चाक्सीबारीमा शशांक–प्रकाशमान समझदारी : ‘अब संयमित भएर अघि बढौँ’ - समाचार - कान्तिपुर समाचार
कान्तिपुर वेबसाईट
AdvertisementAdvertisement

चाक्सीबारीमा शशांक–प्रकाशमान समझदारी : ‘अब संयमित भएर अघि बढौँ’ 

प्रकाश धौलाकोटी

काठमाडौँ — कांग्रेस महामन्त्री शशांक कोइरालाले पूर्वमहामन्त्री प्रकाशमान सिंहसँग भेटवार्ता गरेका छन् । पार्टीको १४ औँ महाधिवेशनमा सभापतिका आकांक्षी समेत रहेका कोइराला र सिंहबीच केही सातायता एकापसमा घोचपेचको श्रृंखला नै चलेको थियो ।

सिंह वरिष्ठ नेता रामचन्द्र पौडेल र कोइराला परिवारका नेताहरूप्रति तिखो बोली प्रहार गर्दै सम्पर्कमा समेत थिएनन् । सिंह एक्लै सभापतिको तयारीमा अघि बढेपछि शेरबहादुर देउवालाई सभापतिमा पराजित गर्न सबै जना मिलेर जानुपर्ने अवस्था रहेको भन्दै नेताहरू एकपछि अर्कोले भेटेर सिंहलाई फकाउने प्रयास गरिरहेका छन् । महामन्त्री कोइराला नेता सिंहलाई भेट्न शनिबार दिउँसो उनको निवास ठमेल चाक्सीबारी पुगेका थिए । यसअघि बिहीबार वरिष्ठ नेता पौडेल र शुक्रबार केन्द्रीय सदस्य शेखर कोइरालाले पनि सिंहसँग भेटवार्ता गरेका थिए ।

महाधिवेशन नजिकिँदै गर्दा सभापतिका आकांक्षी रहेका सिंह र कोइरालाबीच केही सातायता एकापसलाई चोट पर्ने गरी भनाभन हुँदै आएको थियो । शनिबारको भेटपछि दुवै जनाले संयमित भएर अघि बढ्ने समझदारी गरेका छन् ।

‘महामन्त्रीज्यू आउनुभएको थियो, करिब एक घण्टा बस्नुभयो,’ चाक्सीबारी स्रोतले भन्यो, ‘केही दिनयता भएका भनाभनको विषयमा पनि समीक्षा भयो । ती कुराले दुवैलाई राम्रो नगर्ने र त्यो नियतवश नभएको भन्नेसम्मको समझदारी भयो ।’

भेटमा महामन्त्री कोइरालाले सिंहलाई सामूहिक रुपमा छलफल गरेर महाधिवेशनको तयारीमा अघि बढ्न प्रस्ताव गरेका थिए । ‘एक्ला एक्लै भिडेर केही हुने अवस्था छैन । मिलाएर जानुपर्छ । तपाईं आफूमात्रै अघि बढ्ने कुरा नगर्नुहोला,’ कोइरालाले भनेका थिए ।

उनले आफ्नो टिमका सबै जना बसेर छलफल गरेर अघि बढ्नुपर्नेमा जोड दिएका थिए । ‘हामी–हामीबीचमै मतभेद भयो भने राम्रो हुँदैन । सबैलाई मिलाएर जानुपर्छ । सबै जना बसेर सल्लाह गरौँ,’ कोइरालाको भनाइ उदृत गर्दै स्रोतले भन्यो ।

जवाफमा नेता सिंहले आफूले मात्रै सधैँ त्याग गर्नुपर्ने कुरा नगर्न भनेका थिए । ‘मैले छलफल नगरौँ भनेको छैन । छलफल पनि गरौँ । समझदारी र सहमति पनि गरौँ । म त पावर सेयरिङ गर्न पनि तयार छु,’ सिंहले भनेको उदृत गर्दै निकट एक नेताले भने, ‘म सभापतिको उम्मेदवार हो । यसमा म छलफल गर्न तयार छु ।’

भेटमा सिंहले कोइरालालाई कोइराला परिवारबाट एक जनामात्रै उम्मेदवार बन्ने विषयमा भएको सहमति के हो ? भनेर प्रश्न गरेका थिए । कोइरालाले त्यस्तो पत्रकार सम्मेलन नै गर्ने गरेर कुनै सहमति नभएको बताए ।

