देउवाले पदको दुरुपयोग गरेको सांसद सिंहको आरोप- समाचार - कान्तिपुर समाचार
कान्तिपुर वेबसाईट
AdvertisementAdvertisement

 देउवाले पदको दुरुपयोग गरेको सांसद सिंहको आरोप

कान्तिपुर संवाददाता

काठमाडौँ — कांग्रेसको केन्द्रीय महाधिवेशनका लागि अब ४ दिन मात्रै बाँकी छ । तर, क्रियाशील सदस्यता विवादका कारण उत्पन्न किचलो अझै समाधान भइसकेको छैन । महाधिवेशनको मुखमा सभापति तथा प्रधानमन्त्री शेरबहादुर देउवाले पद र शक्तिको दुरुपयोग गर्दै विधानविपरीत सदस्यहरुमा भय, डर, त्रास देखाई अधिवेशन गराएको आरोप लागेको छ । 

सर्लाही- ४ का सांसद अमरेशकुमार सिंहले आइतबार विज्ञप्ति जारी गर्दै स्वतन्त्र, निष्पक्ष तथा धाँधलीरहित अधिवेशन गराउन माग गरेका छन् । उनले सभापति देउवाले नै निर्वाचनको परिणाम आफ्नो पक्षमा ल्याउन हरेक प्रकारका जालझेल खडा गरी पार्टी र सरकारको पदको दुरुपयोग गरेको आरोप लगाएका छन् ।

'निर्वाचनको परिणाम आफ्नो पक्षमा ल्याउन हरेक प्रकारका जालझेल खडा गरी पार्टी र सरकारको पदको दुरुपयोग गरी विधि-विधान निर्देशिका, नियमावली तथा लोकतान्त्रिक प्रक्रिया अबलम्बन नगरी स्वेच्छाचारी, अलोकतान्त्रिक र विभेदकारी पद्धति अवलम्बन गरी अधिवेशन गराउन खोज्नु भएकोप्रति आपत्ति छ,' उनले विज्ञप्तिमार्फत् भनेका छन्, 'उहाँको जिम्मेदारी स्वतन्त्र, निष्पक्ष तथा धाँधलीरहित अधिवेशन सम्पन गराउने हो । त्यो जिम्मेदारीको बोध गर्न अपिल गर्दछु।'

सांसद सिंहले सदस्यता लिनको लागि फारम भर्नेदेखि नै विभिन्न प्रकारका जालझेल गरी बिलम्ब गर्ने, फारम नदिने, प्राप्त गरेका फारमहरु पनि पेश हुँदा वड़ा समितिबाट पेश गरेको नामावलीको सट्टामा अरुको नाम आउने आदि समस्याहरु झेल्दै आएकोमा अहिले नेपाल प्रहरीबाट मतदान अधिकृतलाई अपहरण गराउने र गोली चलाउन समेत लगाई क्रियाशिल सदस्यहरुमा भय, डर र त्रास उत्पन्न गराएको आरोप लगाएका छन् । प्रदेश २ का ४ क्षेत्रमा विवादका कारण अधिवेशन हुन सकेको छैन । जसका कारण प्रदेशको अधिवेशन नै रोकिएको छ ।

प्रकाशित : मंसिर १९, २०७८ १४:५०
प्रतिक्रिया
पठाउनुहोस्

मासिने खतरामा लोपोन्मुख छन्त्याल भाषा

रासस

म्याग्दी — म्याग्दीमा बसोबास गर्ने अल्पसङ्ख्यक छन्त्याल समुदायको पुर्ख्यौली छन्त्याल भाषा संकटमा परेको भन्दै सरोकारवाला पक्षबाट चिन्ता व्यक्त गरिएको छ । छन्त्याल समुदायका युवा पुस्ताले आफ्नो मौलिक भाषा सिक्न र संरक्षण गर्न नसक्दा भाषा नै नासिने खतरा बढेको हो ।


बोलीचालीमा अत्यन्त कम प्रयोग गरिए पनि लिपि नपाइएको हुँदा छन्त्याल खाम भाषा पुस्तान्तरण हुन नसकेपछि लोप हुने अवस्थामा पुगेको रघुगंगा गाउँपालिका– ६ ठाडाखानीका ८३ वर्षीय युवबहादुर छन्त्यालले बताए । उनका अनुसार बूढापाकाले बोले पनि नयाँ पुस्ताका बालबालिका र युवायुवतीले आफ्नो भाषा बोल्न छाडेका छन् ।

लिपि र शब्दकोश प्राप्त गर्न नसक्नु र आधुनिकताको प्रभावका कारण नयाँ पुस्ताले आफ्नो मातृभाषा प्रयोग गर्न संकोच मान्नु तथा बसाइँसराइ जस्ता कारणले भाषा लोप भएको उनको भनाइ छ ।

'भाषा जानेका र बोल्न रुचि राख्ने बूढापाका मेटिँदै गए, युवापुस्ता आफ्नो पुर्ख्यौली पेसा छाडेर विदेश वा सहरमा बसाइँ सरे, उनीहरूले आफ्नो भाषा बोल्न छाडे,' छन्त्यालको बाहुल्यता रहेको गुर्जाका अगुवा कमल छन्त्यालले भने, 'लिपि र शब्दकोशसमेत नभएकाले पुराना पुस्तासँगै छन्त्याल भाषा पनि नासिने खतरा छ ।'

नेपाल छन्त्याल संघ म्याग्दीका अनुसार २०६८ को जनगणना अनुसार नेपालका १९ जिल्लामा ११ हजार ८१० छन्त्याल समुदायको जनसङ्ख्या छ । छन्त्याल समुदाय सबैभन्दा बढी म्याग्दी र बागलुङमा छन् । कुल छन्त्याल समुदायको सङ्ख्या मध्यम्याग्दीमा ७०.२ र बागलुङमा ३५.४१ प्रतिशत छ ।

नेपाल छन्त्याल संघ म्याग्दीका सचिव मन छन्त्यालका अनुसार विभिन्न जातजातिको मिश्रित बसोबास, सहर तथा विदेशप्रतिको मोह, विदेशी भाषा सिक्ने आकर्षण र विद्यालयमा अङ्ग्रेजी तथा नेपाली भाषामा मात्र पठनपाठन हुने जस्ता कारणले छन्त्याल भाषा लोप हुन लागेको हो ।

म्याग्दीको धवलागिरि गाउँपालिकाको गुर्जा, मल्कवाङ, मच्छिम, रघुगंगाको ठाडाखानी र कुइनेमंगलेमा छन्त्याल समुदायको बसोबास रहेको छ । जनगणनाको पछिल्लो प्रतिवेदनअनुसार कूल जनसङ्ख्यामध्ये ३६.२७ प्रतिशतले आफ्नो मातृभाषा बोल्ने गर्छन् । छन्त्याल समुदायको बसोबास भएको बस्तीका विद्यालयमा मातृभाषामा पठनपाठन गर्ने तयारी गरेको रघुगंगाका अध्यक्ष भवबहादुर भण्डारीले जानकारी दिए ।

प्रकाशित : मंसिर १९, २०७८ १४:४०
पूरा पढ्नुहोस्
प्रतिक्रिया
पठाउनुहोस्
×