संविधान संशोधन गरी न्यायपालिकामा हस्तक्षेप नहुने व्यवस्था गर्नुपर्छ : नेपाल बार- समाचार - कान्तिपुर समाचार
कान्तिपुर वेबसाईट
AdvertisementAdvertisement

संविधान संशोधन गरी न्यायपालिकामा हस्तक्षेप नहुने व्यवस्था गर्नुपर्छ : नेपाल बार

कान्तिपुर संवाददाता

काठमाडौँ — नेपाल बार एशोसिएसनले प्रधानन्यायाधीश चोलेन्द्र शम्शेर जबराको राजीनामा माग गर्नुका साथै न्यायालयमा हुने राजनीतिक हस्तक्षेप अन्त्य गर्नका लागि संविधान संशोधन गर्न आह्वान गरेको छ । 

प्रधानन्यायाधीश जबराको विषयमा सर्वोच्च अदालतमा जारी विवादको विषयमा छलफल गर्न मंगलबार बसेको नेपाल बारको कार्यसमिति बैठकले संविधान संशोधनको माग पनि अगाडि सारेको छ । नेपाल बारका महासचिव लीलामणि पौडेलले सर्वसम्मतिबाट राजीनामा माग्नुका साथै संविधान संशोधनको आह्वान गरिएको जानकारी दिए ।

'न्यायपालिकामा राजनीतिक हस्तक्षेप बढ्दै जानुमा नेपालको संविधानमा भएका सर्वोच्च अदालतका न्यायाधीशको संसदीय सुनुवाइसम्बन्धी व्यवस्था, संवैधानिक परिषद्मा प्रधानन्यायाधीशको संलग्नताको व्यवस्था, न्याय परिषद्को संरचनासम्बन्धी व्यवस्था लगायतका व्यवस्थाहरू पनि जिम्मेवार छन्,' महासचिव पौडेलले भने, 'नेपालको संविधानमा संशोधन गरी न्यायपालिकामा कार्यपालिका, व्यवस्थापिका र राजनीतिक दलहरूको हस्तक्षेप नहुने व्यवस्था गर्न नेपाल सरकार, संसद् तथा राजनीतिक दलहरू समेतलाई आह्वान गर्दछौं ।'

नेपाल बारले प्रधानन्यायाधीशलाई मन्त्रिपरिषद्मा भाग दिने र न्यायाधीशहरूलाई मानपदवी दिने सरकार र राजनीतिक दलहरूको कामको निन्दा पनि गरेको छ । प्रधानमन्त्री शेरबहादुर देउवाले प्रधानन्यायाधीशका जेठान नाता पर्ने गैरसांसद गजेन्द्र हमाललाई असोज २२ गते मन्त्री नियुक्त गरेका थिए । त्यस्तै, प्रधानन्यायाधीश जबरासहित ५ न्यायाधीशलाई असोज ३ गते पदक दिने निर्णय पनि सरकारले लिएको थियो । यी दुवै कार्यको सर्वत्र विरोध भएको थियो ।


प्रकाशित : कार्तिक ९, २०७८ २१:३६
प्रतिक्रिया
पठाउनुहोस्

बाढीले पिलर कटान गर्दा सिंघीया खोलाको पुल जोखिममा

देवनारायण साह

मोरङ — विराटनगर र पूर्वी मोरङ जोड्ने सिंघीया खोलाको पुल बाढीले कटान गरिरहँदा जोखिममा परेको छ । अघिल्लो साताको बाढीले विराटनगरको हाटखोला र कटहरी बजार जोड्ने पुलको पिलरको जग कटान गरिदिँदा पुल जोखिममा परेको हो ।


