प्रकृति बिगारेर होइन सिँगारेर विकास गर्नुपर्छ : राष्ट्रपति भण्डारी- समाचार - कान्तिपुर समाचार
कान्तिपुर वेबसाईट
AdvertisementAdvertisement

प्रकृति बिगारेर होइन सिँगारेर विकास गर्नुपर्छ : राष्ट्रपति भण्डारी

रासस

काठमाडौँ — राष्ट्रपति विद्यादेवी भण्डारीले प्रकृतिलाई बिगारेर नभएर सिँगारेर मुलुकको विकास गर्नुपर्ने भावना नीति निर्माणका सबै तहमा स्थापित गर्नुपर्ने बताएकी छन् ।

मानव र प्रकृति एकअर्कासँग जोडिएको भन्दै मानव अस्तित्व पर्यावरणको सन्तुलनसँग गाँसिएको हुने उनले बताइन् । सामुदायिक वन उपभोक्ता महासंघले लैंगिक हिंसा विरुद्धको १६ दिने अभियानअन्तर्गत आइतबार आयोजित कार्यक्रममा राष्ट्रपति भण्डारीले यस्तो बताएकी हुन् ।

समाजमा अझै पनि लैंगिक हिंसा विभिन्न रूपले अस्तित्वमा रहिरहनु चिन्ताको विषय भएको उनले बताइन् । 'एकातिर छाउपडी, बोक्सी, दाइजोजस्ता कुप्रथा निर्मूल गर्न संघर्ष गर्नुपरेको छ भने अर्कोतिर कार्यस्थल तथा सार्वजनिक क्षेत्रमा हुने दुर्व्यवहार एवं प्रविधिका माध्यमबाट महिलाविरुद्ध हुने हिंसा तथा शोषणाका नयाँ रूप प्रकट भइरहेका छन् । यी विकृतिको अन्त्य गर्न नीति र कानुनको निर्माण एवं तिनको प्रभावकारी कार्यान्वयन आवश्यक रहेकोतर्फ सम्बद्ध सबै निकायको ध्यानाकर्षण गराउँदछु,' राष्ट्रपति भण्डारीले भनिन् ।

यस्तै समाजबाट लैंगिक हिंसा उन्मूलन गर्न महिला र पुरुष दुवैको उत्तिकै सक्रियता आवश्यक रहेको पनि उनको भनाइ थियो । यस्ता अभियानमा आफ्नो क्षेत्रबाट योगदान गर्न सरोकारवाला सबै सरकारी निकाय तथा सामाजिक संघसंस्थालाई आह्वान गरेकी थिइन् ।

प्रकाशित : मंसिर १९, २०७८ १८:०७
प्रतिक्रिया
पठाउनुहोस्

‘मोम्चो’ कथासंग्रह सार्वजनिक

रमेशकुमार पौडेल

चितवन — चेपाङ समुदायको दैनिकीमा आधारित कथासंग्रह ‘मोम्चो’विमोचन गरिएको छ । बसन्त पराजुलीद्वारा लिखित उक्त कथासंग्रह आइतबार गैंडाकोटमा सार्वजनिक गरिएको हो । चेपाङ भाषाको शब्द मोम्चोको अर्थ महिला वा नारी हो ।


चेपाङ समुदायको पीडा व्यथा समेट्ने क्रममा उनीहरुकै भाषाको शब्द राखेर कथासंग्रह निकालेको पराजुलीले बताए । चितवनका पत्रकारसमेत रहेका पराजुलीको यो कृतिमा ११ वटा कथाहरु रहेका छन् ।

भुँडीपुराण प्रकाशन प्रालिले प्रकाशन गरेको कृतिको विमोचन चेपाङ किशोरी रमिता चेपाङले नै गरिन् । ‘मोम्चो चेपाङ समुदायमा बढ्दो बालविवाह र त्यसपछि महिलाले भोग्नु परेका समस्यामा केन्द्रित कथा हो’, पराजुलीले भने । पराजुलीको यो दोस्रो कथासंग्रह हो । उनले डेढ वर्षअघि ‘कुमाता’ कथासंग्रह प्रकाशित गरेका थिए ।

अक्षर समूह चितवनको आयोजनामा गरिएको विमोचन कार्यक्रममा कृतिमाथि वरिष्ठ साहित्यकार श्रीओम श्रेष्ठ ‘रोदन’ र आख्यानकार अश्विनी कोइरालाले समीक्षा गरेका थिए ।

प्रकाशित : मंसिर १९, २०७८ १७:५३
पूरा पढ्नुहोस्
प्रतिक्रिया
पठाउनुहोस्
×