निर्वाचनमा केन्द्रित हुन नेता, कार्यकर्तालाई देउवाको निर्देशन- समाचार - कान्तिपुर समाचार

निर्वाचनमा केन्द्रित हुन नेता, कार्यकर्तालाई देउवाको निर्देशन

कान्तिपुर संवाददाता

काठमाडौँ — प्रधानमन्त्री तथा नेपाली कांग्रेसका सभापति शेरबहादुर देउवाले निकट भविष्यमा हुने तीनै तहको निर्वाचनमा केन्द्रित हुन नेता, कार्यकर्ताहरुलाई निर्देशन दिएका छन् ।

नेपाली कांग्रेसको प्रथम प्रदेश अधिवेशनको बिहीबार भर्चुअल माध्यमबाट उद्घाटन गर्दै प्रधानमन्त्री देउवाले केही महिनाभित्रै स्थानीय तहको र एक वर्षभित्र संघ र प्रदेशको निर्वाचन हुने भन्दै पार्टीको अधिवेशनलगत्तै चुनावतर्फ केन्द्रित हुन निर्देशन दिएका हुन् ।

उनले पार्टीभित्रको चुनाव हुने हार, जित स्वाभाविक प्रक्रिया र लोकतान्त्रिक अभ्यास भएको भन्दै आगामी दिनमा जनताको विश्वास जित्नेगरी चुनावमा केन्द्रित हुन आग्रह गरे । उनले भने, ‘हामी केही महिनाभित्रै स्थानीय तहको निर्वाचन, एक वर्षभित्र संघ र प्रदेशको निर्वाचनमा जाँदैछौं । त्यसैले पनि अधिवेशनलगत्तै हाम्रो ध्यान चुनावतर्फ केन्द्रित हुनुपर्दछ । हाम्रा आन्तरिक चुनावमा हुने जित, हार एउटा स्वाभाविक प्रक्रिया हो । लोकतान्त्रिक अभ्यास हो । त्यसैले तपाईंहरुले आन्तरिक प्रतिस्पर्धालाई लोकतान्त्रिक अभ्यासको रुपमा लिएर आगामी दिनमा जनताको विश्वास जित्नेगरी चुनावमा केन्द्रित हुनुहुनेछ भन्ने मैले विश्वास लिएको छु ।’

प्रधानमन्त्री देउवाले प्रदेश अधिवेशनमा कांग्रेसलाई थप सशक्त र बलियो बनाएर जनताको मन जित्ने रणनीति बनाउने विषयमा पनि छलफल गर्न आग्रह गरे । उनले लोकतन्त्र बलियो भए मात्रै मुलुक समृद्ध हुने भन्दै विकास र समृद्धिको नेतृत्व नेपाली कांग्रेसले मात्रै गर्नसक्ने दाबी गरे ।

प्रकाशित : मंसिर १६, २०७८ १६:०६
प्रतिक्रिया
पठाउनुहोस्

कांग्रेसको गण्डकी अधिवेशनमा पौडेल समूहको नाराबाजी

प्रतिक्षा काफले

पोखरा — गण्डकीमा कांग्रेसको पहिलो प्रदेश अधिवेशनको उद्घाटन सत्र चलिरहेको छ । उद्घाटन कार्यक्रममा आफ्ना पक्षका नेताहरुलाई बोल्न नदिएको भन्दै संस्थापनइतरका नेता कार्यकर्ताले मञ्चमै विरोध जनाएका छन् । यहाँ सभापति शेरबहादुर देउवा पक्षबाट सभापतिमा अर्जुन जोशीलाई टिकट दिइएको छ ।

उनी केन्द्रीय सदस्य भएकोले बोल्न दिइएको थियो । उनले भाषण गर्ने क्रममा आफूलाई मत मागे । त्यसपछि मञ्चमा सुरु भयो, वरिष्ठ नेता रामचन्द्र पौडेल समूहको विरोध । आकांक्षीहरु देवराज चालिसे, यज्ञबहादुर थापा, शुक्रराज शर्मालगायत नेता र कार्यकर्ताहरुले बोल्न मञ्च माग्दै देउवा पक्षविरुद्ध नाराबाजी गरेका हुन् ।

त्यसपछि कार्यक्रममा उनीहरुलाई समेत बोल्न दिइयो । अहिले कार्यक्रम निरन्तर जारी चलिरहेको छ । आकांक्षीहरुले मनोनयन शुल्क पनि बढी भएको भन्दै विरोध जनाएका छन् ।

सभापतिमा ९१ हजार, उपसभापतिमा ६१, महामन्त्रीमा ५१,सहमहामन्त्रीका लागि ४१ र सदस्यलाई ३१ हजार शुल्क तोकिएको छ ।

प्रकाशित : मंसिर १६, २०७८ १५:५६
पूरा पढ्नुहोस्
प्रतिक्रिया
पठाउनुहोस्
थप केही समाचारबाट
×