कोइराला र सिंह कांग्रेसका संस्थापक नेतापुत्र हुन् । सिंह गणेशमानका छोरा हुन् भने कोइराला बीपीका । सिंह नेविसंघको राजनीति गरेर पार्टीको काठमाडौं सभापति हुदै केन्द्रीय राजनीतिमा आएका हुन् । कोइराला चिकित्सक पेशाबाट सिधैं पार्टी राजनीतिमा आएका हुन् ।

आफू पार्टी सभापतिका लागि 'नेचुरल क्याण्डिडेट' भनेर दाबी गर्दै आएका सिंहले कोइरालालाई लक्षित गर्दै ‘मौका पाएर पनि काम गर्न नसक्नेहरूलाई महाधिवेशनबाट फेरि जिम्मेवारी दिन नहुने’ अभिव्यक्ति दिएका थिए । कोइरालाहरूले आफूले जस्तो 'ग्रासरुट'को राजनीति नबुझेको सिंहको टिप्पणी छ ।

उनको भनाइबाट आक्रोशित बनेका महामन्त्री कोइरालाले गत साता सर्लाहीमा भएको कार्यक्रममा ‘प्रकाशमानलाई काठमाडौं बाहिर कसैले नचिन्ने’ अभिव्यक्ति दिएका थिए । कोइराला र सिंहबीच आरोप–प्रत्यारोप हुँदै आएको थियो ।

शनिबारको छलफलपछि उनीहरूले यसरी आरोप-प्रत्यारोपमा उत्रिँदा आफैंलाई क्षति हुने निष्कर्ष निकालेका छन् ।

कांग्रेसमा सभापतिका लागि संस्थापनतर्फ देउवासँग उपसभापति विमलेन्द्र निधि र पूर्वसभापति गोपालमान श्रेष्ठ समेत आकांक्षी छन् । पौडेल समूहमा वरिष्ठ नेता पौडेल, महामन्त्री कोइराला, पूर्वमहामन्त्री सिंह र केन्द्रीय सदस्य सभापतिका मुख्य आकांक्षी छन् ।

संस्थापन पक्षबाट सबैभन्दा बलियो उम्मेदवार देउवा नै भएकाले देउवालाई पराजित गर्ने गरी आफूहरूमध्ये सबैभन्दा बलियो उम्मेदवारलाई टिमबाट सर्वसम्मत सभापतिको उम्मेदवार बनाएर महाधिवेशनमा होमिनुपर्ने पौडेल समूहका नेताहरूको भनाइ छ । त्यसका लागि प्रयत्न पनि नभएको होइन ।

तर अहिलेसम्म त्यस्तो कुनै सहमति जुट्न सकेको छैन । बरु एकले अर्कालाई कमजोर तुल्याउन नेताहरू आरोप प्रत्यारोपको तहमा उत्रिन थालेका छन् । यसअघि १८ भदौको वडा अधिवेशन अगाडि चारै जना आकांक्षीले एउटै मञ्चबाट आफूहरूमध्ये एक जनामात्रै सभापतिको साझा उम्मेदवार बन्ने घोषणा गरेका थिए ।

त्यसपछि भने आकांक्षी चारै नेताहरू एकै ठाउँमा भेला हुनै कठिन पर्दै आएको छ । वरिष्ठ नेता पौडेलले तीन जना मिलेर आए आफू बाधक नबन्ने बताइसकेका छन् ।

‘सबैको सहमति भयो भने म बाधक बन्दिनँ । नभए म अघिल्लो पटक हारेको घाइते हुँ । म लड्छु । तीन तहको निर्वाचन सकेर पार्टीको नेतृत्व हस्तान्तरण गर्छु,’ उनले समूहको भेलामा भनिसकेका छन् । नेता सिंह र कोइरालाद्धयले पनि आफैँ साझा उम्मेदवार बन्नुपर्ने दाबी गर्दै आएका छन् । कांग्रेसको केन्द्रीय महाधिवेशन आगामी मंसिर २४, २५ र २६ गते काठमाडौंमा हुँदैछ ।

प्रकाशित : मंसिर ४, २०७८ १६:१७
प्रतिक्रिया
पठाउनुहोस्

डाक्टर सरुवा भएपछि सल्यान अस्पतालमा शल्यक्रिया र जटिल प्रसूति सेवा बन्द

विप्लव महर्जन

सल्यान — जिल्ला अस्पताल सल्यानबाट दुई डाक्टर सरुवा भएर गएपछि अस्पतालले शल्यक्रिया र जटिल प्रसूति सेवा बन्द गरेको छ । अस्पतालमा कार्यरत एमडिजिपी डाक्टर प्रदीप शर्मा र डाक्टर एन्जिला श्रेष्ठ सरुवा भएर गएपछि अन्य सर्जनको अभावमा शल्यक्रिया र जटिल प्रसूति सेवा शुक्रबारदेखि बन्द भएको जनाएको हो ।



