एनआरएनएको कार्यकाल ६ महिना थपियो- समाचार - कान्तिपुर समाचार

एनआरएनएको कार्यकाल ६ महिना थपियो

रासस

काठमाडौँ — गैरआवासीय नेपाली संघ (एनआरएनए) को कार्यकाल ६ महिना थप गरिएको छ । एनआरएनएको शनिबार भएको भर्चुअल बैठकले विधानबमोजिम वर्तमान कार्यसमितिको कार्यकाल ६ महिना थप्ने निर्णय गरेको हो ।

एनआरएनएको यथाशीघ्र ६ महिनाभित्र अधिवेशन गर्नेगरी कार्यकाल थप गरिएको संस्थाका प्रवक्ता डिबी क्षेत्रीले जानकारी दिए । विधानअनुसार कार्यसमितिको कार्यकाल एक पटकका लागि मात्रै ६ महिना अवधि थप्न सकिने व्यवस्था छ ।

बैठकले एनआरएनएको १०औं महाधिवेशन तथा निर्वाचनको माहौल बनाउने जिम्मा अन्तर्राष्ट्रिय कार्यकारी सचिवालय र अध्यक्ष पन्तलाई जिम्मा दिइएको प्रवक्ता क्षेत्रीले बताए ।

एनआरएनएको महाधिवेशन प्रतिनिधि छनोटको विषयमा विवाद हुँदा परराष्ट्र मन्त्रालयमा उजुरी परेपछि मन्त्रालयले संस्थाको निर्वाचनसम्बन्धी सम्पूर्ण प्रक्रिया रोक्न पत्राचार गरेको थियो । मन्त्रालयको पत्रबमोजिम २३ देखि २५ अक्टोबरका लागि तय गरिएको १०औं महाधिवेशन तथा विश्व सम्मेलन स्थगित भएको थियो ।

बैठकले महाधिवेशन प्रतिनिधिका विषयमा आएका गुनासो सम्बोधन गर्न एक स्वतन्त्र समिति गठन गर्ने निर्णय गरेको छ । एनआरएनएको अध्यक्ष पदको लागि कुल आचार्य, रविना थापा र बद्री केसीले उम्मेदवारी घोषणा गरिसकेका छन् ।

प्रकाशित : आश्विन ३१, २०७८ १६:०५
प्रतिक्रिया
पठाउनुहोस्

सिन्धुलीमा ९ युवकविरुद्ध सामूहिक बलात्कारको आरोप

३ पक्राउ, ६ जना फरार
राजकुमार कार्की

सिन्धुली — दसैंको टीका लगाएर घर फर्किने क्रममा सिन्धुलीको कमलामाई नगरपालिका-५ को लब्दाहखोलास्थित ९ युवाको समूहबाट बलात्कृत भएको भन्दै ३ जना किशोरीले उजुरी दिएका छन् । सिन्धुलीको कमालामाई नगरपालिकाका ३ जना किशोरीका परिवारले ती युवकहरुविरुद्ध उजुरी दिएका हुन् ।

किशोरीका आफन्तले प्रहरीमा दिएको किटानी जाहेरी अनुसार आफन्तकहाँ दसैं टीका लगाएर फर्किंदा शनिबार राति कमलामाई नगरपालिका-५ को लब्दाहखोला पुलमुनि ९ जना यूवाहरूको समूहले सामूहिक बलात्कार गरेका थिए । प्रहरी निरीक्षक रामभक्त भट्टराईका अनुसार सामूहिक बलात्कारमा संलग्न आरोपीमध्ये ३ जनालाई पक्राउ गरिएको छ । बाँकी ६ जना फरार छन् ।

बलात्कृत हुने किशोरीहरू १५, १६ र १७ वर्षका रहेका छन् । बलात्कार भएका किशोरीका अभिभावकले किटानीसहित ती यूवाहरूलाई कारबाहीको माग गर्दै दिएको उजुरीका आधारमा २२ वर्षीय हिम लामा, २४ वर्षीय गणेश मगर र २२ वर्षीय विवेक मगरलाई पक्राउ गरिएको प्रहरी निरीक्षक भट्टराईले जानकारी दिए । बलात्कारमा संलग्न फरार व्यक्तिहरूको खोजतलास भइरहेको उनले बताए ।

दसैंको बिदाका कारण अदालत बन्द भएकाले पक्राउ परेकालाई कारबाही गर्न हाललाई पक्राउ पूर्जी लिएको र खुलेपछि थुनामा राखेर अनुसन्धान गर्नका लागि म्याद थप गराई कारबाही प्रक्रिया अघि बढाइने प्रहरी निरीक्षक भट्टराईले बताए ।

प्रहरी स्रोतका अनुसार ३ जनामध्ये २ किशोरीको बलात्कारमा संलग्न २ युवकसँग चिनजान रहेको र बोलाएर जाँदा सामूहिक बलात्कारमा परेका थिए ।किशोरीहरूको मेडिकल जाँचका क्रममा पनि बलात्कार भएको खुलेको प्रहरीले जनाएको छ । एकजना किशोरीलाई पाँचजनाले सामूहिक बलात्कार गरेको पाइएको प्रहरीले जनाएको छ ।

प्रकाशित : आश्विन ३१, २०७८ १५:४४
पूरा पढ्नुहोस्
प्रतिक्रिया
पठाउनुहोस्
×