आरोहणमा रहेका ३ फ्रान्सेली पर्यटक सम्पर्कविहीन

थोमस जर्जस्, गाड्रियल पल र लुइस पाछोड नाम गरेका पर्यटकहरू कात्तिक ९ गतेदेखि सम्पर्कविहीन भएका हुन् । चोलप्सा हिमाल र खाङतेगा आरोहणको अनुमति लिएर आएका उनीहरू खाङतेगातर्फ जाने क्रममा मिङबोला हिमाल पार गरेपछि माथिबाट आएको हिमपहिरोमा परी बेपत्ता भएको जिल्ला प्रहरी कार्यालय सोलुखुम्बुका प्रमुख डिएसपी कवित कटवालले बताए ।

उनीहरूसँगै गएका ५ जना भने सम्पर्कमै छन् । हराएकाहरूको खोजीका लागि कैलाश एयरको हेलिकप्टर आइतबार दिनभर परिचालन भए पनि उनीहरूको अवस्थाबारे केही जानकारी आउन नसकेको हेलिकप्टर कम्पनीका कर्मचारी प्रल्हाद चापागाईँले बताए । टेलिफोन नेटवर्क नहुने उक्त स्थान खुम्जुङको प्रहरी चौकीबाट ३ दिनको पैदलमा पर्छ । प्रहरीका अनुसार उनीहरूसँग गत ९ गते मिङबोला हिमालमा अन्तिम सम्पर्क भएको थियो ।