नेपाल–भारत व्यावसायिक उडान अनिश्चित- समाचार - कान्तिपुर समाचार

नेपाल–भारत व्यावसायिक उडान अनिश्चित

ओमिक्रोनको जोखिम बढेपछि एयर बबल हटाउने निर्णयबाट भारत पछि हट्यो
राजेश मिश्र

नयाँदिल्ली — नेपाल र भारतबीच सीमित मात्रै उडान गर्ने गरी कायम ‘एयर बबल’ तत्काल नहट्ने भएको छ । दक्षिण अफ्रिकामा देखिएको कोरोना भाइरसको नयाँ भेरियन्ट ओमिक्रोनको जोखिमका कारण भारत एयर बबल हटाउने आफ्नो पूर्वनिर्णयबाट पछि हटेको छ ।

कोभिड–१९ का कारण एक वर्षदेखि दुई देशका राष्ट्रिय ध्वजावाहक विमानले मात्रै निश्चित संख्यामा काठमाडौं–दिल्ली उडान गर्दै आएका छन् । निजी क्षेत्रका विमान कम्पनीहरुको व्यावसायिक उडानमा रोक लगाइएको छ । कोभिडको असर कम भएसँगै भारतले डिसेम्बर १५ (मंसिर २९) देखि एयर बबल हटाउने निर्णय गर्दै सबै विमान कम्पनीलाई व्यावसायिक उडानको तयारी गर्न अनुमति दिएको थियो । तर अनमुति दिएको एक साता नपुग्दै बुधबार अर्को सूचना नभएसम्मका लागि व्यावसायिक उडान गर्न नमिल्ने परिपत्र गरिएको छ । सीमित उडानका कारण हवाई मार्गबाट ओहोरदोहर गर्ने नेपाली र भारतीय नागरिक चर्को भाडा तिर्न बाध्य छन् ।

भारतीय सिभिल एभिएसनको महानिर्देशक कार्यालयले बुधबार जारी गरेको परिपत्रमा कोरोना भइरसको नयाँ भेरियन्टलाई लक्ष्य गरेर अघिल्लो निर्णयमा रोक लगाइएको उल्लेख छ । २६ नोभेम्बर (मंसिर १०) मा उक्त कार्यालयले व्यावसायिक उडानको तयारी गर्न पत्राचार गरेको थियो । नयाँ परिपत्रमा परिस्थितिको अध्ययन र मूल्यांकन गरेर मात्रै व्यावसायिक उडान खोल्नेबारे अर्को उपयुक्त निर्णय लिइने उल्लेख छ ।

दिल्ली विमानस्थलमा सतर्कता

कोरोना भाइरसको ओमिक्रोन भेरियन्ट भेटिएका मुलुकबाट भारत आउने यात्रुले विमानस्थलमा पीसीआर परीक्षणपछि मात्रै गन्तव्यमा जान पाउने भएका छन् । नयाँ भेरियन्टलाई लिएर सतर्कता अपनाउँदै भारतीय स्वास्थ्य मन्त्रालयले सबै अन्तर्राष्ट्रिय विमानस्थलका लागि उक्त व्यवस्था गर्न निर्देशन जारी गरेको छ । दिल्लीस्थित इन्दिरा गान्धी अन्तर्राष्ट्रिय विमानस्थलमा बुधबारबाट त्यसको अभ्यास थालिएको छ । संक्रमण भेटिएका र त्यसको जोखिम रहेका मुलुकबाट आएका यात्रुको स्वाब संकलन गरेर रिपोर्ट आएपछि मात्रै उनीहरुलाई एयरपोर्टबाट बाहिरिन दिने व्यवस्था मिलाइएको छ । त्यसका लागि विमानस्थलमा १ हजार ५ सय कुर्सी तथा आवश्यक संख्यामा स्वास्थ्यकर्मीको छुट्टै व्यवस्था मिलाइएको छ । नयाँ व्यवस्थाका कारण यात्रुले आरटी पीसीआर रिपोर्टको प्रतीक्षामा ४ देखि ६ घण्टा विमानस्थलमा बिताउनुपर्ने भएको छ । रिपोर्टका लागि तथा प्रतिक्षारत अवधिमा खानाको सुविधाका लागि विमानस्थलमा सम्बन्धित यात्रुले १ हजार ७ सय भारु शुल्क तिर्नुपर्नेछ । हवाई मार्गबाट भारत आउने यात्रुमध्ये कम्तीमा २ प्रतिशतले त्यस्तो प्रोटोकलको पालना गर्नुपर्ने हुन सक्छ ।


प्रकाशित : मंसिर १५, २०७८ २१:४६
प्रतिक्रिया
पठाउनुहोस्

‘पालिकामा केमिकल इन्जिनियर आवश्यक’

कान्तिपुर संवाददाता

काठमाडौँ — स्थानीय उत्पादनको गुणस्तर तथा प्रवर्द्धनका निम्ति प्रत्येक पालिकामा एक जना केमिकल इन्जिनियर आवश्यक रहेको विज्ञले बताएका छन् । त्यसका साथै स्थानीय उत्पादनलाई औद्योगिकीकरणका माध्यमबाट विश्व बजारसँग जोड्न सकिनेसमेत उल्लेख गरेका छन् ।

