कांग्रेस महाधिवेशनको मुखमा निर्वाचन समितिका संयोजक फेरिए- समाचार - कान्तिपुर समाचार

कांग्रेस महाधिवेशनको मुखमा निर्वाचन समितिका संयोजक फेरिए

- यादवको राजीनामा स्वीकृत, घिमिरे संयोजकमा नियुक्त
कान्तिपुर संवाददाता

काठमाडौँ — कांग्रेसको १४ औँ महाधिवेशनको मुखमा निर्वाचन समितिका संयोजक फेरिएका छन् । केन्द्रीय निर्वाचन समितिका संयोजक महादेव यादवले राजीनामा दिएपछि उनको ठाउँमा अर्का अधिवक्ता गोपालकृष्ण घिमिरेलाई मनोनयन गरिएको छ ।

यादवले समितिमा रहेर काम गर्न नसक्ने भन्दै राजीनामा दिएका थिए । सभापति शेरबहादुर देउवाले उनको राजीनामा स्वीकृत गरेका छन् । यादवले आफूले विवादास्पद अवस्थामा पार्टीको महाधिवेशन गराउन नसक्ने भन्दै पटक–पटक पदबाट राजीनामा दिँदै आएका थिए ।

पछिल्लो पटक डडेलधुराको विवादलाई लिएर आन्दोलनरत पक्षसँग चर्को भनाभन भएपछि यादवले कार्यालय जानै छाडेका थिए । निर्वाचन समितिको काम नै रोकिने अवस्था भएपछि सभापति देउवाले उनको राजीनामा स्वीकृत गरेका हुन् । समितिको संयोजकको जिम्मेवारी पाएका घिमिरे निर्वाचन समितिकै सदस्य थिए ।

कांग्रेसको जिल्ला अधिवेशन चलिरहेको छ भने मंसिर २४ देखि २६ गतेसम्म काठमाडौंमा केन्द्रीय महाधिवेशन हुँदैछ ।

प्रकाशित : मंसिर १२, २०७८ १२:४८
प्रतिक्रिया
पठाउनुहोस्

सेयर बजार खुलेको डेढ घण्टामै ५६ अंकको गिरावट

कान्तिपुर संवाददाता

काठमाडौँ — आइतबार सेयर बजारमा ठूलो गिरावट आएको छ । बजार खुलेको डेढ घण्टामै परिसूचक नेप्से  ५६ अंकले घटेको हो । राष्ट्र बैंकले सार्वजनिक गरेको मौद्रिक समीक्षाले सेयर कर्जाको ४–१२ करोड सीमालाई यथावत राखेपछि बजारमा गिरावट आएको हो ।

कतिपयले मौद्रिक समीक्षामार्फत यो सीमाको दायरालाई बढाउने अपेक्षा गरेका थिए । यद्यपि राष्ट्र बैंकले सीमामा कुनै परिवर्तन गरेन । त्यस्तै तरलता बढाउनेगरी मौद्रिक समीक्षामा कुनै ठोस कार्यक्रम नआएपछि बजार प्रभावित भएको हो । यसले बैंकको ब्याजदर बढाउनमा अझै दवाव परेको छ ।

साढे १२ बजेसम्म २ अर्ब १४ करोड रुपैयाँको सेयर किनबेच भएको छ भने सबै उपसूचक राताम्मे भएका छन् । १७८ कम्पनीको मूल्य घट्दा ५ कम्पनीको मूल्य मात्रै बढेको छ ।


प्रकाशित : मंसिर १२, २०७८ १२:३९
पूरा पढ्नुहोस्
प्रतिक्रिया
पठाउनुहोस्
×