सुर्खेतको कटकुवा सामुदायिक वनमा बेवारिसे बम विस्फोट, दुई जना घाइते
सुर्खेत — वीरेन्द्रनगर नगरपालिका–७ कटकुवा सामुदायिक वनमा बेवारिसे अवस्थामा छाडिएको बम विस्फोट हुँदा दुईजना घाइते भएका छन् । घाँस दाउरा संकलन गर्ने क्रममा शनिबार बम विस्फोट हुँदा गुराँस गाउँपालिका–६ दैलेखका १४ वर्षीय नरेश नेपाली र २१ वर्षीया लिला परियार घाइते भएका छन् ।
घाइतेहरुलाई देउती अस्पतालमा सामान्य उपचारपछि थप उपचारका लागि वीरेन्द्रनरस्थित आँखा अस्पताल लगिएको जिल्ला प्रहरी कार्यालयका डीएसपी रामप्रसाद घर्तीले बताए । उनका अनुसार मुखमा छर्रा लागेका नरेशको आँखामा पनि चोट देखिएपछि आँखा अस्पतालमा भर्ना गरिएको हो ।
नेपाली सेनाले केही समय पहिले कटकुवा क्षेत्रमा अस्थायी तालिम सञ्चालन गरेकाले सो क्रममा बम छुटेको हुनसक्ने स्थानीयको आशंका छ । घटनाबारे थप अनुसन्धानका लागि सेनाको टोली पठाइएको उनले जानकारी दिए ।