राप्रपाको प्रमाणपत्र वितरण कार्यक्रममा आएनन् थापा- समाचार - कान्तिपुर समाचार
कान्तिपुर वेबसाईट
AdvertisementAdvertisement

राप्रपाको प्रमाणपत्र वितरण कार्यक्रममा आएनन् थापा

कान्तिपुर संवाददाता

काठमाडौँ — राष्ट्रिय प्रताजन्त्र पार्टीको हालै सम्पन्न महाधिवेशनबाट निर्वाचित नयाँ कार्यसमितिका पदाधिकारी तथा सदस्यहरूको शपथग्रहण तथा प्रमाणपत्र वितरण कार्यक्रममा निवर्तमान अध्यक्ष कमल थापा भने उपस्थित भएका छैनन् ।

आइतबार नेपाल प्रज्ञा प्रतिष्ठानमा भएको शपथग्रहण तथा प्रमाणपत्र वितरण कार्यक्रममा पशुपति शमशेर राणा, प्रकाशचन्द्र लोहनीसहित अधिकांश नेता तथा कार्यकर्ताहरूको उपस्थिति भए पनि थापा भने उपस्थित भएनन् । राजेन्द्र लिङदेन अध्यक्षमा निर्वाचित भएपछि थापाले पूर्वराजा ज्ञानेन्द्र शाहले ठाडो हस्तक्षेप गरेको आरोप लगाएका थिए ।

उनले अब छिट्टै राजसंस्था आउनेमा बधाइ भन्दै पूर्वयुवराज्ञी हिमानी शाहलाई व्यंग्यसमेत गरेका थिए । आइतबार नै थापाले आफू निकट कार्यकर्ताहरूको भेलासमेत बोलाएका छन् ।

२०६१ सालदेखि लगातार अध्यक्ष रहेका थापा पछिल्लो महाधिवेशनमा लिङदेनबाट १९९ मतान्तरले पराजित भएका हुन् । शनिबार राति सम्पन्न मतगणना अनुसार लिङदेनले १८१७ मत ल्याएका थिए भने थापा १६१८ मतमा सिमित भए ।

लिङ्देनको विजय : नेतृत्व पुस्तान्तरण कि निर्मल निवासको शक्ति आर्जन ?


प्रकाशित : मंसिर १९, २०७८ १५:२५
प्रतिक्रिया
पठाउनुहोस्

‘लैंगिक हिंसाका मुद्दा सम्बोधनमा संचारमाध्यामको भूमिका महत्वपूर्ण’

कान्तिपुर संवाददाता

काठमाडौँ — लैंगिक हिंसाका मुद्दा सम्बोधनमा संचारमाध्यामको भूमिका महत्वपूर्ण हुने सरोकारवालाहरूले बताएका छन् ।  लैंगिक हिंसा विषयमा संचारमाध्याम संवेदनशील भएको उल्लेख गर्दै सरोकारवालाहरूले लैंगिक हिंसाबिरुद्ध बनेका कानुन, नीतिलाई व्यावहारिक रुपमा कार्यान्वयनमा जोड दिनुपर्ने बताए ।

‘लैंगिक हिंसाका मुद्दाहरू सम्बोधनमा मिडियाको भूमिका’विषयक अन्तर्क्रियमा उनीहरूले बिगतभन्दा फरक माध्यामबाट लैंगिक हिंसा भइरहेको बताए ।

पत्रकार बबिता बस्नेतले सामाजिक संजालको माध्यामबाट हुने लैंगिक हिंसा बढ्दै गएको उल्लेख गर्दै यसको नियन्त्रणका लागि साइबर ल आवश्यक भएको बताइन् । ‘सामाजिक संजालबाट हुने लैगिक हिंसाका लागि साइबर अपराध सम्बनधी कानुन आवश्यक देखिन्छ’ उनले भनिन्, ‘मिडियाको नाममा थप लैगिक हिंसालाई बढावा दिने काम भएको छ ।’

संचार तथा सूचना प्रविधि मन्त्रालयका सचिव बैकुण्ठ अर्यालले लैगिंक हिंसा न्युनीकरण सम्बन्धी कानुन, नीति समय अनुसार परिमार्जन गरी व्यावहारिक बनाउन मन्त्रालय प्रतिबद्ध भएको बताए । उनले संचार माध्याममा सकरात्मकविषयवस्तु सम्प्रेषण भएमा सकरात्मक भूमिका खेल्ने बताए । पत्रकार अखण्ड भण्डारीले संचार माध्यममा महिला पत्रकारको सहभागिता बढ्दै जानु सकरात्मक भएको उल्लेख गर्दै संचार माध्याम लैंगिक हिंसा न्यनीकरणका लागि झन् जिम्मेवार भएको बताए । प्रेस काउन्सिल नेपालका अध्यक्ष बालकृष्ण बस्नेतले लैंगिक हिंसा सम्बन्धी आउने उजुरी तत्काल छानबिन गरी टंगोमा पुगेको बताए । संचारिका समूहकी अध्यक्ष नितु पण्डितले लैगिक हिंसाका मुद्दा सम्बोधनमा संचार माध्यमका समाचार कक्षमा महिला सहभागिता बढाउनु पर्ने बताइन् ।

प्रकाशित : मंसिर १९, २०७८ १५:१९
पूरा पढ्नुहोस्
प्रतिक्रिया
पठाउनुहोस्
×