स्याल–कुकुर धपाएर उडान- समाचार - कान्तिपुर समाचार

स्याल–कुकुर धपाएर उडान

फायर अलार्म भेहिकलको आवाज विमानस्थलबाट आयो भने बुझे हुन्छ– जहाज आउन लाग्यो, पशुपन्छी धपाउने काम भइरहेको छ
कृष्णप्रसाद गौतम, हरिहरसिंह राठौर

हुम्ला — हुम्लाको सिमकोट विमानस्थलमा कार्यरत नीरज थापा हरेक बिहान ५ बजे नै उठ्छन् । आपत्कालीन अवस्थामा प्रयोगका लागि विमानस्थलमा राखिएको अल्ट्रालाइट फायर भेहिकल स्टार्ट गरी विमानस्थल वरिपरि साइरन बजाउँदै उनको दिनचर्या सुरु हुन्छ । एकाबिहानै गाडीबाट साइरन बजाउनुको कारण हो– विमानस्थलभित्र छिरेका भोटेकुकुर र स्याल धपाउने । 

सिमकोटका स्थानीयले सुरक्षाका लागि घर घरमा भोटेकुकुर पालेका छन् । विमानस्थल सँगै झाडीबुट्यान छन्, जहाँ स्यालको बास छ । उडान नहुँदा र साँझ–बिहान कुकुर र स्यालका हूल विमानस्थल पस्ने गरेका छन् । ‘साइरन बजाएर एयरपोर्ट परिक्रमा गर्दा रनवेमा पसेका कुकुर र स्याल पनि भाग्छन् । बजारवासीलाई जहाज आउँदै रैछ भन्ने सूचना पनि हुन्छ,’ वरिष्ठ सहायक थापाले भने ।

२०३६ सालदेखि सञ्चालनमा आएको सिमकोट विमानस्थल ६ सय ५० मिटर लम्बाइको छ । विमानस्थलको रनवेमा ५ फिट अग्लो फलामे पक्की घेराबेरा लगाइएको छ । ‘घेराबेरा नाघेरै कुकुर पस्छन्, ढलबाट स्याल रनवेसम्म पुग्छन्,’ विमानस्थल प्रमुख मोहन गिरीले भने, ‘त्यसैले दैनिकजसो साइरन बजाउँदै रनवेमा गाडी गुडाउँछौं ।’ एक दशक कालोपत्र गरिएको विमानस्थल हिमाली जिल्लामध्ये लुक्लापछि व्यस्तमा पर्छ । सिमकोटमा दैनिक ६ देखि एक दर्जन उडान हुने गरेको उनले बताए ।

यति व्यस्त विमानस्थलकै कम्पाउन्डभित्रैबाट बग्छ सदरमुकामको ढल । सदरमुकाममा रहेका होटल, मासुपसल तथा स्थानीयवासीका घरहरूबाट निस्किएका हाडखोर, मासुका टुक्रालगायत अन्य फोहोरहरू विमानस्थलभित्रै रहेका दुईवटा ढलबाट बग्ने भएपछि राति स्याल, कुकुर तथा दिउँसो काग र चिललगायत अन्य पन्छीको बिगबिगी हुने गरेको हो । करिब १२ सय परिवारको ढल बग्ने ठाउँ एयरपोर्ट कम्पाउन्ड नै हुँदा पशुपन्छीले हैरान बनाएको विमानस्थल कार्यालयले जनाएको छ । गाडी रनवेमा नियमित गुड्दा विमानस्थलमा फेला पर्ने किला र सिसाहरू पनि हटाउन सहज भएको प्रमुख गिरी बताउँछन् । उनका अनुसार फायर भेहिकलमा दुई जना कर्मचारी नियमित परिचालन गरिएका छन् ।

नागरिक उड्डयन प्राधिकरणले ३ वर्षअघि करिब २ करोड रुपैयाँमा खरिद गरी उक्त गाडी सिमकोट पठाएको हो । यसले जहाजमा आगलागी हुने जोखिम भए अग्नि नियन्त्रणको काम गर्छ । ‘मुख्य काम आगो नियन्त्रण गर्ने हो,’ विमानस्थल प्रमुख गिरीले भने, ‘अहिले भने दैनिक कुकुर, स्याल र चराचुरुंगी नियन्त्रणमा पनि प्रयोग गरिरहेका छौं ।’

कहिलेकाहीं दिउँसो पनि गाडी परिचालन गरिने उनले बताए । हुम्ला विमानस्थलमा कुनै समय सिमकोट हुँदै मानसरोवर–कैलाश दर्शन गर्न जाने भारतीय पर्यटकका कारण जहाजको उडान गर्न भ्याइनभ्याइ थियो । लकडाउनअघि एकै दिन १ सय ३२ उडान भएको विमानस्थलको तथ्यांक छ । अहिले नेपाल वायुसेवा निगमले आइतबार, मंगलबार, बिहीबार र शनिबार सिमकोट उडान भरिरहेको छ । त्यस्तै तारा, सीता र समिट एयरलाइन्सले पनि उडान नियमित गरिरहेको विमानस्थल प्रमुख गिरीले बताए । नेपाल एयरलाइन्सले नेपालगन्ज– सिमकोटको भाडा ६ हजार ९ सय १० तोकेको छ भने सीता र समिट नेपालगन्ज–सिमकोट दूरीमा ६ हजार १ सय ५० रुपैयाँ भाडा लिइरहेका छन् । निजी जहाज कम्पनीले सुर्खेतका लागि भने ५ हजार ६ सय रुपैयाँ लिइरहेको विमानस्थल कार्यालयले जनाएको छ ।

