ओलीलाई शर्माको जवाफ, ‘सरकार ढाल्छौं भनेर चुनौती दिने समय होइन’
काठमाडौँ — कांग्रेस प्रवक्ता विश्वप्रकाश शर्माले नेकपा एमालेका अध्यक्ष केपी ओलीले भनेजस्तै एक सातामै सरकार ढाल्ने चुनौती दिने समय नभएको बताएका छन् ।
ओलीले बुधबार दिउँसो एमालेले चाहे ‘एक सातामा सरकार ढाल्न सक्छौँ’ भनेर अभिव्यक्ति दिएका थिए ।
प्रवक्ता शर्माले सामाजिक सञ्जालमार्फत् जवाफको रुपमा अहिले त्यस्तो चुनौती दिने समय नभएको र संविधानतः त्यो सम्भव पनि नभएको बताएका छन् ।
‘श्रदेय कमरेड केपी ओलीज्यू, ‘चाहे एक सातामा सरकार ढाल्न सक्छौँ भनेर चुनौती दिने समय यो होइन । संविधानतः त्यो सम्भव पनि छैन,’ शर्माले भनेका छन्, ‘अविरल वर्षाले आक्रान्त नागरिकको सेवामा जुट्ने, राजनीतिमाथि उठ्ने र सोच्ने समय हो यो । आउनोस् उद्वार, राहत र पुनर्स्थापनाको अभियानमा जुटौँ ।’
प्रकाशित : कार्तिक ३, २०७८ १९:३८