‘नेपाल–अमेरिका सम्बन्ध सन्तोषजनक’- समाचार - कान्तिपुर समाचार
कान्तिपुर वेबसाईट
AdvertisementAdvertisement

‘नेपाल–अमेरिका सम्बन्ध सन्तोषजनक’

प्रधानमन्त्री देउवा र अमेरिकी सहायक विदेशमन्त्री लुबीच वार्ता
एमसीसी सम्झौता र अमेरिकी सहयोगका विषयमा छलफल
जगदीश्वर पाण्डे

काठमाडौँ — प्रधानमन्त्री शेरबहादुर देउवा र नेपाल भ्रमणमा रहेका दक्षिण तथा मध्य एसियाली मामिला हेर्ने अमेरिकी सहायक विदेशमन्त्री डोनाल्ड लु र उपसहायक विदेशमन्त्री केल्ली किडरलिङको टोलीबीच बिहीबार भेटवार्ता भएको छ । भेटमा दुवै पक्षले नेपाल–अमेरिका सम्बन्ध सन्तोषजनक रहेको उल्लेख गरेका थिए ।

अमेरिकी सहयोग नियोग मिलेनियम च्यालेन्ज कर्पोरेसन (एमसीसी) सँगको सम्झौता कार्यान्वयनमा ढिला भइरहेका बेला नेपाल–अमेरिका सम्बन्धमा यस्तो धारणा आएको हो । सहायक विदेश मन्त्री लु र उपसहायक विदेशमन्त्री किडरलिङ अमेरिकी राजदूत र्‍यान्डी बेरीलाई लिएर प्रधानमन्त्री देउवालाई भेट्न बिहीबार साँझ प्रधानमन्त्रीको सरकारी निवास बालुवाटार पुगेका थिए । त्यहाँ प्रधानमन्त्री देउवा मुख्य–सचिव शंकरदास वैरागी, परराष्ट्र सचिव भरतराज पौड्याल र प्रशासनिक सल्लाहकार पूर्वसचिव जनार्दन नेपालसहित उपस्थित थिए ।

झन्डै एक घण्टा लामो भेटवार्तामा नेपाल–अमेरिका सम्बन्ध, कोभिड–१९ महामारीका बेला नेपाललाई भएको सहयोग, कोभिड–१९ पछिको आर्थिक पुनरुत्थानबारे छलफल भएको थियो । नेपाल र अमेरिकाबीच सन् १९४७ मा कूटनीतिक सम्बन्ध स्थापना भएको हो ।


प्रधानमन्त्री देउवाले ट्वीट गर्दै अमेरिकी सहायक विदेशमन्त्री लुसँग भेट्न पाउँदा खुसी लागेको उल्लेख गरेका छन् । उनले लेखेका छन्, ‘हामीले लामो समयदेखिको नेपाल–अमेरिका मित्रता, सहयोग र बहुआयामिक द्विपक्षीय सम्बन्धका विभिन्न पक्षका विषयमा विचार आदानप्रदान गरेका छौं ।’

अमेरिकी राजदूत र्‍यान्डी बेरीले भेटवार्तापछि ट्वीट गर्दै नेपाल भ्रमणमा रहेका सहायक विदेशमन्त्री लु र उपसहायक मन्त्री किडरलिङले नेपालसँगको सहयोग र साझेदारी जारी राख्ने प्रतिबद्धता गरेको जनाएका छन् । उनले ट्वीटरमा लेखेका छन्, ‘वार्तामा उनीहरू (लु र किडरलिङ) ले पारस्परिक हितको क्षेत्र कोभिड–१९, जलवायु परिवर्तन र अन्य क्षेत्रमा नेपालसँगको सहयोग र साझेदारी जारी राख्ने अमेरिकाको प्रतिबद्धता दोहोर्‍याए ।’

प्रधानमन्त्री देउवा र अमेरिकी टोलीबीच एमसीसीको ५ सय मिलियन अमेरिकी डलर अनुदान रहने नेपालको सडक र ऊर्जा पूर्वाधारसम्बन्धी परियोजनाका लागि भएको सम्झौताबारे पनि छलफल भएको थियो । बैठकमा सहभागी एक अधिकारीका अनुसार प्रधानमन्त्री देउवाले एमसीसी सम्झौता कार्यान्वयनमा नेपाल सकारात्मक रहेको विश्वास भ्रमण टोलीलाई दिलाएका थिए । ४ वर्ष बित्दा पनि एमसीसी सम्झौता नेपालको

संसद्बाट अनुमोदन नहुँदा कार्यान्वयन सुरु भएको छैन । पाँचदलीय सत्ता गठबन्धनभित्र नै एमसीसी सम्झौता अनुमोदन गराउने सम्बन्धमा विवाद छ ।

