दसैंले उत्साह, उमङ्ग र सकारात्मक ऊर्जा थप्नेछ : राष्ट्रपति भण्डारी- समाचार - कान्तिपुर समाचार

दसैंले उत्साह, उमङ्ग र सकारात्मक ऊर्जा थप्नेछ : राष्ट्रपति भण्डारी

कान्तिपुर संवाददाता

काठमाडौँ — राष्ट्रपति विद्यादेवी भण्डारीले बडादसैं २०७८ का अवसरमा स्वदेश र विदेशमा रहेका नेपालीमा शुभकामना व्यक्त गर्दै सुख, शान्ति, समृद्धिका साथै सबैमा नयाँ उत्साह, उमङ्ग र सकारात्मक ऊर्जा थप्ने विश्वास व्यक्त गरेकी छिन् ।

राष्ट्रपति भण्डारीले कोभिड–१९ महामारीको संक्रमणबाट जोगिन नेपाल सरकारले लागू गरेको जनस्वास्थ्यका मापदण्डको पालना गर्दै होसियारीपूर्वक दसैं पर्व मनाउनका लागि सबैमा आग्रह पनि गरेकी छिन् ।

बडादसैं आश्विन महिनाको शुक्ल प्रतिपदाका दिनदेखि नवमीसम्म शक्तिको आराधना गरी विजया दशमीका दिन प्रसादस्वरूप मान्यजनहरूको हातबाट टीका, जमरा र आशीर्वाद ग्रहण गरी पूर्णिमासम्म विशेषरूपमा मनाउने चाड भएको उल्लेख गर्दै राष्ट्रपतिले नकारात्मक प्रवृत्तिका विरूद्धमा सकारात्मक प्रवृत्तिले विजय हासिल गरेको खुसीयालीमा मनाइने विजया दशमीको पर्वको विशेष महत्व रहेको जनाएकी छिन् ।

'वर्षाको हिलोमैलोपछि सुरम्य शरद् ऋतुमा मनाइने दसैँ पर्व शक्तिको उपासना, कृषि औजार तथा हतियारको पूजा गरी मनाइने नेपालीहरूको मौलिक सांस्कृतिक चाड हो । यस पर्वको कृषिप्रधान नेपाली समाजको जीवनपद्धतिसँग समेत अभिन्न सम्बन्ध रहेको छ,' सन्देशमा भनिएको छ, 'यस प्रकारका चाडपर्वहरूबाट नेपाली समाजको मौलिक पहिचानका रूपमा रहेको जातीय, भाषिक, भौगोलिक, सामाजिक र सांस्कृतिक विविधताबीच आपसी सद्भाव, सहिष्णुता र बन्धुत्वको भावना अभिवृद्धि गरी राष्ट्रिय एकता सुदृढ गर्न थप मद्दत पुग्ने विश्वास लिएको छु ।'

त्यस्तै उपराष्ट्रपति नन्दबहादुर पुनले समृद्ध राष्ट्र निर्माणका लागि सबै नेपालीलाई एकताबद्ध गर्दै आपसी सहमति, सहयोग र सहकार्यको बाटोमा अघि बढ्न बडादसैँले सबैलाई प्रेरित गर्ने अपेक्षा व्यक्त गरेका छन् ।

प्रकाशित : आश्विन २९, २०७८ ०६:५७
प्रतिक्रिया
पठाउनुहोस्

दसैंमा बनाउनुस् यी परिकार

कान्तिपुर संवाददाता

काठमाडौँ — दसैं नेपालीहको महान चाड । परिवार तथा आफन्त जमघटमा विभिन्न मिष्ठान्न भोजन बनाइन्छ । सबैले आफ्नो स्वाद र इच्छाअनुसार परिकार बनाएर खान्छन् । वरिष्ठ सेफ गोविन्दनरसिंह केसीले दसैं विशेष दुईवटा शाकाहारी र मांसाहारी भोजनका रेसिपी दिएका छन् ।

खसीको भुटुवा

  • बोसो र हाड नभएको खसीको मासु १ किलो
  • २५० एमल काँचो तोरीको तेल
  • अदुवा र लसुनको पेस्ट ४० देखि ५० ग्राम
  • तेजपत्ता २ देखि ३ वटा
  • जिराको धूलो पाउडर २० ग्राम
  • धनियाँँको पाउडर १० ग्राम
  • खुर्सानीको धूलो १० ग्राम
  • गरम मसला
  • बेसार १० ग्राम
  • नुन स्वादअनुसार

खसीको छाला, हड्डी अनि बोसो सबै निकालेर क्युब आकारमा कम्तीमा १५ देखि २० ग्रामको पिस बनाउने । त्यसपछि सबै मसला हालेर मोल्ने । मोलिसकेपछि चुलोमा राखेर ठूलो आँचमा राखेर भुट्ने । छोपेर आधा घण्टासम्म पकाउने । कसौँडीमा पकाएको अझै मिठो मानिन्छ । मासु राम्ररी पाकेपछि इच्छाअनुसार गोलभेडा काटेर हाल्न सकिन्छ तर यो अप्सनल हो । यो ४५ मिनेटमा तयार हुन्छ । यसलाई सुख्खा नहुन्जेल मज्जाले भुट्ने र माथिबाट धनियाँँ हाल्ने । खसीको भुटुवा भात तथा खाजाको रुपमा खाना सकिन्छ ।

