डा. बाँस्तोलालाई टेकुबाट हटाइँदै

तर, यही बेला स्वास्थ्य तथा जनसंख्यामन्त्री विरोध खतिवडाले मन्त्रीस्तरीय निर्णय गरी डा. बाँस्तोलालाई भक्तपुरको क्षयरोग केन्द्रमा सरुवा गर्न लागेका हुन् । कोरोना पहिलो र दोस्रो लहरमा खटिएका अनुभवी चिकित्सकलाई अन्यत्र सरुवा गर्न लागेकोप्रति स्वास्थ्य मन्त्रालयकै कर्मचारीहरूसमेत असन्तुष्ट छन् । मन्त्रालय स्रोतका अनुसार बाँस्तोलाको सरुवा पत्र तयार भइसकेको छ ।

अघिल्लो सरकारले कोरोना महामारीका बेला उत्कृष्ट काम गरेको भन्दै पुरस्कृत गरिएका बाँस्तोलालाई निर्देशकको जिम्मेवारी दिएको पाँच महिनामै खतिवडाले सरुवा गरेका हुन् । बाँस्तोलालाई हटाएर निर्देशकको जिम्मेवारी डा. मनीषा रावललाई दिन लागिएको छ । उनको सरुवाको पत्र तयार भएको मन्त्रीको सचिवालयले समेत पुष्टि गरेको छ । ‘उहाँको सरुवा भएको हो । बाँस्तोलालाई सरुवा गर्दा आलोचना हुन्छ भनेर हामीले मन्त्रीलाई सल्लाह पनि दिएका थियांै तर रोकिएन,’ सचिवालयका एक सदस्यले भने । बाँस्तोलाले पनि आफ्नो सरुवाको हल्ला मिडियाबाट थाहा पाएको बताए । ‘सरुवा भएको भन्ने सुनेको हो तर अरू केही थाहा छैन,’ उनले भने ।

कोरोना संक्रमितको उपचार, नियन्त्रण र रोकथाम गर्न मात्रै योगदान नभई निर्देशक भएपछि अस्पतालको व्यवस्थापनसमेत सुधार गरेका छन् । उनी निर्देशक भएपछि अस्पतालको ओपीडी व्यवस्थित भएको छ । अस्पतालको कुनामा रहेको फार्मेसीलाई सबैले देख्ने ठाउँमा सारेर अस्पतालका बिरामीले बाहिर महँगोमा किन्नुपर्ने बाध्यता हटाएका छन् । अस्पताल परिसर र स्टोर सफाइ गरेर चिटिक्क पारिएको छ । अस्पताल परिसरमा थोत्रा सामान र गाडी थुप्रिएको थियो । ती सबै सामान लिलामी गरेका छन् । अस्पतालमा नयाँ अक्सिजन प्लान्ट जडान गरिएको छ ।

त्यस्तै, अक्सिजन सुविधा नभएका बेडमा अक्सिजन पोर्ट जडान गरिएको छ । उनी निर्देशक भएपछि गरिब र विपन्न नागरिकलाई प्रदान गरेको विवरण हरेक महिना सार्वजनिक गर्ने व्यवस्था मिलाएका छन् । यो व्यवस्थापछि पहुँचवाला बिरामीहरू नि:शुल्क सेवा लिन हच्किन थालेका छन् । त्यस्तै अस्पतालमा पूरा समय काम नगर्ने, हाजिर नहुने चिकित्सक, स्वास्थ्यकर्मी र कर्मचारीको नाम सूचना पाटीमै टाँस्ने व्यवस्था गरिएको छ । जसले गर्दा उनीहरू कार्यालय समय छलेर बाहिर जाने क्रम पनि केही हदसम्म रोकिएको छ ।