सिलवाल, ढुंगेल र रोका बर्खास्त
काठमाडौँ — मन्त्रिपरिषद्को बैठकले राष्ट्रिय खेलकुद परिषद्का सदस्य सचिव रमेश सिलवाल, राष्ट्रिय युवा परिषद्का कार्यकारी उपाध्यक्ष माधव ढुंगेल र युवा तथा साना व्यवसायी स्वरोजगार कोषका कार्यकारी उपाध्यक्ष देवराज रोकालाई बर्खास्त गरेको छ ।
सोमबार बसेको मन्त्रिषरिषद्को बैठकले सिलवाल, ढुंगेल र रोकालाई बर्खास्त गर्ने निर्णय गरेको एक मन्त्रीले जानकारी दिए ।
'यसअघिको सरकारबाट राजनीतिक नियुक्ति पाएका व्यक्तिलाई नयाँ सरकारले स्पष्टिकरण सोधेको थियो । चित्तबुझ्दो भएन र कारबाही गरियो,' ती मन्त्रीले भने ।
तीन जालाई नै बर्खास्त गरेको निर्णयबारे सरकारका प्रवक्तासमेत रहेका सञ्चार तथा सूचना प्रविधिमन्त्री ज्ञानेन्द्रबहादुर कार्कीले भने औपचारिक जानकारी दिएका थिएनन् । मन्त्रालयमा आयोजित मन्त्रिपरिषद्का निर्णय सार्वजनिक गर्न आयोजित पत्रकार सम्मेलनमा यसबारे कुनै जानकारी दिइएको थिएन ।
सिलवाल, ढुंगेल र रोकालाई केपी शर्मा ओली नेतृत्वको सरकारले राष्टंरिय खेलकुद परिषद्, राष्ट्रिय युवा परिषद् र युवा तथा साना व्यवसायी स्वरोजगार कोषमा नियुक्त गरेको थियो ।
प्रकाशित : कार्तिक १, २०७८ १९:०६