चरा साँधेको

  • हाड नभएको कुखुराको मासु २५० ग्राम । छाती र फिलाको मासु लिन सकिन्छ
  • भुटेको तिलको पाउडर २५ ग्राम ।
  • रातो सिंगो खुर्सानी २–३ वटा
  • दही २५० ग्राम
  • अमिलो १० एमएल
  • तोरीको तेल २५ एमएल
  • मेथि ३ देखि ५ ग्राम
  • सानो आकारमा काटेको अदुवा अनि लसुन १० देखि १५ ग्राम
  • बेसार ५ ग्राम
  • हरियो धनियाँँ
  • नुन स्वादअनुसार

कुखुराको मासुलाई उसिन्ने । चिसो भएपछि हातले मासुलाई केस्रा केस्रा बनाउने । दहीमा तिलको पाउडर मिलाउने । तोरीको तेल तताएर रातो खुर्सानी पड्काउने अनि मेथी पनि बेसार हाल्ने । अनि केस्रा परेको मासुमा माथि भनिएका सामग्री मोल्ने । आकर्षक देखाउन चाइनिज हरियो सागलाई सेतो प्लेटमा राखेर गोलभेडा, गाजर तथा मूलाको फूल बनाएर सजाएर माथिबाट धनियाँ राखेर सर्भ गर्न सकिन्छ ।

खसीको लेदोबेदो ( मटन करी)

यो नेपाली स्टाइलको मटन करी हो ।

  • १ किलो मासुमा (आधा हड्डी र आधा हड्डी नभएको )
  • १५० ग्राम प्याज
  • १०० ग्राम गोलभेडा
  • तेजपत्ता केही
  • अदुवा लसुन पेस्ट ३० ग्राम
  • जिरा पाउडर ३० ग्राम
  • बेसार १५ ग्राम
  • धनियाँ १० १५ ग्राम
  • हरियो धनियाँ १५ ग्राम
  • १०० एमएल काँचो तोरीको तेल
  • गरम मसला १० देखि १५ ग्राम

मासुलाई टुक्रा पारेर ठिक्क आकारको पिस बनाउने अनि सबै मसला मोल्ने । त्यसलाई आगोमा मज्जाले आधा घण्टासम्म भुट्ने डढ्न नदिने । मासु पाकिसकेपछि काटिएको गोलभेडा हाल्ने । ४५ मिनेट देखि १ घण्टासम्म पकाएपछि धनियाँँ हाल्ने । अनि यो खानको लागि तयार हुन्छ ।

मिसमास तरकारी

यो बनाउन सिजनल तरकारीहरु लिन सकिन्छ ।

  • मुला १०० ग्राम
  • गाजर ५० ग्राम
  • सिमी १०० ग्राम
  • काउली १०० ग्राम
  • इसकुस ५० ग्राम
  • पाकेको फर्सी ५० ग्राम
  • हरियो धनियाँँ २५ ग्राम
  • अदुवा १५ ग्राम
  • लसुन १५ ग्राम
  • तोरीको तेल १०० एमएल
  • मेथी ५ ग्राम
  • सुकेको खुर्सानी २ वटा
  • खुर्सानीको धूलो १५ ग्राम
  • धनियाँँको धूलो १० ग्राम
  • जिराको धूलो १५ ग्राम
  • बेसार १० ग्राम
  • गोलभेडा ५० ग्राम
  • गरम मसला १५ ग्राम
  • नुन स्वादअनुसार

यो तरकारीमा प्याज हाल्न जरुरत छैन । सबै तरकारी धोएर इच्छाअनुसारको आकारमा काट्न सकिन्छ । कराईमा तेल तताउने खुर्सानी र मेथी पड्काउने । अनि काटिएको तरकारी हाल्ने । जब आधा पाक्छ अरु सबै मसलाहरु हाल्दिने । एकछिन भुटेपछि पाक्न दिने । पाकेपछि गोलभेडा हाल्ने । त्यसपछि धनियाँ हालेर सर्भ गर्ने ।

साग झाँनेको

  • १ किलो पालुंगो
  • काँचो तोरीको तेल २५ एमएल
  • जिराको गेडा ५ देखि १० ग्राम
  • अदुवा १५ ग्राम
  • लसुन १५ ग्राम
  • सुकेको खुर्सानी २ देखि ३ वटा
  • मेथी ५ ग्राम
  • नुन स्वादअनुसार
  • जिराको धुलो १५ ग्राम

पालुंगो सागलाई सफासँग धुने । कराईमा तेल तताउने तातो भएपछि खुर्सानी र मेथी पड्काउने । अलिकति अदुवा लसुनको पेस्ट हाल्ने। भुटिसकेपछि पालुंगो हाल्ने । केही समय गल्न थालेपछि जिरा पाउडर हल्दिने ।नुन हाल्ने । यो बढीमा ८ देखि १२ मिनेटमा पाकिसक्छ । माथिबाट अदुवा र लसुनको टुक्रा हालेर धनियाँ हालेर पस्किन सकिन्छ ।

(बुनु थारुसँगको कुराकानीमा आधारित)

प्रकाशित : आश्विन २९, २०७८ ०६:३१
पूरा पढ्नुहोस्
प्रतिक्रिया
पठाउनुहोस्
×