अछाममा बस दुर्घटना : २ को मृत्यु, २९ घाइते- समाचार - कान्तिपुर समाचार
कान्तिपुर वेबसाईट
AdvertisementAdvertisement

अछाममा बस दुर्घटना : २ को मृत्यु, २९ घाइते

मेनुका ढुंगाना

अछाम — अछाममा बस दुर्घटना हुँदा २ जनाको मृत्यु भएको छ । २९ जना घाइते भएका छन् । घाइते २१ जनाको जिल्ला अस्पताल र ८ जनाको बयालपाटा अस्पतालमा उपचार भइरहेको छ । मंगलसेनबाट धनगढी जाँदै गरेको ना ६ ख ८२९ नम्बरको बस मंगलसेन नगरपालिका-४ मा दुर्घटना भएको हो ।

दुर्घटनामा मंगलसेन नगरपालिका-१ का २२ वर्षीया अनमोल थापाको मृत्यु भएको छ । रोजगारीका लागि विदेश जान उनी घरबाट बिदा भएर निस्केको उनका आफन्तले बताएका छन् । मृत्यु भएका अर्का यात्रुको भने सनाखत हुन नसकेको अछामका प्रहरी प्रमुख डिएसपी तुल्सीराम अर्यालले बताए । ‘गाडी अप्ठ्यारो ठाउँमा उल्टो परेर अड्किएको छ । अहिलेसम्म दुई जनाको शव भेटिएको छ । अझै च्यापिएका छन् कि भन्ने आशंका छ । गाडीलाई सुल्टो पार्ने हाम्रो प्रयास जारी छ’, उनले भने ।

बसमा धेरैजसो कामको खोजीमा जान थालेका परिवार र अध्ययनका लागि काठमाडौंलगायतका सहरमा जान लागेका विद्यार्थी रहेको जिल्ला अस्पताल मंगलसेनमा उपचाररत घाइते मंगलसेन नगरपालिका ३ की २४ वर्षीया सिर्जना साउदले बताइन् । मंगलसेनबाट चढेको बस १५ मिनेट नबित्दै दुर्घटना भएको उनको भनाइ छ ।‘घटना स्थलभन्दा अलि पर सिर्जना चोक नजिक पनि बसको पांग्रा नालीमा जान लागेको थियो । त्यतिखेर पनि हामी डरले चिच्याएका हौं । अलि अगाडि नपुग्दै गाडी रोडभन्दा तल खस्यो ।’ घाइते भएकाहरुलाई उद्धार गर्नुभन्दा पनि ड्राइभरलाई भाग्नै हतार जस्तो देखिन्थ्यो । उनकै लापरबाहीले गाडी पल्टिएको हो,’ उनले भनिन् । सिर्जनासहित उनका बुवा, आमा दाइ र भाइ कामको खोजीमा भारत जान लागेका थिए ।

सोही बसमा यात्रामा रहेकी मंगलसेन नगरपालिका १४ की काली सोडारीले आफू रुखमा अड्किएर बाँचेको बताइन् । ‘मेरै छेउमा सिट भएका एक जनाको मृत्यु भयो । उनी झ्याल साइडमा थिए । म भने कसरी रुखमा अड्किए छु । शरीर पुरै थिचिएको छ,’ उनले भनिन्,‘मलगायत मेरो सबै परिवार त्यही गाडीमा थियौं । अरुको अवस्था के छ भन्ने जानकारी छैन । कामको खोजीमा भारत जान लागेका हामी कोही जिल्ला अस्पतालमा छौं । कोही बयालपाटा अस्पतालमा छन् ।’

प्रकाशित : मंसिर १४, २०७८ १८:००
प्रतिक्रिया
पठाउनुहोस्

सिद्धार्थ बैंकका ग्राहकलाई स्पर्श मल्टिस्पेसियालिटी अस्पतालमा २५ प्रतिशतसम्म छुट

कान्तिपुर संवाददाता

काठमाडौँ — सिद्धार्थ बैंक र वीरगञ्जको बहुअरी स्थित स्पर्श मल्टिस्पेसियालिटी अस्पतालबीच एक सम्झौता भएको छ । सिद्धार्थ बैंकका ग्राहकलाई अस्पतालको सेवामा छुट दिने सम्बन्धी सम्झौता भएको हो । उक्त सम्झौता पत्रमा बैंकका तर्फबाट वीरगञ्ज शाखा प्रबन्धक बाबुराम न्यौपाने तथा अस्पतालका तर्फबाट प्रबन्ध निर्देशक निमेश पल रमनले हस्ताक्षर गरे । 

सम्झौता अनुसार बैंकका ग्राहकहरुले स्पर्श मल्टिस्पेसियालिटी अस्पतालमा डेबिट, क्रेडिट तथा प्रिपेड कार्ड, मोबाईल बैंकिङ्ग, इन्टरनेट बैंकिङ्ग प्रयोग गरी भुक्तानी गरेबापत विभिन्न सेवा शुल्कमा २५ प्रतिशतसम्मको छुट पाउने छन् ।

यसले ग्राहकलाई छुटको सुविधा उपलब्ध हुनुका साथै डिजिटल कारोबारमा प्रेरित गर्ने बैंकको भनाइ छ । बैंकले डिजिटल बैंकिङ्ग माध्यमको प्रयोगलाई बढाउन विभिन्न सुविधा प्रदान गर्दै आएको छ ।


प्रकाशित : मंसिर १४, २०७८ १८:००
पूरा पढ्नुहोस्
प्रतिक्रिया
पठाउनुहोस्
×