बेल्जियममा काम दिलाउने भन्दै बैंकक पुर्‍याउने पक्राउ- समाचार - कान्तिपुर समाचार
कान्तिपुर वेबसाईट
AdvertisementAdvertisement

बेल्जियममा काम दिलाउने भन्दै बैंकक पुर्‍याउने पक्राउ

कान्तिपुर संवाददाता

काठमाडौँ — बेल्जियममा काम लगाइदिने आश्वासन दिएर एक नेपाली महिलालाई बैंकक पुर्‍याएर बेचबिखन गरेको आरोपमा प्रहरीले ४४ वर्षीय राजेन्द्र खड्कालाई पक्राउ गरेको छ ।

बाग्लुङको गल्कोट नगरपालिका–४ घर भएका उनले थाइल्यान्डमा ८ वर्षदेखि कपडा पसल सञ्चालन गर्दै आएका थिए ।

प्रहरीका अनुसार खड्काले कमल बस्नेतका माध्यमबाट चिनजान भएकी लमजुङकी २६ वर्षीया महिलालाई बेल्जियमको होटलमा मासिक डेढ लाख रुपैयाँसम्म तलब हुने गरी हेल्पर काममा लगाइदिने प्रलोभनमा पारी ८ लाख ५४ हजार रुपैयाँ लिएर बैंकक पुर्‍याएका थिए ।

खड्काले २ वर्षअघि ती महिलालाई भैरहवाबाट भारतको गोरखपुर, कोलकाता हुँदै थाइल्यान्ड र कम्बोडिया सम्म पुर्‍याएको पाइएको मानव बेचबिखन अनुसन्धान ब्युरोका प्रवक्ता एसपी अनुराग द्विवेदीले बताए । ती महिलालाई खड्काले थाइल्यान्डमा पुर्‍याई १५ दिनसम्म कोठामा राखेको र भारतीय पर्विन्दर सिंहसमेतलाई ल्याई यौन शोषण गराएको र कसैलाई भने ज्यान लिने धम्कीसमेत दिएको खुलेको छ । खड्काले बैंककबाट मलेसिया पठाएपछि ती महिला अलपत्र परेकी थिइन् ।

पछि उनी आफन्तको सम्पर्कमा आएर १५ मार्च २०२० मा भारतको कोलकाता हुँदै नेपाल फर्किइन् । पीडित महिलाले गत असोज १८ मा ब्युरोमा दिएको किटानी जाहेरीका आधारमा खड्कालाई बिहीबार सिनामंगलबाट पक्राउ गरिएको एसपी द्विवेदीले बताए ।

प्रकाशित : कार्तिक ७, २०७८ १९:४८
प्रतिक्रिया
पठाउनुहोस्

लागूऔषध मुद्दाका फरार प्रतिवादी एमालेको वडा सदस्य निर्वाचित

दीपक परियार

पोखरा — लागूऔषध मुद्दाका फरार प्रतिवादी समेत एमालेको वडा अधिवेशनबाट सदस्यमा निर्वाचित भएका छन् । शनिबार भएको अधिवेशनबाट कास्कीको रुपा गाउँपालिका-५ मा मुस्कान पंगेनी सदस्यमा निर्वाचित भएका हुन् ।

रुपा-५ का एमाले सचिव राजन खनालले पंगेनी सदस्य निर्वाचित भएको बताए ।

उनलाई लागूऔषध मुद्दामा जिल्ला अदालत तनहुँले ६ महिना कारागार सजाय तोकेको थियो । प्रहरीले २०७७ असार १६ गते उनलाई तनहुँको आँबुखैरेनी गाउँपालिका–४ पुलजीपबाट तीन जनासहित पक्राउ गरेको थियो ।

मुग्लिनबाट आँबुखैरेनीतर्फ आउँदै गरेको ग १५ प ६६४० नम्बरको मोटरसाइकल जाँच गर्ने क्रममा पंगेनी र उनका साथीलाई खानतलासी गर्दा प्रहरीले दुई किलो तीनसय ग्राम अवैध गाँजा बरामद गरेको थियो । उनी ११ दिन हिरासत बसेर तारेखमा छुटेका थिए । पछि तनहुँ अदालतले लागू औषध मुद्दामा दोषी ठहर गर्दै ६ महिनाको सजाय तोकेको थियो ।

जेल सजाय भुक्तान नगरी उनी फरार थिए । फरार रहेकै अवस्थामा उनले भदौ १६ मा उच्च अदालत पोखरामा पुनरावेदन गरेका थिए । उक्त मुद्दामा सोमबार पहिलो पेसी छ ।

प्रकाशित : कार्तिक ७, २०७८ १९:३४
पूरा पढ्नुहोस्
प्रतिक्रिया
पठाउनुहोस्
×