाता संस्था नेपाल उद्योग वाणिज्य महासंघ (एफएनसीसीआई) र अनलाइन दराजबीच यसबारे सम्झौता भएको हो । सम्झौतापत्रमा एफएनसीसीआईका अध्यक्ष शेखर गोल्छा र दराजका प्रबन्ध निर्देशक लिनो अहलरिङले हस्ताक्षर गरे । 

यो सम्झौताले साना तथा मझौला उद्योगका उत्पादनहरूलाई राष्ट्रिय तथा अन्तर्राष्ट्रिय ग्राहकसम्म सहजरूपमा पुर्‍याउने महासंघको भनाइ छ । महासंघसँग जोडिएका साना तथा मझौला उद्यमीहरूलाई दराजको अनलाइन सपिङमा एकीकृत गरी उनीहरूका उत्पादनलाई दराजमार्फत विक्रीवितरण हुने छ । व्यापक ई–कमर्स प्रशिक्षण तथा शिक्षा दिने र दर्ता र अनलाइन पसल स्थापनामा दराजले सहयोग गर्नेछ भने महासंघले आफ्नो नेटवर्कमार्फत सबै एसएमइज उत्पादनलाई दराजको अनलाइन सपिङमा जोड्न पहल गर्नेछ ।

एफएनसीसीआई र दराज बीचको सम्झौताअनुसार दर्ता भएका साना तथा मझौला उद्योगले एक वर्षको लागि दराजको अनलाईन सपिङमा नि:शुल्क डिस्प्लेको सुविधा पाउनेछन् । जनवरी २०२२ देखि डिसेम्बर २०२२ सम्म एसएमईजको लागि कुनै शुल्क लाग्ने छैन । साथै आवश्यक प्रचार, दृष्य सामग्रीको सुविधा पाउनेछन् । सम्झौता अनुसार साना तथा मझौला उद्योगहरूलाई आफ्नो अनलाइन व्यापार वृद्धि गर्नको लागि सही शिक्षा र सीपहरू दराजले प्रदान गर्नेछ । यसले एसएमईज बिक्रेता तथा ग्राहकलाई एकै ठाउामा ल्याउन मद्दत पुग्नेछ ।

हाल दराजले काठमाडौं, पोखरा, विराटनगर, भरतपुर, वीरगन्ज, जनकपुर, बुटवल, धनगढी र बिर्तामोडका १२ हजारभन्दा बढी बिक्रेतालाई सेवा प्रदान गरिरहेको छ । यी बिक्रेताहरूले नेपालका ४७ भन्दा बढी सहरमा आफ्ना उत्पादन तथा सेवा प्रदान गरिरहेका छन् । सो अवसरमा महासंघका अध्यक्ष गोल्छाले दराजसँगको सहकार्य एसएमईजको पुनरूत्थानमा कोशेढुंगा हुने बताए । गोल्छाले यो अवसरको भरपुर लाभ उठाउन पनि साना उद्यमीहरूलाई आग्रह गरे ।

नेपालका अन्य क्षेत्रबाट थप बिक्रेताहरूलाई दराजमा भित्र्याउन र व्यवसायिक सफलता हासिल गर्न सहयोग पुग्ने दराजका प्रवन्ध निर्देशक लिनो अलरिङ्गले बताए । ‘एसएमईज क्षेत्रलाई अझै धेरै सहयोगको खाँचो छ त्यसैले हामी नेपालभरका साना व्यवसायहरूको सशक्तीकरणका लागि काम गरिरहने छौं’ उनले भने ।

प्रकाशित : मंसिर २३, २०७८ १८:५१
पूरा पढ्नुहोस्
प्रतिक्रिया
पठाउनुहोस्
×