वीरगन्जबाट हराएकी ११ वर्षीया बालिकाको दिल्लीबाट उद्वार- समाचार - कान्तिपुर समाचार

वीरगन्जबाट हराएकी ११ वर्षीया बालिकाको दिल्लीबाट उद्वार

शंकर आचार्य

पर्सा — झण्डै तीन महिनाअघि वीरगन्जबाट अचानक हराएकी एक ११ वर्षीया बालिका भारतको नयाँदिल्लीमा फेला परेकी छन् । वीरगन्ज १५ लक्ष्मणवा घर भएकी रेखा कुमारी (नाम परिवर्तन) जुलाई १३ तारिखमा दिल्ली पुगेकी थिइन् । वीरगन्जको सीमावर्ती सहर रक्सौलबाट रेल चढेर उनी दिल्ली पुगेकी थिइन् ।

वीरगन्जस्थित भारतीय महावाणिज्य दूतावासमा बुधबार आयोजित पत्रकार सम्मेलनमा उनको उद्वारमा सक्रिय संस्था तथा नेपाल तथा भारतीय महावाणिज्य दूतावासका अधिकारीहरुले रेखाको उद्वारबारे जानकारी गराएका थिए ।

उनको उद्वारमा संलग्न आफन्त नेपालका भारत प्रमुख नवीन जोशीले भारतीय प्रहरीले जुलाई १३ तारिखमा रेखालाई दिल्लीको रेल्वे स्टेशनमा बेवारिसे अवस्थामा फेला पारेर भारतीय चाइल्ड लाइन संस्थाको जिम्मा लगाएको बताए । चाइल्ड लाइनले रेखालाई दिल्लीकै अनाथ तथा बेवारिसे बालबालिकाको आश्रयस्थल चाइल्ड वेलफेयर कमिटीको कार्यालयको जिम्मा लगाएको थियो ।

आफन्त नेपालले रेखाको घरफिर्तीका लागि करिब ३ महिनासम्मको प्रयासपछि परिवारसँग पुनर्मिलन गराउन सम्भव भएको जनाएको छ । ‘यस कार्यमा थुप्रै कानूनी प्रक्रिया अघि बढाउँदा लामो समय लाग्न गयो,’ जोशीले भने, ‘नेपाल सरकार, काठमाडौंस्थित भारतीय दूतावास, वीरगन्जस्थित भारतीय महावाणिज्य दूतावास र दिल्लीस्थित नेपाली दूतावासको पनि धेरै सहयोग पाइयो ।’

जोशीले सुरुमा रेखाले आफ्नो नाम मात्र बताएको र अरु केही नबताएकाले उनको ठेगाना तथा आफन्तको पहिचान खुल्न समस्या भएको बताए । ‘हामीले सेल्टरमा उनलाई दैनिक जसो काउन्सिलिङ गर्न थाल्यौँ, बिस्तारै उनले बोल्दै गएपछि नेपालको वीरगन्ज र उनको घरको टोलसम्मको कुरो खुल्यो, त्यसपछि टोलको नामबाट उनको परिवारजनसँग सम्पर्क स्थापित भयो ।

मेडिकल जाँचपछि बालिकाको मानसिक र शारीरिक अवस्था पूर्ण रुपले ठीक भए पनि बालिका अझै पनि खुलेर बोल्न नसक्ने उद्वार संस्थाका अधिकारीहरुले बताएका छन् ।

रेखाले बताए अनुसार उनी वीरगन्जबाट अटो चढेर सिधै सीमापार भारतीय सहर रक्सौल पुगेकी थिइन् । रक्सौलबाट उनी दिल्ली रेलमा टिकट नकाटेरै चढेको पनि अनुसन्धानबाट खुलेको छ । रेल चढको भोलिपल्ट मात्रै अर्थात् जुलाई १३ तारिखमा उनी दिल्लीको रेल्वे स्टेशनमा उत्रिएकी थिइन् ।

उनको साथबाट ३ सय रुपैयाँ नेपाली र १ सय रुपैयाँ भारु फेला परेको बताइएको छ । रेल्वे स्टेशनमा प्रहरीको नजरमा नपरेको भए उनी दिल्लीमा ठूलो जोखिममा पर्नसक्ने खतरा रहेको जोशीले बताए ।

जोशीका अनुसार हरेक वर्ष एक सयभन्दा धरै नेपालीहरु भारतका विभिन्न सहरमा हराउने गर्छन् । कोरोना महामारीपछि यो क्रम झनै बढेको जोशीले बताए । भारतको गाजियावादबाट एकैपटक १९ बालबालिकाको उद्वार गरिएको जोशीले बताए ।

प्रकाशित : आश्विन २०, २०७८ २०:३१
प्रतिक्रिया
पठाउनुहोस्

अग्रज पत्रकार चन्द रहेनन्

भवानी भट्ट

कञ्चनपुर — सुदूरपश्चिम क्षेत्रकै अग्रज पत्रकार रामबहादुर चन्दको निधन भएको छ । बुधबार ९५ वर्षको उमेरमा काठमाडौंमा उनको निधन भएको हो ।

चन्दका ज्वाँई सुभास सिंहका अनुसार बुधबार बिहान उनको निधन भएको हो । नेपाल पत्रकार महासंघ कञ्चनपुरका संस्थापक अध्यक्षसमेत रहेका चन्द यस क्षेत्रकै पुराना पत्रकार हुन् । उनले प्रेस काउन्सिल नेपालबाट प्रेस सतन्त्रता सेनानीको सम्मानसमेत पाएका थिए ।

उनले कञ्चनपुरमा तीसको दशकको अन्त्यदेखि नै वार्ता साप्ताहिक पत्रिका सञ्चालन गरेका थिए । त्यसपछि पनि उनले विभिन्न पत्रपत्रिकाहरु सञ्चालन गरेका छन् । पछिल्लो समय उनी काठमाण्डौंमा छोरीसँगै बस्दै आएका थिए ।

सिंहका अनुसार चन्दको स्वास्थ्यमा दुई दिनदेखि समस्या देखिएको थियो । अस्पतालमा सामान्य उपचारपछि घरमै आराम गरिरहेका थिए । बुधबार अचानक मृत्यु भएको हो । चन्दका दुई छोरी र श्रीमती छन् ।


प्रकाशित : आश्विन २०, २०७८ २०:२६
पूरा पढ्नुहोस्
प्रतिक्रिया
पठाउनुहोस्
×