राप्रपाका नवनिर्वाचित पदाधिकारी र केन्द्रीय सदस्यहरूद्वारा शपथग्रहण- समाचार - कान्तिपुर समाचार

राप्रपाका नवनिर्वाचित पदाधिकारी र केन्द्रीय सदस्यहरूद्वारा शपथग्रहण

कान्तिपुर संवाददाता

काठमाडौँ — राष्ट्रिय प्रजातन्त्र पार्टी (राप्रपा) का नवनिर्वाचित पदाधिकारी तथा केन्द्रीय सदस्यहरूले शपथ ग्रहण गरेका छन् । आइतबार काठमाडौंमा आयोजित एक समारोह बीच नवनिर्वाचित अध्यक्ष राजेन्द्र लिङदेनसहितका केन्द्रीय पदाधिकारी र केन्द्रीय सदस्यहरूले पद तथा गोपनियताको शपथ लिएका हुन् ।

नवनिर्वाचित केन्द्रीय अध्यक्ष लिङदेनले केन्द्रीय निर्वाचन समितिका संयोजक हरिबहादुर बस्नेतबाट शपथ लिएका थिए । त्यसपछि नवनिर्वाचित उपाध्यक्षहरू र महामन्त्रीहरूलाई बस्नेतले शपथ गराएका थिए । त्यसलगत्तै नवनिर्वाचित केन्द्रीय सदस्यहरूलाई अध्यक्ष लिङदेनले शपथ खुवाए ।

शपथग्रहण समारोहमा निवर्तमान अध्यक्षद्वय पशुपति शमशेर राणा र डा. प्रकाशचन्द्र लोहनी उपस्थित थिए भने अध्यक्षमा पराजित निवर्तमान अध्यक्ष कमल थापा सहभागी भएका थिएनन् । कार्यक्रममा केन्द्रीय निर्वाचन समितिका संयोजक बस्नेतले अध्यक्ष लिङदेनसहितका पदाधिकारी र केन्द्रीय सदस्यहरूलाई प्रमाणपत्र समेत वितरण गरेका थिए ।

काठमाडौंको भृकटीमण्डपमा आइतबार बिहान सम्पन्न एकता महाधिवेशनबाट लिङदेनको नेतृत्वमा ८ जना पदाधिकारी र १४१ केन्द्रीय सदस्य निर्वाचित भएका थिए । राप्रपाको १९९ सदस्यीय केन्द्रीय कार्यसमितिमा ५० जना सदस्य अध्यक्षले मनोनित गर्नेछन् ।

यससँगै २०६१ सालदेखि लगातार अध्यक्षमा रहेका नेता कमल थापा नेतृत्वबाट बाहिरिएका छन् । अध्यक्षमा पराजित भएपछि उनले आफूलाई हराउन पूर्वराजा ज्ञानेन्द्र शाहले पनि भूमिका खेलेको संकेत गर्दै प्रतिक्रिया दिएका छन् । उनले शीतल निवासले नांगो हस्तक्षेप गरेको भन्दै सामाजिक सञ्जालमा लेखेका छन् ।

प्रकाशित : मंसिर १९, २०७८ १६:४४
प्रतिक्रिया
पठाउनुहोस्

विश्व बैंकको सहयोगमा दुई अक्सिजन प्लान्ट सञ्चालन, पाँच वटा थपिँदै 

कान्तिपुर संवाददाता

काठमाडौँ — विश्व बैंकको आर्थिक तथा प्राविधिक सहयोगबाट बनेका दुई वटा अक्सिजन प्लान्ट सञ्चालनमा आएका छन् । सातवटै प्रदेशका प्रादेशिक अस्पतालमा सो बैंकको सहयोगमा प्लान्ट बनाउन थालिएको थियो । लुम्बिनी प्रादेशिक अस्पताल र प्रदेश नम्बर २ को जनकपुर प्रादेशिक अस्पतालमा निर्माण भएका प्लान्टहरू सञ्चालनमा आएका हुन् । सञ्चालनमा आएका अक्सिजन प्लान्ट प्रदेश सरकारलाई हस्तान्तरण गरिएको छ । 

स्वास्थ्य तथा जनसंख्या मन्त्रालयअन्तर्गतको गुणस्तर मापन तथा नियन्त्रण महाशाखा प्रमुख मदन कुमार उपाध्याय र विश्व बैंकको माल्दिभ्स, नेपाल तथा श्रीलंकाका कन्ट्री डाइरेक्टर फारिस हदाद जार्भोसले आइतबार यी दुई अक्सिजन प्लान्ट सम्बन्धित प्रदेशलाई हस्तान्तरण गरे ।

विश्व बैंकले आइतबार जारी गरेको विज्ञप्तिअनुसार बाँकी पाँच प्रदेशका अक्सिजन प्लान्ट पनि १५ दिनभित्र सञ्चालनमा आइसक्नेछन् । विश्व बैंकको सहयोगमा प्रदेश नम्बर १ को दमक नगरपालिका अस्पताल, बागमती प्रदेशको हेटौंडा अस्पताल, गण्डकी प्रदेशको पश्चिमाञ्चल क्षेत्रीय अस्पताल, कर्णाली प्रदेश अस्पताल र सुदूरपश्चिमको महाकाली प्रादेशिक अस्पतालमा अक्सिजन प्लान्ट बनिरहेका छन् ।

विश्व बैंकको कार्यक्रम ‘कोभिड–१९ इमर्जेन्सी रेस्पोन्स एन्ड हेल्थ सिस्टम प्रिपेयडनेस प्रोजेक्ट’अन्तर्गत रहेर यी प्लान्टहरू निर्माण गरिएका हुन् । आगामी तीन वर्षसम्मको सञ्चालन तथा मर्मत सम्भारको काम युनाइटेड नेसन अफिस फर प्रोजेक्ट सर्भिसेजमार्फत हुने विश्व बैंकले जनाएको छ ।प्रदेशहरुलाई अक्सिजन प्लान्ट हस्तान्तरणपछि बोल्दै स्वास्थ्य तथा जनसंख्या मन्त्री विरोध खतिवडाले सरकारले सामुदायिक र सरकारी स्वास्थ्य संस्थाहरुको क्षमता अभिवृद्धिका लागि पहल गरिरहेको दावी गरे । कोभिड– १९ महामारीका क्रममा माग बढ्ने मेडिकल अक्सिजन पर्याप्त मात्रामा उपलब्ध गराउन यी प्लान्टहरुले सहयोग गर्ने उनले बताए ।


प्रकाशित : मंसिर १९, २०७८ १६:३९
पूरा पढ्नुहोस्
प्रतिक्रिया
पठाउनुहोस्
×