'सगुन' चढाएर मुख्यमन्त्री पाण्डेले गरे मरिणखोलाको पुल शिलान्यास

लामा गुरु रुपबहादुर लामाले पुल निर्माण सफलताको लागि भूमिपति पूजामा सगुन चढाउन भनेर दिएपछि पाण्डेले एक बोतल निगार पुलको जग राख्ने खाल्डामा चढाएका थिए ।

मुख्यमन्त्री पाण्डेले शिलान्यास गरेको पुल डेढ वर्षभित्रमा निर्माण सम्पन्न गर्ने गरी १९ करोडमा रुपैयाँमा ठेक्का सम्झौता भएको छ ।

प्रादेशिक सडक डिभिजन कार्यालयमार्फत मरिणखोलामा निर्माण हुने पुलले हरिहरपुरगढी गाउँपालिका ४ को हाक्पारा र २ को बखफुर जोड्ने छ । २६२ मिटर लम्बाइ रहेको पुलमा स्पान संख्या ५ रहेको छ ।

१ दशमलव २ मिटरको फुटपाथ समेत रहने आयोजनाका इन्जिनियर देवनारायण यादवले जानकारी दिए । ४ सय मिटर नदी नियन्त्रण समेत रहेको कामको ठेक्का हिम्दुङ, थोक्कर, इम्यानुयल सारस जेभीले पाएका छन् ।

पुल शिलान्यास गर्दै मुख्यमन्त्री पाण्डेले आफ्नो कार्यकालमा एक रुपैयाँ पनि अनियमितता हुन नदिने ठोकुवा गरे । भ्रष्टाचारले मुलुक आक्रान्त भएको भन्दै एकरुपैयाँ दाम पनि अनियमितता भएमा आफू खरो प्रस्तुत हुने उनको भनाइ थियो ।