हमालको राजीनामा जनताकै भावना अनुसार : नारायणकाजी श्रेष्ठ- समाचार - कान्तिपुर समाचार

हमालको राजीनामा जनताकै भावना अनुसार : नारायणकाजी श्रेष्ठ

सन्तोष सिंह

धनुषा — नेकपा माओवादी केन्द्रका नेता नरायणकाजी श्रेष्ठले जनताका भावना विपरित मन्त्री नियुक्त हुँदा दुई दिन नबित्दै राजीनामा दिने अवस्था आएको बताएका छन् । नव नियुक्त उद्योग वाणिज्य तथा आपूर्ति मन्त्री गजेन्द्रबहादुर हमालको राजीनामा जनताकै भावना अनुसार भएको उनले बताए ।

जनकपुर विमानस्थलमा कान्तिपुरसित नेता श्रेष्ठले संविधानमा गैर सांसदलाई मन्त्री बनाउने व्यवस्था अनुरुप बनाएको भएपनि जनताको ‘म्यान्डेट’ अनुसार राजनीनामा गर्ने अवस्था आएको बताए ।

'राजीनामा दिने गरी मन्त्री किन बनाइयो जनताले प्रश्‍न गर्नेछन्,' नेता श्रेष्ठले भने, 'संविधानमा रहेको प्रावधान अनुसार गैर सांसदलाई मन्त्री बनाइयो । तर प्रावधानको औचित्य पुष्टि गर्न सक्नुपर्थ्यो ।'

गठबन्धनको आन्तरिक समस्याका कारण मन्त्रिपरिषद् विस्तारमा ढिलो भएको उनले बताए । सर्लाहीको लालबान्दीमा वाईसीएलले आयोजना गरेको कार्यक्रमा सहभागी हुन नेता श्रेष्ठ आएका हुन् ।

प्रकाशित : आश्विन २४, २०७८ १२:४२
प्रतिक्रिया
पठाउनुहोस्

प्रदेश २ सभाको सातौं अधिवेशन २ दिनमा ३ बैठक बसेर अन्त्य

सन्तोष सिंह

धनुषा — प्रदेश २ को प्रदेश सभाको सातौं अधिवेशन ३ दिनमै अन्त्य गरिएको छ । गत बुधबारदेखि सुरु अधिवेशन शुक्रबार रातिदेखि लागू हुनेगरी अन्त्य गरिएको छ । प्रदेश प्रमुख हरिशंकर मिश्रले नेपालको संविधानको धारा १८३ को उपधारा (२) बमोजिम असोज २२ गते शुक्रबार रातिबाट लागू हुनेगरी सातौं अधिवेशन अन्त्य हुने घोषणा गरेको पत्र प्रदेश सभालाई पठाएको प्रदेश सभाका सचिवालयका सचिव रञ्जित यादवले बताए ।

फाइल तस्बिर

प्रदेशसभामा प्रदेशको राजधानी तोक्ने प्रस्तावसहित १३ विधेयक छलफलको क्रममा रहेको यादवले बताए । सातौं अधिवेशनको पहिलो बैठकमा मुख्यमन्त्री लालबाबु राउतले विश्वसको मत र दोस्रो बैठकमा प्रदेश प्रमुखको कार्यालयबाट फिर्ता गरिएको दुई विधेयक पारित गरी प्रदेश सभाको सातौं अधिवेशन अन्त्य गरिएको हो ।

लामो समयको अन्तरालपछि बसेको प्रदेशसभाको सातौं अधिवेशनबाट प्रदेशको नाम र राजधानी टुंगो लगाउन सांसदहरुले माग गरेका थिए । अधिवेशन सुरु भएको पहिलो बैठकमा शुभकामना दिने सांसदहरुले प्रदेशको नाम र राजधानी तोक्न नसक्दा चौतर्फी आलोचना भएको भन्दै सातौं अधिवेशनबाटै नाम र राजधानी टुंगो लगाउन प्रदेशसभा संसद् सचिवालय र सरकारलाई आग्रह गरेका थिए । प्रदेशसभा बैठक नबस्दा संसद्‌को विषयगत समिति समेत नेतृत्वविहीन छ । सभापतिविहीन भएको संसदीय समितिको बैठक समेत प्रभावित भएको छ । सार्वजनिक लेखा समिति, प्राकृतिक स्रोत तथा वातावरण समिति र कृषि तथा भूमि व्यवस्थापन समिति सभापतिविहीन छ ।

यसैबीच प्रदेशसभाका विषयगत समितिहरुको सदस्य फेरबदल गरिएको छ । प्रदेशसभा सदस्य रामकिशोर प्रसाद यादवलाई सार्वजनिक लेखा समितिमा, सुरेश मण्डललाई कृषि तथा भूमि व्यवस्था समितिमा, ज्ञानेन्द्रकुमार यादव र सरोजकुमार सिंह कुशवाहालाई प्रदेश मामिला समितिमा राखिएको छ । लोसपा संसदीय दलका नेता जितेन्द्र सोनललाई प्राकृतिक स्रोत तथा वातावरण समितिमा र अभिराम शर्मालाई सार्वजनिक लेखा समितिमा र डिम्पलकुमारी झालाई अर्थ तथा योजना समितिमा राखिएको छ ।

प्रदेशसभा सदस्य सिंहाशन साह कलवारलाई कृषि तथा भूमि व्यवस्थापन समितिबाट सार्वजनिक लेखा समितिमा, बबिता कुमारीलाई सार्वजनिक लेखा समितिबाट प्रदेश मामिला समितिमा, प्रह्लाद गिरी गोस्वामीलाई प्रदेश मामिला समितिबाट सार्वजनिक लेखा समितिमा र जानकीशरण साहलाई सार्वजनिक लेखाबाट प्राकृतिक स्रोत तथा वातावरण समितिमा ल्याइएको जानकारी शुक्रबार प्रदेशसभा बैठकमा सभामुखले जानकारी गराएका थिए ।

प्रकाशित : आश्विन २३, २०७८ ११:१७
पूरा पढ्नुहोस्
प्रतिक्रिया
पठाउनुहोस्
×