२४ घण्टामा ३०५ कोरोना संक्रमित थपिए, २३२ जना निको
काठमाडौँ — पछिल्लो २४ घण्टामा नेपालमा कोरोनाबाट ३०५ जना संक्रमित भएका छन् । स्वास्थ्य तथा जनसंख्या मन्त्रालयद्वारा बुधबार जारी सूचनामा ७ हजार ५९० पीसीआर नमुना परीक्षण गर्दा ३०५ जनामा कोरोना पोजिटिभ देखिएको उल्लेख छ ।
यस्तै, २३ सय ३० एन्टिजेन परीक्षण गर्दा २७ जनामा पोजिटिभ देखिएको छ । नेपालमा हालसम्म ८ लाख २० हजार ४ जनामा कोरोना संक्रमण देखिएको छ ।
बुधबार २३२ जना संक्रमणमुक्त भएका छन् । योसँगै नेपालमा कोरोनाबाट निको हुनेको संख्या ८ लाख १ हजार १२२ पुगेको छ । निको हुने दर ९७.७ प्रतिशत हो ।
यस्तै, हालसम्म कोरोनाबाट ११ हजार ५१३ जनाको मृत्यु भएको मन्त्रालयले जनाएको छ । बुधबार थप ४ जनाको कोरोनाबाट मृत्यु भएको सूचनामा उल्लेख छ ।
हाल देशभर सक्रिय संक्रमितको संख्या ७ हजार ३६९ छन् भने ९८ जना क्वारेन्टाइनमा छन् ।
मन्त्रालयका अनुसार नेपालमा हालसम्म ८० लाख ५९ हजार ३०२ जनाले कोरोनाको पूर्ण खोप लगाएको मन्त्रालयले जनाएको छ ।
प्रकाशित : मंसिर ८, २०७८ १७:३१