बाढी पसेको बस्तीमा तिहारको तयारी [तस्बिरहरू]

अहिले मौसम खुलेपछि जनजीवन सामान्य हुँदैछ । सबै पीडा बिर्सेर उनीहरु तिहारको तयारीमा जुटेका छन् । खोलाले बगाएर खेत छेउमा थुपारेको माटो बोकेर लगि घर टाल्दैछन् । लिपपोत गर्दैछन् । जस्तो सुकै संकट र दुख आए पनि सामना गर्दै अघि बढ्नै पर्ने स्थानीय बताउँछन् ।

मौसम खुलेर पानी घटे पछि सनपाट धुनेलगायतका कृषि कर्ममा स्थानीय फर्केका छन् । घाम लाग्न थालेको हुनाले एक दिनमा सनपाट सुकेर बेच्न लायकको हुन्छ ।

नगदेबाली सनपाट बेचेर आएको रकमले यसपाली तिहार एवं छठ पर्व मनाउने कृषकहरु बताउँछन् । सनपाट धोएपछि निस्केको सन्ठीको बोझा स्थानीयले घर लगिरहेका छन् । चुल्हो बाल्न, घेराबार गर्न र लक्ष्मी पूजाको राति खेतबारीमा पूजा विधिमा पनि सन्ठीको प्रयोग हुन्छ ।