सीमावर्ती क्षेत्र लिपिङ बजार जोड्ने लिपिङ मोटरवेल पुल उस्तै क्षतिग्रस्त छ । हाल कोदारी बजारभन्दा पल्लोपट्टिको क्षेत्र पूरै खण्डहर बनेको छ । नाकाको मितेरी पुल, सुरक्षाकर्मी चेकपोष्टसहित अध्यागमन कार्यालयको भवनबाहेक सबै संरचना पूरै जीर्ण अवस्थामा छन् । तर सडकको मर्मतसम्भार नगरिँदा बजार खण्डहर बनेको छ भने सडक कन्टेनरलाई धराप राखेजस्तै देखिन्छन् । ०७२ सालको भूकम्पले तातोपानी नाका क्षतिग्रस्त बनाएको थियो । ०७३ को भोटेकोसीको बाढीले त यहाँको भौतिक संरचना ध्वस्त बनाइदियो ।

त्यसयता हरेक वर्ष बाढीपहिरो लगायत प्राकृतिक विपद्ले गर्दा यस क्षेत्रको व्यापार कहिल्यै उठ्न सकेन । भोटेकोसी गाउँपालिकाका अध्यक्ष राजकुमार पौडेलका अनुसार भूकम्पको चार वर्षपछि मालवाहक सवारीका लागि खुलाइएको नाका भोटेकोसी बाढीपहिरो, कोरोना महामारी र ताल फुट्ने हल्लाले झनै खुम्चाइदियो । ‘त्यसपछि नाका कहिल्यै सन्तुलनमा आएन, कोभिड क्षेत्रबीच तातोपानीलाई सुरक्षित अवस्थामा ल्याउन खुब दौडियौं, तैपनि नाका सहज हुने वातावरण बनेन्, न यहाँको भौतिक संरचना मर्मत् सम्भारबारे कुरा उठाइयो,’ पौडेलले भने । ताल फुट्ने र कोरोना महामारीको कारण देखाउँदै चीन पक्षले एकतर्फी आयातको रुपमा मात्रै नाका खुलायो । त्यो पनि नियमित सञ्चालनमा आउन सकेन ।

यसरी २० वर्षदेखि चल्दैआएका एक हजार चार सय मालवाहक कन्टेनर, २ हजार ८ सय चालक र पाँच हजार मजदुरका परिवार बेरोजगार र विस्थापित हुनुपर्‍यो । यसअघि तिब्बतको स्थानीय प्रशासन नेलाम काउन्टीले खासाभन्दा करिब ३५ किमिमाथिको ‘क्यानोन कु’ ताल फुट्ने सम्भावाना भएकाले तातोपानी नाकाबाट कारोबार नर्गन नागरिकलाई सूचना जारी गरेको थियो । पछिल्लो समय तातोपानी नाका खण्डहर बन्दा व्यापारीहरू निराश देखिन्छन् ।