दलहरूलाई स्वास्थ्यमन्त्रीको आग्रह- चुनावका बेला पर्चा लिएर गाउँ जानुभयो, अब खोप लिएर जानुस्- समाचार - कान्तिपुर समाचार
कान्तिपुर वेबसाईट
AdvertisementAdvertisement

दलहरूलाई स्वास्थ्यमन्त्रीको आग्रह- चुनावका बेला पर्चा लिएर गाउँ जानुभयो, अब खोप लिएर जानुस्

कान्तिपुर संवाददाता

काठमाडौँ — स्वास्थ्य तथा जनसंख्यामन्त्री विरोध खतिवडाले राजनीतिक दलहरूलाई खोप लिएर मतदाताकहाँ जानका लागि आग्रह गरेका छन् । चुनावका बेला पर्चा लिएर भोट माग्न जनताकहाँ गएका राजनीतिक दलहरूले जनता कोरोना संक्रमणमा परेका बेला उपचारको व्यवस्था गर्न पनि गाउँघर जानुपर्ने उनको आग्रह थियो । 

प्रतिनिधिसभाको शिक्षा तथा स्वास्थ्य समितिको आइतबारको बैठकमा मन्त्री खतिवडाले खोपका झोला र चिकित्सक लिएर गाउँमा जान आग्रह गरेका हुन् । 'हामीले भोट माग्नका लागि नमस्कार गर्दै घरघर गएका हुन्छौं । खोप र दुई जना सुई लगाउन जान्ने स्वास्थ्यकर्मी र खोपका झोला बोकेर गाउँगाउँका पचास, एक सय, दुई सय परिवार भएका गाउँमा गएर 'सधैं हामी पर्चा बाँड्दै भोट माग्न आएका थियौं, यो पटक तपाईंको स्वास्थ्य उपचारको लागि खोप लिएर आएका छौं, यो लगाउनुस्' भनेर सबै दलहरू हिँड्दिनुस् । सबै संघ संस्था हिँडिदिनुस्,' उनले आग्रह गरे ।

खोप लगाउनका लागि सुरुका दिनमा मान्छेको भीड भएको तर पछिल्लो समय अपेक्षित रूपमा जनता खोप लगाउन नआएकाले यस्तो आग्रह गर्नुपरेको मन्त्री खतिवडाको भनाइ थियो । काठमाडौंका ठूला अस्पताल र नाकामा खोपको व्यवस्था गर्दा पनि अपेक्षित रूपमा सहभागिता नरहेको उनले बताए ।

काठमाडौंका ठूला अस्पतालका साथै चार नाकामा पनि कोरोना भाइरस विरुद्धको खोपको व्यवस्था गरिएको छ । बल्खु, थानकोट, गोंगबु र कोटेश्वर नाकामा खोपका लागि जनशक्तिको व्यवस्था गर्दा पनि उल्लेख्य सहभागिता नभएको मन्त्रालयका अधिकारीको भनाइ थियो । ती सीमा नाकामा सुरुका दिनमा साढे ३ हजारले खोप लगाएको तर पछिल्लो समय खोप लगाउने मानिसको संख्या घटेको उनीहरूको भनाइ थियो ।

सरकारले अबको केही दिनमा बालबालिकालाई खोप लगाउने केन्द्रहरूमा नै कोरोनाको खोप लगाउनका लागि व्यवस्था गर्न लागेको उनले जानकारी दिए । त्यस्ता खोप केन्द्र मुलुकभर १६ हजार रहेका छन् । त्यस्तै, चुनावका बेला स्थापना गरिने बुथहरूलाई पनि कोरोनाविरुद्धको खोपकेन्द्रका रूपमा विकास गरिने योजनामा मन्त्रालय रहेको अधिकारीले बताएका थिए ।

मन्त्री खतिवडाले विद्यार्थीलाई खोप लगाउनका लागि विद्यालयलाई खोप केन्द्र बनाउने तयारी भइरहेको पनि जानकारी दिए । १२ वर्ष माथिका बालबालिकालाई लगाउन मिल्ने खोप आयातको चरणमा रहेको जानकारी दिँदै उनले विद्यालयमा नै खोप लगाउने व्यवस्था गर्न लागिएको बताए । समितिले कोरोनाको नयाँ भेरियन्ट ‘ओमिक्रोन’ लाई लिएर सचेतना अपनाउन सरकारलाई निर्देशन दिएको छ । भारतमा कोरोनाको नयाँ भेरियन्ट पुष्टि भइसकेकोले नेपालमा पनि आवतजावतबाट संक्रमण फैलिन सक्ने सम्भावना रहेको भन्दै समयमै सचेतता अपनाउन समितिले भनेको हो ।