जिल्ला अस्पतालले ती सेवा बन्द गरेपछि जिल्लाका मात्र नभई छिमेकी जिल्ला रुकुम, रोल्पाका सर्वसाधारणहरूसमेत प्रभावित भएका छन् । केही वर्षदेखि जटिल समस्या भएका बिरामी र सुत्केरी हुन नसकेकालाई शल्यक्रिया गरेर जिल्लामै सहज सेवा उपलब्ध गराउँदैआएको जिल्ला अस्पतालले सेवा संचालन गर्न नसकेपछि उपचारका लागि आएका बिरामीहरू प्रभावित भएका छन् ।

साथै जटिल समस्या देखिएका बिरामी उपचारका लागि बाहिर जाने गरेका छन् । कहिले डाक्टर त कहिले स्वास्थ्यकर्मीको अभावका कारण जिल्लावासीले विभिन्न किसिमका समस्या भोग्दै आउनु परेको छ । दक्ष डाक्टरको अभावमा अस्पतालले शल्यक्रिया सेवा दिन नसकेपछि जिल्लावासी स्वास्थ्य सेवाको अधिकारबाट बञ्चित मात्र भएका छैनन्, बाहिरका अस्पताल धाउनुपर्ने भएपछि उनीहरूले आर्थिक तथा भौतिक समस्या भोग्दैआएका छन् ।

जिल्ला अस्पतालमा कार्यरत आठ जनामध्ये सर्जन तथा एमडिजिपी डाक्टर सरुवा भएर गएपछि अहिले चारजना एमबिबीएस डाक्टर भएका र एमडिजिपी डाक्टर सरुवा भएर गएका ठाँउमा अर्को नआएकै कारण शल्यक्रिया सेवा र जटिल खालका प्रसूति सेवा बन्द भएको जिल्ला अस्पताल सल्यानका डा. असीम प्रजापतीले बताए । उनले शल्यक्रिया रोकिएकै कारण शुक्रबार मात्रै एकजना जटिल समस्या भएका बिरामीलाई अन्यत्र रिफर गरिएको जानकारी गराए ।

‘शल्यक्रिया तथा जटिल प्रसूति सेवा बन्द गर्नु हाम्रो रहर नभई बाध्यता हो’ उनले भने ‘जबसम्म एमडिजिपी डाक्टर तथा सर्जन आउँदैनन् तबसम्म शल्यक्रिया तथा जटिल प्रसूति सेवा संचालनमा आउँदैन ।’

उनका अनुसार एमडिजिपी तथा दक्ष डाक्टर नहुँदा अन्य सेवा पनि प्रभावित भएको छ । स्वास्थ्य कार्यालय सल्यानका निमित्त व्यवस्थापक दशरथ श्रेष्ठले भने एमडिजिपी डाक्टर सरुवा भएर गएपछि सेवा रोकिएको र जसबाट जिल्लावासीहरू सेवाबाट प्रभावित हुनुपरेको स्वीकार गरे । तर सोही पदमा नयाँ विशेषज्ञ डाक्टर आउन केही महिना लाग्ने उनले बताए ।

‘माग भए अनुसार प्रक्रियामा जान केही समय लाग्ने भएकाले एमडिजिपी तथा विशेषज्ञ डाक्टर आउन एक महिनाजति लाग्ने देखिन्छ’ उनले भने । विज्ञ डाक्टरको लागि सम्बन्धित निकायसंग नियमित सम्पर्कमा रहेको उनको भनाइ छ ।

२०४३ सालमा सुरु भएको जिल्ला अस्पताल सल्यानले विभिन्न समयमा कहिले डाक्टर त कहिले अन्य स्वास्थ्यकर्मी अभावका कारण नियमित सेवा दिन सकिरहेको छैन ।

१५ शैय्याको रुपमा संचालित अस्पताल अहिले झन्डै ४० शैय्यामा संचालित छ । केही वर्षदेखि ५० शैय्याको अस्पतालका लागि माग राख्दै आए पनि राजनीतिक नेतृत्वबाट चासो नदेखाइएको अस्पतालमा कार्यरत स्वास्थ्यकर्मीहरू बताउँछन् ।

प्रकाशित : मंसिर ४, २०७८ १५:५१
पूरा पढ्नुहोस्
प्रतिक्रिया
पठाउनुहोस्
×