भेटवार्तापछि परराष्ट्र मन्त्रालयद्वारा जारी विज्ञप्तिअनुसार प्रधानमन्त्री देउवाले नेपालको सामाजिक–आर्थिक विकासमा निरन्तर सहयोग गरेकामा अमेरिकी सरकारलाई धन्यवाद दिएका थिए । देउवाले नेपाललाई कोभिड–१९ विरुद्धको खोप सहयोगप्रति प्रशंसा गरेका थिए ।

सहायक मन्त्री लुले शुक्रबार परराष्ट्रमन्त्री नारायण खड्का, रक्षामन्त्री मीनेन्द्र रिजाल, गृहमन्त्री बालकृष्ण खाँणलगायतसँग सिंहदरबारमा भेटवार्ता गर्ने कार्यक्रम छ । विभिन्न दलका शीर्ष नेतासँग पनि सिंहदरबारमै भेटवार्ता गर्ने कार्यक्रम छ । लुले बिहीबार बिहान स्वास्थ्य तथा जनसंख्यामन्त्री विरोध खतिवडासँग अमेरिकी अनुदानमा प्राप्त फाइजर खोप वितरणबारे शिक्षण अस्पतालमा अवलोकन गरे ।

प्रकाशित : मंसिर ३, २०७८ ०७:४९
प्रतिक्रिया
पठाउनुहोस्

नेपालगन्ज म्याराथनको तयारी पूरा

रूपा गहतराज

नेपालगन्ज — शनिबार हुने सातौं नेपालगन्ज म्याराथनमा चर्चित कलाकार राजेश हमाल पनि सहभागी हुने भएका छन् । म्याराथन सहभागीको हौसला बढाउन अभिनेता हमालको विशेष उपस्थिति रहने आयोजक नेपालगन्ज म्याराथन/क्रिएटिभ ह्यान्ड्सले पत्रकार सम्मेलनमार्फत जानकारी गराएको हो ।

प्रत्येक वर्ष मंसिर ५ मा नेपालगन्जमा म्याराथन हुँदै आएको छ । यसपालि शनिबार पार्न घोषित मितिभन्दा एक दिनअघि म्याराथन गर्न लागेको आयोजकले जनायो ।

गत वर्ष कोरोना महामारीका कारण भव्य गर्न नसकिए पनि यसपालि म्याराथनलाई उत्सवमय बनाउने लक्ष्य लिएको क्रिएटिभ

ह्यान्ड्सका अध्यक्ष टीएस ठकुरीले बताए । विश्वका ठूला सहरमा हुने सिटी म्याराथनको अवधारणामा हुन लागेको नेपालगन्ज म्याराथनमा मुख्य म्याराथन (४२.१९५ किमि), हाफ म्याराथन (२१ किमि), १० किमि पुरुष खुला, ५ किमि महिला खुला, ५ किमि छात्र, ३ किमि छात्रा, किड्स रन (८ देखि १२ वर्ष), २ किलोमिटर कर्पोरेट रन, वाकाथन र ह्वीलचेयर दौड गरी १० इभेन्टमा प्रतिस्पर्धा हुनेछ । सातौं नेपालगन्ज म्याराथनको उद्घाटन युवा तथा खेलकुदमन्त्री महेश्वर गहतराजले गर्ने कार्यक्रम छ ।

सात हजार मानिसलाई दौडाउने योजनाअनुसार नेपालगन्ज म्याराथनको तयारी पूरा गरिएको आयोजकको दाबी छ । राष्ट्रिय स्तरका सबै र विदेशबाट समेत केही धावक नेपालगन्ज म्याराथनमा दौडिँदै छन् ।

सातै प्रदेशका खेलाडी नेपालगन्ज म्याराथनमा सहभागी हुँदै छन् । ‘स्थानीयदेखि अन्तर्राष्ट्रिय खेलाडी एउटै दौडमा हुँदा त्यसले फरक सन्देश पक्कै दिनेछ,’ अध्यक्ष ठकुरीले भने, ‘दौडमार्फत सहर चिनाउने एउटा अवसर पनि हो ।’ चलचित्र अभिनेता हमाल नेपालगन्ज आउने भएपछि दौडको रौनक अझ बढ्ने उनले बताए ।

म्याराथनमा अधिकांश राष्ट्रिय खेलाडी दौडिँदै छन् । विधागत दौडमा भविष्यका धावक र विद्यार्थीको उत्साहपूर्ण सहभागिता देखिँदै आएको छ । ८ देखि १२ वर्ष उमेरका बालबालिका, कर्पोरेट र वाकाथनमा सहरका गन्यमान्य व्यक्तित्वले भाग लिनेछन् । नेपालगन्ज म्याराथनमा अपांगता भएकाहरूले पनि प्रतिभा देखाउने मौका पाउँदै आएका छन् ।

प्रकाशित : मंसिर ३, २०७८ ०७:२७
पूरा पढ्नुहोस्
प्रतिक्रिया
पठाउनुहोस्
×