कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५५

नेपालमा पढ्ने इजरायली राजदूतको पढ्ने इच्छा अधुरै 

काठमाडौँ — राजदूतका आफ्नै कूटनीतिक चासो र प्राथमिकताका क्षेत्र हुन्छन्, तर नेपालस्थित इजरायली राजदूत हनन गोडरको चासो कूटनीतिमा मात्रै सीमित थिएन । इजरायलको हिब्रु युनिभर्सिटी अफ जेरुसेलमबाट भूगोल विषयमा स्नातकोत्तर गर्दागर्दै नेपाल आएका गोडरले बाँकी पढाइ यहीं सक्न चाहन्थे ।

नेपालमा पढ्ने इजरायली राजदूतको पढ्ने इच्छा अधुरै 

तर त्रिभुवन विश्वविद्यालयले शैक्षिक तालिका पालना नगर्दा अपूरै रहेको छ । गोडरले इजरायलमै ४५ क्रेडिट आवरको कोर्स पूरा गरेका थिए । बाँकी पढाइ त्रिविबाट सक्न उनले क्रेडिट ट्रान्सफरको अनुमति लिए । त्रिविले ४५ क्रेडिटलाई ३५ मूल्यांकन गरेर बाँकी २५ क्रेडिट आवरका लागि दुई सेमेस्टर पढ्नुपर्ने बतायो । सेमेस्टर प्रणालीअनुसार ६० क्रेडिट आवरपढेपछि स्नातकोत्तर पूरा हुन्छ ।

भूगोल केन्द्रीय विभागका प्रा. हृदयलाल कोइरालाका अनुसार राजदूत पढ्न आउने भएपछि घडीघरको माथिल्लो तलाको कोठामा ब्रान्डेड कम्प्युटर, एलसीडी प्रोजेक्टर र स्क्रिन, एसी, पंखा, ह्वाइटबोर्ड, एलईडी बत्ती, नयाँ कुर्सी र बेन्चका साथै झ्यालमा महँगा पर्दा हालियो । पढाइ सक्न हतारिएका गोडरले त्रिविमा कहिले पढाइ सुरु हुन्छ भनेर फागुनदेखि नै सोध्न थालेका थिए । तर त्रिविले तीन महिना ढिलो गरी असोजमा प्रवेश परीक्षाको तालिका सार्वजनिक गर्‍यो ।

छुट्टी मनाउन इजरायल पुगेका गोडर परीक्षा छुट्ने पीरले भ्रमण छोट्याएर २९ साउनमा नेपाल फर्के । तर कार्यतालिका पछ्याउन सधैं असफल त्रिविले प्रवेश परीक्षाको मिति सार्‍यो । ‘राजदूत नेपाल आइसक्दा डिन कार्यालयले प्रवेश परीक्षा एक महिनापछि सारिदियो । लाज मर्नु भयो,’ कोइरालाले भने, ‘राजदूतसँग माफी मागें । नेपालको अवस्था यस्तै छ भन्नुपर्ने अवस्था आयो ।’

प्रवेश परीक्षा दोस्रोपटक पनि तोकिएको मितिमा भएन । अन्ततः विश्वविद्यालयले कात्तिक मसान्तमा मात्रै प्रवेश परीक्षा लियो । राजदूत गोडरले ५० वस्तुगत प्रश्नमध्ये ३७ वटा मिलाएर ७४ अंक ल्याए । योग्यताक्रमअनुसार उनले पढ्न पाउने भए । मंसिर ५ मा पढाइ सुरु हुने सन्देश दूतावासमा पठाइयो । तर त्रिविले समयमै कक्षा सुरु गर्न नसक्दा राजदूतले पढ्न नभ्याउने भए । कारण, उनको कार्यकाल त्यसअगावै सकिँदै छ । विभाग प्रमुख कोइरालाले भने, ‘पढ्ने रहर गर्दागर्दै पनि पाउनुभएन ।’

त्रिविले स्नातकोत्तरमा सेमेस्टर प्रणाली सुरु गरेपछि २०७३ मा भूगोल केन्द्रीय विभागमा विद्यार्थी शून्य थिए । तर यसपालि राजदूत हानन छुटे पनि पहिलो सेमेस्टरमा ४९ विद्यार्थी छन् । पढाइदेखि नतिजा प्रकाशनसम्म ढिलाइ हुने गरेका कारण विद्यार्थीको शैक्षिक भविष्यमा प्रत्यक्ष असर पुग्ने गरेको विश्वविद्यालय क्याम्पसका प्राचार्य प्रा. ध्यानेन्द्रबहादुर राईले स्विकारे । ‘गत वर्षदेखि कोभिडको कारण देखाएर पन्छन त सकिएला तर त्रिवि सिस्टममै ढिलासुस्ती छ,’ उनले भने ।

प्रकाशित : मंसिर १७, २०७८ ११:५४
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?