पुल्चोक इन्यिरिङ क्याम्पसमा बीई केमिकल इन्जिनियरिङ अध्ययनरत विद्यार्थीले बुधबार आयोजना गरेको ‘नेपालमा केमिकल इन्जिनिरिङको भविष्य’ विषयक अन्तर्क्रियामा विज्ञहरुले उक्त धारणा राखेका हुन् ।

‘नेपालको जडीबुटीबाट हिमालयन इनर्जी ड्रिङ्स उत्पादन गरेर विश्व बजारमा पुर्‍याउनेतर्फ सरकारको ध्यान पुग्न आवश्यक छ,’ दक्षिण कोरियाको अनुभव र व्यावहारिक पक्षबारे विचारपत्र प्रस्तुत गर्दै इन्जिनियर प्रा. हेमराज पन्तले भने, ‘त्यसनिम्ति स्थानीय तहमा के कस्ता सम्भावनाहरू छन् भन्ने पक्षमा बृहत् अध्ययन अनुसन्धान र प्रवद्र्धनका निम्ति प्रत्येक पालिकामा एक जना केमिकल इन्जिनियर हुन आवश्यक छ ।’

विज्ञ पन्तले मुलुकको भौगोलिक विशेषताअनुकूल उत्पादन हुने फलफूल, जडीबुटी, स्याउ, सुन्तला, कागतीजस्ता घरेलु फलफूल, यसैगरी मेल, जामुन, फलेदो, अमलाजस्ता बनेली फलफूल र हर्रो, बर्रो, जटामसी, पाँचऔंले, यार्सागुम्बाजस्ता जडीबुटीजन्य उत्पादनलाई व्यावसायिक रूपमा अघि बढाउन पनि केमिकल इन्जिनियरको आवश्यकता रहेको बताए । ‘हामीले हिमालयन ब्रान्डबाट अर्गानिक पेय पदार्थ उत्पादन गरेर भारत र चीनको बजारमा पुर्‍याउन सक्ने र अर्थोपार्जन गर्ने सम्भावना प्रशस्त छ,’ विज्ञ पन्तले भने, ‘त्यसनिम्ति सम्भावना पहिल्याउने र गुणस्तर मापन गर्ने केमिकल इन्जिनियर चाहिन्छ ।’ देशभरि अहिले एक हजारभन्दा बढी केमिकल इन्जिनियरिको आवश्यकता रहेकोसमेत उल्लेख गरे ।

यसैगरी, केमिकल इन्जिनियर्स समाज नेपालका अध्यक्ष डा. चण्डिका भट्टले मुलुकको सबै खाले उद्योगमा केमिकल इन्जिनियरको आवश्यकता रहेको बताए । ‘केमिकल इन्जिनियरको संख्या अत्यन्त न्यून छ,’ उनले भने, ‘आर्थिक सवलीकरणका लागि औद्योगिकीकरणका निम्ति केमिकल इन्जिनियरिङको आवश्यकता खड्किएको छ ।’ नेपाल गुणस्तर तथा नापतौल विभागका उपमहानिर्देशक प्रभातकुमार सिंहले केमिकल इन्जिनियरको अभावमा विभिन्न निकायमा दरबन्दी रिक्त रहेको बताए ।

इन्जिनियरिङ अध्ययन संस्थानका सहायक डिन प्रा. सुशीलबहादुर बज्राचार्यले मुलुकको आवश्यकतालाई पूर्ति गर्न केमिकल इन्जिनियर जनशक्ति उत्पादनमा जोड दिएको बताए । त्यसनिम्ति भारतको कानपुर र रुड्कीमा रहेका इण्डियन इन्स्टिच्युट अफ टेक्नोलोजी (आईआईटी) सँग सम्झौता गरी २०७६ सालदेखि केमिकल इन्जिनियरिङ अध्यापन सुरु गरिएको समेत उल्लेख गरे । संस्थानका डिन प्रा. शशीधर राम जोशीले केमिकल इन्जिनियरिङमा समयसापेक्ष गुणस्तरीय जनशक्ति उत्पादनमा जोड दिएको बताए । क्याम्पस प्रमुख डा. इन्द्र आचार्यले केमिकल इन्जिनियरिङ कार्यक्रमलाई गुणस्तरीय, प्रतिस्पर्धी र विद्यार्थीलाई उदाहरणीय तुल्याउने प्रतिबद्धता जनाए । कार्यक्रममा दोस्रो वर्षका छात्र अनिश अधिकारीले केमिकल इन्जिनियरिङ विषयप्रति विद्यार्थीको आकर्षण बढेको तर कोटा कम भएको गुनासो पनि राखेका थिए ।

प्रकाशित : मंसिर १५, २०७८ २१:४१
पूरा पढ्नुहोस्
प्रतिक्रिया
पठाउनुहोस्
×