भीमबहादुर हत्याका दोषीलाई कारबाही गर्न गृहमन्त्रीको ध्यानाकर्षण- समाचार - कान्तिपुर समाचार
कान्तिपुर वेबसाईट
AdvertisementAdvertisement

भीमबहादुर हत्याका दोषीलाई कारबाही गर्न गृहमन्त्रीको ध्यानाकर्षण

कान्तिपुर संवाददाता

काठमाडौँ — सत्तारुढ गठबन्धन सम्बद्ध दलित राजनीतिक भातृ संघसंगठनहरुले चितवनका भीमबहादुर विकको हत्यामा संलग्न दोषीहरुलाई कडा कारबाहीको माग गर्दै गृहमन्त्रीलाई ध्यानाकर्षण गराएका छन् । उनीहरुले विकको परिवारलाई न्यायपूर्ण क्षतिपूर्ति, पालनपोषण र रोजगारीको सुनिश्चितता गर्न माग समेत गरेका छन् ।

नेपाल दलित संघका अध्यक्ष मीन विश्वकर्मा, दलित मुक्ति मोर्चाका संयोजक दलजीत श्रीपाइली, दलित मुक्ति संगठनका अध्यक्ष गणेश विश्वकर्मा, समाजवादी दलित मुक्ति संगठनका उपमहासचिव सन्तोष घतानी र जातीय समता समाजका महासचिव भक्त विश्वकर्माद्वारा संयुक्त हस्ताक्षरित ज्ञापन पत्र बुझाउँदै उनीहरुले विश्वकर्माको हत्याको मूल जरिया जातीय छुवाछुत र भेदभाव नै भएको भन्दै मुद्दा चलाउँदा जातीय छुवाछुत र भेदभाव ऐन, ०६८ बमोजिम समेत चलाउनुपर्ने माग गरेका छन् ।

उनीहरुले ज्ञापन पत्रमार्फत सरकारले दोषीलाई कारबाही गर्ने सुनिश्चित नभएसम्म दबाबमूलक कार्यक्रम गर्ने घोषणा समेत गरेका छन् । भरतपुर महानगरपालिका–४ का ५८ वर्षीय विकको गत २८ असोजमा मन्दिरमा ‘दलितहरुले पनि पूजा गर्न पाउनुपर्छ’ भनेर आवाज उठाउँदा भएको कुटपिटबाट मृत्यु भएको थियो । कुटपिटबाट संलग्न स्थानीय सीताराम बस्नेत र दिलिप श्रेष्ठलाई प्रहरीले पक्राउ गरिसकेको छ ।


प्रकाशित : कार्तिक ५, २०७८ १७:५४
प्रतिक्रिया
पठाउनुहोस्

सल्यानमा खोलाले बगाएर एक जनाको मृत्यु

विप्लव महर्जन

सल्यान — लगातार चार दिनको वर्षातपछि खोलामा आएको बाढीले बगाएर सल्यानमा बन्गाड कुपिण्डे नगरपालिका–११ माझकाँडाका एक पुरुषको मृत्यु भएको छ ।

शुक्रबार दिउँसो खेतमा लगाएको धान हेर्न जाने क्रममा माझकाँडा खोलाले बगाउँदा ६० वर्षीय लिले बुढाको मृत्यु भएको हो ।

खोला तर्ने क्रममा बगेका उनी खोलादेखि २०/२५ मिटर तल मृत अवस्थामा भेटिएको स्थानीयले खबर गरेको जिल्ला प्रहरी कार्यालय सल्यानका सूचना अधिकारी तथा प्रहरी प्रवक्ता अर्जुन पौडेलले बताए ।

खोलाले बगाएर मृत्यु भएका बुढाको शव पोष्टमार्टमका लागि जिल्ला अस्पताल ल्याइएको उनले जानकारी गराए । खोलाले बगाएर बुढाको मृत्यु भएपनि थप अनुसन्धान भइरहेको उनको भनाइ छ ।

प्रकाशित : कार्तिक ५, २०७८ १७:३२
पूरा पढ्नुहोस्
प्रतिक्रिया
पठाउनुहोस्
×