दलको हिसाबकिताब पारदर्शी बनाउन निर्वाचन आयोगले बनायो लेखा राख्ने ढाँचा
काठमाडौँ — निर्वाचन आयोगले राजनीतिक दलहरुको हिसाब किताब पारदर्शी हुनुपर्ने भन्दै आय र व्ययको लेखा राख्ने एकैप्रकारको ढाँचा तयार गरेको छ । आयोगले राजनीतिक दल सम्बन्धी ऐन, २०७३ को दफा ४० बमोजिम दलको आय र व्ययको लेखा राख्ने ढाँचा तयार गरी स्वीकृत गरेको हो ।
बिहीबार बसेको आयोगको बैठकले त्यस्तो ढाँचा स्वीकृत गरेको आयोगका प्रवक्ता शालिग्राम शर्मा पौडेलले जानकारी दिए । आयोगले दलले गर्ने आम्दानी र खर्चलाई विभिन्न शीर्षकमा वर्गीकरण गरी आम्दानी र खर्चको लेखा तथा प्रतिवेदनको लागि आठवटा फारामहरूको ढाँचा तोकेको छ । आयोगले उपलब्ध गराएको फाराममा नै दलहरुले लेखाको विवरण राख्नुपर्ने निर्देशिकामा व्यवस्था गरिएको छ ।
लेखाको ढाँचा तयार गर्ने सम्बन्धमा सबै राजनीतिक दलहरू तथा सम्बन्धित विज्ञहरूसँग सुझाव संकलन गरी प्राप्त सुझावहरू समेत समावेश गरी दलको आय र व्ययको लेखाको ढाँचा तोकिएको प्रवक्ता पौडेलले बताए । 'यस्तो ढाँचामा दलले आम्दानी र खर्चको लेखा राख्ने र प्रतिवेदन गर्ने हुनाले यस व्यवस्थाले राजनीतिक दलको आर्थिक कारोबार व्यवस्थित, पारदर्शी र एकरूपता हुने विश्वास आयोगले लिएको छ,' प्रवक्ता पौडेलले भने ।
प्रकाशित : मंसिर ९, २०७८ १६:४६