अहिले विमानस्थलबाट दैनिक १ सय ५० देखि २ सय यात्रु आउजाउ गरिरहेका छन् । तर दसैंदेखि पर्याप्त उडान नहुँदा गाउँबाट आएका यात्रु विमानस्थल आसपासका होटलमा अलपत्र हुने समस्या छ । ‘अहिले ७ देखि १० वटा फ्लाइट भइरहेका छन्,’ विमानस्थल प्रमुख गिरीले भने, ‘दैनिक १० फ्लाइट भए अहिलेको अवस्थामा पुग्थ्यो ।’ उनले पर्याप्त उडान नहुँदा एयरलाइन्सका कार्यालयमा बाहिर जाने यात्रुको भीड लाग्ने गरेको बताए ।

प्रकाशित : मंसिर १४, २०७८ ०८:४९
प्रतिक्रिया
पठाउनुहोस्

पराग अग्रवाल बने ट्विटरका नयाँ सीईओ

कान्तिपुर संवाददाता

काठमाडौँ — माइक्रोब्लगिङ प्लेटफर्म ट्विटरको नयाँ प्रमुख कार्यकारी अधिकृत(सीईओ) मा भारतीय मूलका पराग अग्रवाल नियुक्त भएका छन् । सहसंस्थापक ज्याक डोर्सीले सीईओबाट राजीनामा दिएपछि अग्रवाललाई उक्त पदमा नियुक्त गरिएको हो । 

डोर्सीले ट्वीटमार्फत नै अग्रवाललाई सीईओमा नियुक्त गरिएको बताएका छन् । अग्रवाल आईआईटी बम्बईका ग्र्याजुएट हुन् । डोर्सीले ट्वीटमा लेखेका छन्, ‘करिब १६ वर्षसम्म कम्पनीको सहसंस्थापक, सीईओ, अध्यक्ष, कार्यकारी अध्यक्ष, कार्यकारी सीईओलगायतका भूमिका निर्वाह गरिसकेपछि मैले तय गरेँ कि मेरो छोड्ने समय आएको छ, तर किन ?’

उनले अगाडि लेखेका छन्, ‘पहिलो कारण यो कि पराग अग्रवाल अब सीईओ बनिरहेका छन् । हाम्रो कम्पनीको बोर्ड सबै विकल्प पूर्ण रूपमा नियालिसकेपछि परागलाई चयन गरेको हो । उनले कम्पनीको आवश्यकता निकै गहिराइपूर्वक बुझ्न सक्छन् । त्यसैले पनि उनी लामो समयदेखि नै मलाई मन पर्ने व्यक्तिका रूपमा रहेका छन् ।’

पराग अग्रवाल निकै उत्सुक, तार्किक, रचनात्मक, महत्वाकांक्षी, जागरुक र विनम्र रहेको भन्दै डोर्सीले प्रशंसा पनि गरेका छन् ।

त्यस्तै ब्रेट टेलर कम्पनीको अध्यक्ष बन्नका लागि पनि आफूले ट्विटरको सीईओबाट राजीनामा दिएको डोर्सीले बताएका छन् । नवनियुक्त सीईओ पराग अग्रवालले पूरा विश्वको नजर अहिले ट्विटरमा रहेको बताएका छन् ।

उनले डोर्सीसहित ट्विटर टिमलाई धन्यवाद दिँदै लेखेको पत्रमा भनेका छन्, ‘पहिलेभन्दा पनि फरक किसिमले विश्वले हामीलाई हेरिरहेको छ । कैयौं व्यक्ति अलग–अलग तरिका र विचारले हामीलाई नियालिरहेका छन् । उनीहरू हाम्रो भविष्यलाई लिएर चिन्तित छन् । यसैबाट पनि थाहा हुन्ट कि हामीले गरिरहेको काम कति महत्त्वपूर्ण छ भन्ने । आऔं विश्वलाई ट्विटरको पूरा क्षमता देखाऔं ।’

अग्रवाल सन् २०११ मा सफ्टवेयर इन्जिनियरका रूपमा ट्विटरमा आबद्ध भएका थिए । सन् २०१७ मा उनी प्रमुख प्रविधि अधिकृत बनेका थिए । ट्विटरमा आबद्ध हुनुअघि उनी माइक्रोसफ्ट, याहू र एटी एन्ड टीजस्ता कम्पनीमा पनि काम गरिसकेका थिए ।

प्रकाशित : मंसिर १४, २०७८ ०८:४०
पूरा पढ्नुहोस्
प्रतिक्रिया
पठाउनुहोस्
×