‘खोपलाई छिटो भन्दा छिटो जनताकोमा पुर्‍याउने कुरा, लगाउने कुरा मन्त्रालयको योजनामा राखिसक्नु भएको छ । हाम्रो समितिको अपेक्षा के हो भने यो कुरा चाँडै कार्यान्वयन होस् भन्ने आग्रह गर्न चाहन्छु,' समिति सभापति जयपुरी घर्तीले सरकारलाई निर्देशन दिने क्रममा भनिन्, 'ज्येष्ठनागरिकलाई स्वास्थ्य मन्त्रालयले घरघरै गएर खोप लगाउने व्यवस्था गर्दा राम्रो हुन्छ ।यो व्यवस्था स्वास्थ्य मन्त्रायले गरोस् । खोप लगाउने नियमित समय नतोकिकन खुल्ला राख्नुपर्छ । बाहिरबाट आएका मानिसहरूलाई खोप नगरपालिका, गाउँपालिका र वडामा जतिबेला जान्छन् त्यतिबेला खोप लगाउने व्यवस्था गर्नुपर्छ ।'

समितिले सबै नागरिकले थाहा पाउने गरी खोपको बारेमा जनचेतना जगाउनका लागि सरकारलाई निर्देशन दिएको छ । नयाँ भेरियन्टलाई रोक्न र सम्भावित खतरालाई लिएर पूर्वतयारी गर्न समितिले सरकारलाई भनेको हो । 'ओमिक्रोनबाट बच्न र आम मानिसमा भय हुन नदिन शतर्कता अपनाउनु पर्छ भन्ने कुराको चेतना दिनुपर्छ । यो आइहाल्यो भने त हामीलाई गाह्रो हुन्छ, त्यसको पूर्व तयारीको लागि मन्त्रालय लाग्नुस् । नेपालमा ओमिक्रोनको खतरा सबैभन्दा धेरै भारतबाट नै छ,' समितिको निर्देशनमा भनिएको छ, 'भारतबाट आउने मानिस सबैलाई खोप लगाएको कार्ड र आउने बेला पीसीआर यी दुई वटा कुरामा मन्त्रालयले ध्यान दिनुपर्छ ।'

सरकारलाई अक्सिजन, भेन्टिलेटरलगायत स्वास्थ्य उपचारका सामग्रीको जोहो गर्न पनि समितिले निर्देशन दिएको छ ।

प्रकाशित : मंसिर १९, २०७८ १७:३९
प्रतिक्रिया
पठाउनुहोस्

देशभर पुस्तान्तरणको मुद्दा लिएर जाने छु : लिङ्देन

कान्तिपुर संवाददाता

काठमाडौँ — राष्ट्रिय प्रजातन्त्र पार्टी (राप्रपा)का नवनिर्वाचित अध्यक्ष राजेन्द्र लिङ्देनले पार्टीभित्र मात्रै नभएर अन्य देशका पार्टीमा पनि पुस्तान्तरणको विषय अघि बढ्ने बताएका छन् । 

प्रज्ञा प्रतिष्ठानमा आइतबार आयोजित प्रमाणपत्र वितरण तथा शपथग्रहण कार्यक्रम बोल्दै पुस्तान्तरणको विषय सुरु भएको बताएका छन् । 'राप्रपामा मात्रै होइन देशमै पुस्तान्तरणको मुद्दा लिएर जाने छु,' लिङ्देनले भने 'राप्रपाको महाधिवेशनलाई देशका अन्य पार्टीका मानिस, बुद्धिजीवी र पत्रकारको ध्यान कम आकर्षित भएका छन् । यो ध्यानाकर्षण एमालेको महाधिवेशन भन्दा कम छैन ।'

उनले राप्रपालाई वैकल्पिक प्रजातान्त्रिक शक्तिमात्रै नभएर केन्द्रको रुपमा स्थापना गर्ने प्रयास हुन्छ । नेतृत्वका लागि शनिबार भएको निर्वाचनमा कमल थापालाई पराजित गर्दै राप्रपाको बागडोर लिङ्देनको हातमा पुगेको हो ।

कार्यक्रमा थापाको अनुपस्थितिलाई समेत सम्बोधनको क्रममा लिङ्देनले उठाएका थिए । 'कमल थापा पनि यहाँ हुनु भएको भए सुनमा सुगन्ध हुन्थ्यो । फेरि पनि पूर्ण विश्वासमा छु, हामीसँगै हुनेछौं । उहाँहरुको योगदान राप्रपाले सधैं प्राप्त गर्ने छ', लिङ्देनले भने, 'पार्टीका संस्थापक अध्यक्ष लोकेन्द्रबहादुर चन्दको भूमिका सदा जीवित राख्ने छौं ।' उनले निरन्तरतासहितको परिवर्तन देशका लागि मात्रै नभएर पार्टीमा पनि लागू हुने बताए ।

उनले नेतृत्वको मूल्याकंन आफ्नो क्षेत्रमा कति स्थानीय तह जित्यो भन्ने आधारमा हुने बताए । सम्बोधनको क्रममा उनले राजनीतिक एजेन्डा पुनर्स्थापना गर्नका लागि सदन र सडक दुवैबाट दबाब दिने बताएका छन् । राप्रपाले स्थानीय स्वायत्ततासहितको हिन्दु अधिराज्य स्थापना गर्ने एजेन्डा उठाउँदै आएको छ ।

प्रकाशित : मंसिर १९, २०७८ १७:३८
पूरा पढ्नुहोस्
प्रतिक्रिया
पठाउनुहोस्
×