पुलका चार पिलरमध्ये पूर्वपट्टिको तीन वटा कटान पिलर भइरहेका छन् । पुलको माथिल्लो भागमा पनि खाल्डैखाल्डो भएर भ्वाङ पर्ने अवस्था हुँदा दुर्घटनाको जोखिम बढेको छ । कटहरी र विराटनगर दुवैतर्फ रहेका उद्योगका लागि कच्चा पदार्थ र उत्पादन बोकेर कन्टेनर, लरीलगायत २२ चक्कासम्मका सयौं ट्रक दैनिक उक्त पुलबाट ओहोर दोहोर भइरहने हुँदा पुल नै भत्किने जोखिम बढेको कटहरी गाउँपालिकाका अध्यक्ष रामकुमार कामत बताउँछन् ।

‘सिंघीया खोलाको पुल भत्किए विराटनगर पूर्वका सम्पूर्ण उद्योगका लागि आउने कच्चा पदार्थ ल्याउन र उत्पादन बजार पठाउने कार्य बन्द हुन्छ,’ उनले भने, ‘पुल भत्किए पूर्वी मोरङको सम्पर्क नै विराटनगरसँग विच्छेद हुन्छ । त्यसैले तत्काल कटान रोकथामका साथै पुल मर्मत आवश्यक छ ।’

पिलरको जग कटान भइरहेको सूचना आएपछि मोरङका प्रमुख जिल्ला अधिकारी काशीराज दाहालले प्राविधिक इञ्जिनियरको टोलीसहित मंगलबार निरीक्षण गरेका छन् । ‘तल पुलको जगको वरिपरीको माटो ४ फिटभन्दा बढी कटान भइसकेको छ भने माथि खाल्डो परेर भ्वाङ फुट्ने अवस्था देखियो,’ उनले भने, ‘औद्योगिक क्षेत्र भएकोले पुलबाट हेभी सवारीसाधनहरू रात-दिन चलिरहेको हुँदा जुनसुकै बेला दुर्घटना हुने अवस्था छ ।’

हुलाकी सडक परियोजनाअन्तर्गतको उक्त पुल तत्काल मर्मतका लागि सडक डिभिजन कार्यालय विराटनगरलाई प्रजिअ दाहालले निर्देशन दिएको बताए । उनले पुलको अवस्थाबारे विभाग र सम्बन्धित मन्त्रालयलाईसमेत जानकारी गराएकोले तत्काल मर्मत गरिने प्रतिबद्धता जनाए ।

हुलाकी सडक परियोजना इकाई इटहरीका इञ्जिनियर शिवराम देवले आफूहरुले बुधबार पुलको स्थलगत अवलोकन गरेर तत्काल कटान रोक्ने उपाय लगाउने बताए ।

यस्तै, विराटनगर र कटहरीको महेशपुर जोड्ने सिंघीया खोलाको अर्को पुलमा पनि बाढीले क्षति पुर्‍याएको छ । उक्त पुलको पश्चिमतर्फको पिलरमा बाढीले कटान हुँदा भत्किने जोखिम बढेको प्रजिअ दाहालले बताए ।

यस्तै, विराटनगर १४ स्थित जतुवा र जहदा गाउँपालिका ३ भाथिगछ जोड्ने सिंघीया खोलाको अर्को पुलमा पनि बाढीले क्षति पुर्‍याएको छ । पुलको पश्चिमपट्टिको स्ल्याब बगाएकोले सडक अवरुद्ध भएको छ । सडक अवरुद्ध हुँदा तरकारी खेतीको पकेट क्षेत्र रहेको भाथिगछका किसानले आफ्ना उत्पादन विरानटगर ल्याउन कठिनाइ व्यहोर्दैआएका छन् । वडा कार्यालयको सहयोगमा स्थानीय किसानहरुले मंगलबार माटो हालेर पैदल हिँड्नसक्ने बनाएको जहदा गाउँपालिकाका अध्यक्ष कैलास मण्डलले बताए ।

प्रकाशित : कार्तिक ९, २०७८ २१:२०
पूरा पढ्नुहोस्
प्रतिक्रिया
पठाउनुहोस्
×