रेल चलाउन कानुनी रुपमा बाटो खुला- समाचार - कान्तिपुर समाचार

रेल चलाउन कानुनी रुपमा बाटो खुला

कान्तिपुर संवाददाता

काठमाडौँ — रेल-वे अध्यादेश जारी भएसँगै रेल सञ्चालनका लागि बाटो खुला भएको छ । राष्ट्रपति विद्यादेवी भण्डारीले बुधबार रेल्वे अध्यादेश, २०७८ जारी गरेसँगै रेल चलाउनका लागि कानुनी रुपमा बाटो खुल्ला भएको हो । 

नेपाल रेल-वे कम्पनी महाप्रबन्धक नीरञ्जन झाका अनुसार अब बजेट र कर्मचारी व्यवस्थापनको काम अघि बढाइने छ । ‘रेल चलाउन कानुनी रुपमा अब हामीलाई समस्या छैन,’ महाप्रबन्धक झाले भने, ‘अबको दुई महिनाभित्र रेल चलाउने गरी बाँकी रहेका सबै काम टुंग्याउने छौं ।’ उनका अनुसार अर्थ मन्त्रालयसँग अहिले बजेट थपका लागि कुरा भइरहेको छ । खातामा रहेको २५ करोड रुपैयाँ चलाउन अर्थले पत्र दिइसकेको उनको भनाइ छ । यसका लागि सञ्चालक समितिको बैठक बसेर बजेट पास गराउने तयारी भएको छ ।

अर्थसँग तत्कालका लागि ३५ करोड रुपैयाँ माग गरिएको महाप्रबन्धक झाले बताए । ‘संसद् अधिवेशन सुरु भएको ६० दिनभित्र पारित हुन सकेन भने मात्रै अध्यादेश निस्क्रिय हुने हो,’ उनले भने, ‘त्यसैले यो समयभित्र कर्मचारी व्यवस्थापन, बजेट, भाडादर निर्धारण सबै काम सक्ने छौं, रेल चलाउने अब यो मिति नाघ्ने छैन ।’

जयनगर–कुर्था खण्डमा चलाउन एक वर्षअघि भारतबाट ल्याएका दुई वटा रेल सेट अझै थन्किराखेका छन् ।

तयारीबिना हतारिएर रेल ल्याउँदा अहिले थन्क्याएर राखिएको छ । रेल चलाउन कानुन, कर्मचारी केही नहुँदा समस्या भएको हो । अहिले जयनगरदेखि कुर्थासम्मको ३४ दशमलव ९ किलोमिटरमा रेल चलाउने तयारी हो ।


प्रकाशित : मंसिर १५, २०७८ २०:३१
प्रतिक्रिया
पठाउनुहोस्

‘हस्तकलाको ऐतिहासिक पक्ष’ सार्वजनिक

कान्तिपुर संवाददाता

काठमाडौँ — कलाकार तथा लेखक धर्मराज शाक्यद्वारा लिखित पुस्तक ‘हस्तकलाको ऐतिहासिक पक्ष’ विमोचन भएको छ । नक्सालस्थित नेपाल ललितकला प्रज्ञा–प्रतिष्ठानमा भएको कार्यक्रममा प्रतिष्ठानका कुलपति केके कर्माचार्यले पुस्तक विमोचन गरेका हुन् ।

पुस्तकमा हस्तकलाको ऐतिहासिक महत्त्वलाई उजागर गर्न लेखक सफल भएको कर्माचार्यले बताए । ‘समाजमा हस्तकलाको महत्त्व विशिष्ट छ,’ उनले भने, ‘पुस्तकले नेपालको हस्तकलाको इतिहासदेखि वर्तमानसम्म चलेका र बनेका विषयको समेत यथेष्ट जानकारी दिएको छ ।’

नेपाली हस्तकलाको इतिहास समृद्ध रहेको सुनाउँदै लेखक शाक्यले परम्परादेखि आधुनिक पक्षका बारेमा पुस्तकमा चर्चा गरिएको खुलाए । संस्कृतिविद् गोविन्द टण्डनले नेपाली संस्कृति र कलाको संरक्षण तथा संवद्र्धनका लागि निरन्तर खोज अनुसन्धान हुनुपर्नेमा जोड दिए । लेखक आफै कुशल शिल्पी, कला र संस्कृतिका अध्येता भएकाले निकै गहन ढंगले खोज–अनुसन्धान गरी पुस्तक तयार पारेको पाइएको उनले सुनाए । टण्डनले हस्तकलाको विकासमा प्रतिष्ठान, नेपाल हस्तकला महासंघ तथा राज्यले गहन ढंगले काम गर्नुपर्नेमा जोड दिए । कार्यक्रममा समालोचक तेजविलास अधिकारी, प्रतिष्ठानका सदस्य सचिव विपिनकुमार घिमिरे, उपकुलपति गोपाल चित्रकार लगायतले पुस्तकले नेपाली हस्तकलाको इतिहासदेखि वर्तमानसम्मको चित्रलाई केलाएको विचार राखे ।

प्रकाशित : मंसिर १५, २०७८ २०:२७
पूरा पढ्नुहोस्
प्रतिक्रिया
पठाउनुहोस्
×