पहिले सभापति उठेका नेताहरू अब विश्राम लिनुस् : निधि- समाचार - कान्तिपुर समाचार
कान्तिपुर वेबसाईट
AdvertisementAdvertisement

पहिले सभापति उठेका नेताहरू अब विश्राम लिनुस् : निधि

कान्तिपुर संवाददाता

काठमाडौँ — कांग्रेस उपसभापति विमलेन्द्र निधिले १३ औँ महाधिवेशनमै सभापतिमा प्रतिष्पर्धा गरेका नेताहरूलाई अब विश्राम लिन आग्रह गरेका छन् । उनले सभापति शेरबहादुर देउवा र वरिष्ठ नेता रामचन्द्र पौडेललाई पार्टीको सर्वोच्च नेता भएर बस्न आग्रह गरे ।

आसन्न महाधिवेशनमा सभापतिमा उम्मेदवारी दिने घोषणा गरेका निधिले बिहीबार आफ्ना प्रतिवद्वता र योजनाहरु सार्वजनिक गर्दै अब पार्टीको नेतृत्व गर्न दोस्रो पुस्ता सक्षम रहेको बताएका हुन् ।

उनले महाधिवेशनमा समीकरण बनाएर मिलेर अघि बढ्ने विषयमा सबै नेताहरूसँग छलफल भइरहेको बताए ।

‘म समीकरण बनाउनका लागि प्रकाशमानजी, शशांकजी र शेखरजीहरूसँग निरन्तर संवादमा छु । गम्भीर र सकारात्मक संवाद भइरहेको छ । १३ औँ महाधिवेशनमा जो-जो सभापतिको प्रत्यासी हुनुहुन्थ्यो, उहाँहरूले अब १४ औँ महाधिवेशनमा फेरि त्यही पदमा चुनाव नलड्नुस् भन्ने हाम्रो साझा धारणा हो,’ निधिले भने, ‘यसमा हामी चारै जनाको सैद्धान्तिक सहमति छ ।’

उपसभापति निधिले अब पनि आफूले सभापतिको उम्मेदवारीबाट पछि हट्छ कि भनेर शंका नगर्न आग्रह गरे । ‘म सभापतिको उम्मेदवार छु, मैले घोषणा पत्र पनि सार्वजनिक गरिसकेँ । अब २१ गते सभापति पदमा उम्मेदवारी दर्ता गराउँछु । यसमा तपाईहरू ढुक्क हुनुस्,’ निधिले भने ।

उनले पार्टीको नेतृत्वमा पहिलो पुस्ताले त्याग गरेपनि उनीहरूलाई पार्टीको सर्वोच्च नेताकारुपमा सम्मान दिन आफूहरू तयार रहेको बताए ।

‘शेरबहादुरजी, रामचन्द्रजीहरूलाई हामी कांग्रेसको सबैभन्दा सर्वोच्च नेताका रुपमा राख्छौँ, जसरी गणेशमानजी र किसुनजीहरू हुनुहुन्थ्यो, त्यस्तै सम्मान दिन चाहान्छौँ,’ निधिले भने, ‘हामीले छलफल गरिरहेका छौँ । पार्टीको नेतृत्व एकातिर छ, राज्यको फरक भूमिका छ । उहाँहरू राज्यको पदहरूमा बस्न सक्नुहुन्छ । उहाँहरूले गाइड गर्नुहुन्छ, हामी पार्टी चलाउँछौँ । उहाँहरूसँग सल्लाह र परामर्श गरेर नै हामी उहाँहरूको उचित भूमिका तय गर्छौँ । यो ठूलो समस्या होइन, हुँदैन ।’

उनले सबै नेताहरूलाई आफूलाई सहयोग गर्न आग्रह र संवाद गरिरहेको बताए । ‘म उम्मेदवार छु, रहन्छु । म सबैभन्दा पहिले शेरबहादुरजीकै समर्थन चाहन्छु । रामचन्द्रजी, शेखरजी, प्रकाशमानजी र शशांकजीहरू सबैको समर्थन चाहन्छु,’ उनले भने ।

प्रकाशित : मंसिर ९, २०७८ १८:०८
प्रतिक्रिया
पठाउनुहोस्

प्रधानमन्त्री देउवालाई वाग्लेले भने- 'बालुवाटारमा सुतिरहने हो भने बुढानीलकण्ठ फर्किए हुन्छ'

कान्तिपुर संवाददाता

काठमाडौँ — नागरिक अभियन्ता नारायण वाग्लेले न्यायालयको समस्या समाधान नगर्ने हो भने बालुवाटारबाट घर फर्कन प्रधानमन्त्री शेरबहादुर देउवालाई चुनौती दिएका छन् । न्यायालयको विवाद समाधानमा दलले निकास दिनुपर्ने भन्दै बिहीबार आयोजित सर्वोच्च अदालत-बालुवाटार 'न्याय मार्च' पछि सम्बोधन गर्दै अभियन्ता वाग्लेले प्रधानमन्त्री देउवालाई बालुवाटारमा सुतिरहने हो भने बुढानीलकण्ठ फर्किन सुझाव दिएका हुन् ।

'एक महिना न्यायालय अवरुद्ध छ । त्यो अदालत र आन्दोलन जसले बुढानिलकण्ठमा सुतिरहेका व्यक्तिलाई पानी छम्केर बालुवाटारमा ल्यायो । तिनी एक महिनासम्म बालुवाटारमा सुतेको सुत्यै छन्,' वाग्लेले भने, 'यदि सुतिरहने हो भने बुढानिलकण्ठ फर्किए हुन्छ ।'

सडकको मुद्दाको बलमा सत्तामा गएको भोलिपल्टदेखि नै प्रतिगमनको मतियार हुने वा आफैं प्रतिगमनको सुत्रधार हुने राजनीतिक पंक्तिलाई जवाफ दिन नागरिक आन्दोलन जारी रहने उनले बताए ।

यस्तै वाग्लेले नेकपा (एमाले)का अध्यक्ष केपी शर्मा ओली र नेकपा (माओवादी केन्द्र) का अध्यक्ष पुष्पकमल दाहालको मौनताप्रति पनि आलोचना गरेका छन् ।

प्रधानन्यायाधीश चोलेन्द्रशमशेर जबरालाई महाअभियोग लगाउन र न्याय क्षेत्रको शुद्धीकरणका लागि भन्दै बिहीबार विभिन्न पेसागत संगठनहरुले सर्वोच्च अदालत-बालुवाटार न्यायमार्च गरेका हुन् ।

प्रकाशित : मंसिर ९, २०७८ १७:४८
पूरा पढ्नुहोस्
प्रतिक्रिया
पठाउनुहोस्
×