'कायममुकायम प्रधानन्यायाधीश को ?' भन्ने प्रश्न उठेपछि न्यायाधीशहरू आन्तरिक छलफलमा

कानुन व्यवसायीहरूले कायममुकायमको जिम्मेवारीबारे प्रश्न उठाएपछि आफूहरू छलफलमा बसेको सर्वोच्च अदालतका एक न्यायाधीशले बताए । नेपाल बार एसोसियसनका अध्यक्ष वरिष्ठ अधिवक्ता चण्डेश्वर श्रेष्ठले प्रधानन्यायाधीशको कायममुकायमको टुंगो नलागेसम्म इजलासमा नजाने न्यायाधीशहरूसमक्ष बताएको जानकारी दिए । बुधबार न्यायाधीहरूले केही मुद्दामा मात्र सुनुवाइ गरेर आन्तरिक छलफलमा जुटेका हुन् ।

प्रधानन्यायाधीश चोलेन्द्रशम्शेर जबरा कोरोना संक्रमण भएपछि सोमबारदेखि बलम्बूस्थित सशस्त्र प्रहरी अस्पतालमा भर्ना भएका छन् । तर उनले बिदा भने लिएका छैनन् । अस्पताल भर्ना हुँदासमेत प्रधानन्यायाधीश जबराले मंगलबार पेसी तोकेका थिए । जबराले प्रधानन्यायाधीशका रूपमा मंगलबार अन्तिम पटक पेसी सूची तोकेका हुन् ।

सर्वोच्च अदालतमा पहिलो पटक गोला प्रक्रियाबाट तोकियो पेसी

नेपालको संविधानको धारा १२९(६) अनुसार ‘प्रधानन्यायाधीशको पद रिक्त भएमा वा कुनै कारणले पदको काम गर्न असम्भव भएमा वा बिदा बसेमा वा नेपालबाहिर गएमा सर्वोच्च अदालतको वरिष्ठतम् न्यायाधीशले कायममुकायम प्रधानन्यायाधीश भई काम गर्ने’ व्यवस्था छ । प्रधानन्यायाधीश जबरा कसैसँग भेटघाट गर्नसमेत नमिल्ने अवस्थाको बिरामी (कोभिड संक्रमित) भएर अस्पताल भर्ना हुँदासमेत बिदा बसेका छैनन् । उनी बिदा बसेको भए मंगलबारको पेसी वरिष्ठ न्यायाधीश दीपककुमार कार्कीले तोक्ने थिए ।

सर्वोच्च अदालतमा बुधबारदेखि न्यायाधीशहरूलाई गोला प्रक्रियाद्वारा मुद्दाको पेसी तोकिएको छ । नेपालमा आधुनिक न्यायालयको इतिहासमा पहिलो पटक सर्वोच्चमा गोला प्रक्रियाद्वारा मुद्दाको पेसी तोकिएको हो । गोला प्रथाबाट पेसी तोकिएको पहिलो दिन २ वटा एकल इजलाससहित ११ वटा इजलास तोकिएका छन् । न्यायाधीशद्वय मीरा खड्का र कुमार चुडाललाई एकल इजलास तोकिएको छ । त्यस्तै वरिष्ठतम् न्यायाधीश दीपककुमार कार्कीको इजलासमा टंकबहादुर मोक्तान परेका छन् ।