एनआरएनएको निर्वाचन पुस ११ र १२ मा - समाचार - कान्तिपुर समाचार
कान्तिपुर वेबसाईट
AdvertisementAdvertisement

एनआरएनएको निर्वाचन पुस ११ र १२ मा 

कान्तिपुर संवाददाता

काठमाडौँ — गैरआवासीय नेपाली संघ (एनआरएनए) को नयाँ नेतृत्वका लागि आगामी पुस ११ र १२ (२६ र २७ तारिख) मा निर्वाचन हुने भएको छ। संघको निर्वाचन समितिले मंगलबार एक सूचना प्रकाशित गर्दै यसअघि मंसिर २९ (डिसेम्बर १५ तारिख)मा हुने निर्वाचन मितिलाई हेरेफेर गर्दै नयाँ निर्वाचन तालिका सार्वजनिक गरेको हो ।

यसअघि परराष्ट्र मन्त्रलायले असोज ११ र कात्तिक १७ गते पत्राचार गर्दै निर्वाचन प्रक्रिया अघि नबढाउन निर्देशन दिएपछि निर्वाचन रोकिएको थियो ।

संघका अध्यक्ष कुमार पन्तले मन्त्रालयको पत्रविरुद्ध पाटन उच्च अदालतमा मुद्दा दायर गरेका थिए । आइतबार उच्च अदालत पाटनले एनआरएनएको अन्तर्राष्ट्रिय समन्वय समितिको समयावधी र नयाँ निर्वाचन प्रक्रियाबारे परराष्ट्र मन्त्रालयले दिएको निर्देशन तत्काल कार्यान्वयन नगर्न आदेश दिएको थियो । अदालतको आदेशपछि संघले निर्वाचनको प्रकृया अघि बढाएको हो ।

निर्वाचन समितिका अनुसार अब निर्वाचन तोकिएकै मितिमा हुने जनाइएको छ । मंसिर २० (डिसेम्बर ६)मा मतदाता नामावाली प्रकाशन, २१(डिसेम्बर ७)मा मतदाता नामावली उपर दाबी विरोध, २४(डिसेम्बर १०) मा मतदाताको अन्तिम नामावली प्रकाशन गर्ने निर्वाचन समितिले जनाएको छ । यस्तै, मंसिर २५ (डिसेम्बर ११) मा उम्मेदवारको मनोनयन पत्र दर्ता, २६ (डिसेम्बर १२ ) मा उम्मेदवारको पहिलो नामावली प्रकाशन, २७ (डिसेम्बर १३)मा उम्मेदवारविरुद्ध दाबी विरोध, २८ (डिसेम्बर १४) मा उजुरीउपर निर्णय, २९ (डिसेम्बर १५) मा उम्मेदवारको दोस्रो नामावली प्रकाशन, पुस २ (डिसेम्बर १७ ) मा उम्मेदवारको मनोनयनपत्र फिर्ता गर्ने समय तोकिएको छ । त्यस्तै, पुस ३ (डिसेम्बर १८) मा उम्मेदवारको अन्तिम नामावली प्रकाशन गरिने छ ।

संघको १० औं महाधिवशेनका लागि अध्यक्ष पदमा बद्री केसी, रविना थापा र कुल आचार्यले उम्मेदवारी घोषणा गरेका छन् । ४८ पदाधिकारीका लागि हुने निर्वाचनमा करिब १ सयजनाले आ-आफ्नो उम्मेदवारी घोषणा गरेका छन् । संघको केन्द्रीय निर्वाचनका लागि ६४ देशबाट ३५ सयजना प्रतिनिधि छनोट भइसकेका छन् । तीमध्ये यूके, अमेरिका र अस्ट्रेलियाका प्रतिनिधि चयनमा विवाद रहेको जनाइएको छ ।

प्रकाशित : मंसिर १४, २०७८ २०:०७
प्रतिक्रिया
पठाउनुहोस्

नेपाली र अमेरिकी सेनाबीचको संयुक्त सैनिक तालिम सकियो

कान्तिपुर संवाददाता

काठमाडौँ — नेपाली सेना र अमेरिकी सेनाबीच संयुक्त सैनिक तालिम ‘अभ्यास टेक नेल–२२’ मंगलबार सम्पन्न भएको छ । गत कात्तिक १५ गतेबाट सुरु भएको उक्त तालिम मंगलबार छाउनीमा आयोजित कार्यक्रममा समापन गरिएको हो ।

तालिममा नेपाली सेनाबाट विपद् व्यवस्थापनमा खटिदै आइरहेको डिजास्टर एसेसमेन्ट एन्ड रेस्पोन्स टिमबाट ४५ जना र अन्य सम्बद्ध निकायहरुबाट ४ जना गरी ४९ जनाको उपस्थित रहेको थियो । तालिममा अमेरिकी सेनाका १७ सहित ६६ जनाको सहभागिता थियो । संयुक्त तालिम काठमाडौं, पोखरा र अन्नपुर्ण वेस क्याम्प इलाकामा सञ्चालन भएको थियो ।

तालिममा शिक्षार्थीहरुलाई जल उद्धार र उच्च पहाडी तथा हिमाली क्षेत्रमा खोज तथा उद्धार जस्ता विषयहरुको सैद्धान्तिक र व्यवहारिक ज्ञान दिइएको नेपाली सेनाद्वारा जारी विज्ञप्तीमा उल्लेख छ । मंसिर ११ गते पोखरामा सञ्चालन भएको कुल्मिनेटिङ अभ्यासको बलाधिकृत रथी बालकृष्ण कार्कीले समेत निरीक्षण गरेका थिए ।

‘यस किसिमको संयुक्त तालिमबाट दुवै देशका विपद् व्यवस्थापन कार्यमा संलग्न रहने फौजहरुमा उच्च पहाडी तथा हिमाली क्षेत्रमा गरिने खोज तथा उद्धार सम्बन्धि सैद्धान्तिक तथा व्यवहारिक क्षमता अभिवृद्धि हुनुको साथै दुई देश बीचको मैत्रीपूर्ण सम्बन्धलाई थप सुदृढ बनाउन सहयोग पुग्ने विश्वास नेपाली सेनाले लिएको छ,’ सेनाद्वारा जारी विज्ञप्तीमा भनिएको छ ।

समापन कार्यक्रममा बलाध्यक्ष रथी सरोज प्रताप राणा, अमेरिकी राजदूत र्‍यान्डी बेरी, सैनिक तालिम महानिर्देशनालयका महानिर्देशक उपरथी निरन्जन कुमार श्रेष्ठ, युद्धकार्य विभागका प्रमुख उपरथी निर्मलकुमार थापालगायतको उपस्थिती थियो ।

प्रकाशित : मंसिर १४, २०७८ १९:२७
पूरा पढ्नुहोस्
प्रतिक्रिया
पठाउनुहोस्
×